Read urhobo 1 Samuẹl 30 Bible Online

1 Samuẹl 30 - urhobo bible

1 Samuẹl 30

¹Vwẹ ọke ri Devid vẹ ihwo rọye vwo te Ziklag vwẹ ẹdẹ rerha, ihwo Amalẹk kpo imu vwẹ obo Nẹgẹb kug Ziklag. Ayen de phi Ziklag kparobọ, ayen vwẹ erhanre torhẹ,

²ayen de mu eya re herọ kugbe ihwo re herọ ejobi, te imitete te ekpako; ayen hwe ohwo ọvuọvo-o, ẹkẹvuọvo ayen mu ayen reyọ, ayen de kpo.

³Ọke ri Devid vẹ ihwo rọye rhi vwo te orere na, ayen da ra vwẹ erhanrẹ torhẹ, te eya rayen vẹ emọ rẹ emetẹ rayen e de mu ayen ighuvwu.

⁴Etiyin Devid vẹ ihwo re vẹ ọye gba herọ teye ugoroviẹ, ayen da viẹ bẹsiẹ rẹ oma vwo ro ayen.

⁵Eya ri Devid ivẹ e ji mu ayen yanran, Ahinoam ri Jẹzreel, kugbe Abigail ayeuku ri Nabal ri Karmel.

⁶Oma da ghwọrọ Devid gangan; kidie ihwo na ayen che phio, fikiridie ivun re ghwie ihwo vwẹ udu rayen, ohwo ọvuọvo fiki rẹ emọ rọ rẹ eshare vẹ emetẹ. Ẹkẹvuọvo fiki rẹ Ọrovwohwo Ọghẹnẹ rọye udu rẹ Devid da gan.

⁷Devid da ta kẹ Abiata rẹ orherẹn, rẹ ọmọ rẹ Ahimẹlẹk, Vwẹ ibuluku vwo rhe vwe. Etiyin Abiata da vwẹ ibuluku na vwo rhe Devid.

⁸Devid de duotọ rọye vwẹ obọ rẹ Ọrovwohwo, Ke Me vwọ tua ihwo na? Me je sa yan mu ayen? ọ de nyo kẹ, Vwọ tua ayen; kidie wọ sa djẹ mu ayen wo ghine ji se sivwi ayen.

⁹Etiyin Devid de mu oyan họ, ọ vẹ ihwo rọye ujori esan ri nene na, ayen de rhi te etẹrhẹ ri Bẹsọr, asan rẹ ihwo rẹ ayen yan jovwo obuko epha.

¹⁰Ẹkẹvuọvo Devid je vwọ tua ayen, ọye vẹ ihwo ujori ẹne; ujori ivẹ daji obuko, rẹ oma rhọre re sa wan ẹtẹrhe ri Bẹsọr na vrẹ-ẹn.

¹¹Ayen da mrẹ ohwo rẹ Ijipt vwẹ obo uphephẹ, ayen da reyọ vwo rhe Devid; ayen da vwẹ emu kẹ ọ da re, ayen da vwẹ ame kẹ da,

¹²ayen da vwẹ ikara ri fig vwọ kẹ kugbe erheghe rẹ emamọ ivẹ. Rọ vwọ re nu, o de gogo aro vi; kidie vwẹ ẹdẹ erha kugbe ason erha ọ je re emu-u ọ je da ame-e.

¹³Devid da ta kẹ, Wẹ ohwo ri tivọ? Ki tivọ wo nẹ cha? ọ da ta, Mẹvwẹ emeghele rẹ Ijipt, odibo rẹ ohwo rẹ Amalẹk; onini mẹ da yan ju vwe vwo fikiridie Me mwe ọga kerẹ ẹdẹ erha re.

¹⁴Avwanre kpo imu vwẹ obo Nẹgẹb rẹ ihwo ri Kẹrẹt kugbe otọ ri Juda kugbe otọ ri Nẹgẹb rẹ ihwo ri Kalẹb; avwanre da torhẹ Ziklag.

¹⁵Devid da ta kẹ, Ku wo se sun vwe bru usun rẹ ihwo na? Ọ da tanẹ, Gba vwẹ Ọghẹnẹ duvwu iyori kẹ vwẹ, tanẹ wo hwe vwe-e, nẹ wọ rhoma mu vwe kẹ onini mẹ-ẹ, ki mi sun we bru ayen ra.

¹⁶Ọke ro vwo suo yanran, nighe, ayen da hra nene otọ na ejobi, ayen ria ayen da ayen gbe eha, fiki rẹ emu buebu rẹ ayen mrẹ mu nẹ otọ ri Filistia kugbe otọ ri Juda rhe.

¹⁷Devid de hwe ayen nẹ ọke phoro phoro rẹ ovwọnvwọn re te ovwọnvwọn rẹ ẹdẹ rivẹ; ọvuọvo rẹ ihwo na djẹ vabọ-ọ, jopka re imighele ujori ẹne ri pho ro emu ri karmel djẹ kpo.

¹⁸Devid da rhoma ghwẹ emu ejobi rẹ ihwo rẹ Amalẹk ghwẹ reyọ; Devid da reyọ eya rọye ivẹ.

¹⁹Emu ọvuọvo ghwruru-u, Ọhavwere eyẹ ọrhoro, emeshare yẹrẹ emetẹ, ekuakua yẹrẹ emuọfa ta ayen ghwe reyọ; Devid da ghwẹ ayen ejobi reyọ.

²⁰Devid da je ghwẹ igegede na ejobi vẹ uchuru na ejobi reyọ; ihwo na de sun uchuru na ka obaro kẹ, ayen da ta, Enana obo ri Devid gborhori.

²¹Etiyin Devid de rhi te asan rẹ ihwo ujori ivẹ na epha, re oma rhọre ri ji Devid enene na, ra yan jovwo vwẹ oma rẹ ẹtẹrhe ri Bẹsọr na; ayen da djẹ ra vwa Devid kugbe ihwo re vẹ ọye gba yan usun; ri Devid vwo sikẹre ihwo na o de yere ayen.

²²Etiyin ihwo umwemwu re pha rharhaphiẹ vwẹ usun ri Devid da tanẹ, Fikirobo rẹ ayen nene avwanre ra-a na, avwanre gbe kẹ ayen emu re gborhori rẹ avwanre mie ayen na-a, jokpa nẹ ohwo ọvuọvo vẹ aye rọye kugbe emọ reyọ re ayen yanran kpo.

²³Ẹkẹvuọvo Devid da ta, Ovwan ruẹ ọtiọye-e, imoni mẹ, vwọ kpahe obo rẹ Ọrovwohwo vwọ kẹ avwanre; ọsẹro rẹ avwanre o de rhe phi ihwo ri rhi gborho avwanre na phihọ avwanre obọ.

²⁴Ono a kerhọn rẹ ovwan vwẹ oma rẹ ota nana? Kidie uche obo ri te ohwo ro kpo ofovwi ọtiọye ri ji te ohwo ri tidia kẹrẹ oghwa; abavo ẹkẹ rayen cha dia.

²⁵Nẹ ẹdẹ yena yanran o de vwo ru iji vẹ urhi vwọ kẹ ihwo rẹ Izrẹl rhi te nonẹ.

²⁶Ri Devid rhi vwo te Ziklag, ọ da vwẹ abọvo rẹ emu ro gborhori na vwo rhe igbeyan rọye, ekpako ri Juda, tanẹ, ọna ọko re me phare rhe ovwan vwẹ usun rẹ emu na rẹ ivwighrẹ rẹ Ọrovwohwo gborhori,

²⁷e vwi ro rhe ihwo ri Bẹtẹl, vwi Ramọt vwẹ obo Nẹgẹb, vwi Jattir,

²⁸vwi Aroer, vwi Sifmot, vwi Eshtemoa,

²⁹vi Rakal, vwẹ irere rẹ ihwo ri Jerahmeei, vwẹ irere rẹ ihwo ri Ken,

³⁰vwi Họrmah, vwi Borashan, vwi Atak,

³¹vwi Hehrọn, kugbe kasan kasan ejobi ri Devid vẹ ihwo rọye gboro te.