Read urhobo 1 Samuẹl 5 Bible Online

1 Samuẹl 5 - urhobo bible

1 Samuẹl 5

¹Ọke rẹ ihwo ri Filistia vwo mu ekpeti rẹ Ọghẹnẹ na, ayen de muo nẹ Ebẹnezar kpo Ashdọd;

²Etiyin ihwo ri Filistia na da reyọ ekpeti rẹ Ọghẹnẹ na ayen de muo kpo uwevwi ri Dagọn ayen de muo kẹrẹ Dagọn.

³Ọke rẹ ihwo rẹ Ashdọd vwo vrẹn vwẹ irhiọke ride vwẹ ẹdẹ rivẹ, nighe, Dagọn she bọvwọ opharo rhuotọ vwẹ obaro rẹ ekpeti rẹ Ọrovwohwo na. Etiyin ayen da rhoma mu Dagọn phihọ asan rọ epha jovwo.

⁴Ẹkẹvuọvo rẹ ayen vwọ rhọvwo rhe vwẹ irhiọke rivẹ, nighe, Dagọn rhoma she bọvwọ opharo rhuotọ vwẹ obaro rẹ ekpeti rẹ Ọrovwohwo na, te uyovwi ri Dagọn te abọ rọye ivivẹ da kpare she phihọ asan anurhoro ugboma ri Dagọn ọvo kọye chekọ kẹ.

⁵Kọna re soro rẹ irherẹn ri Dagọn kugbe ihwo ejobi re ro uwevwi ri Dagọn vwo jẹ anurhoro ri Dagon vwẹ Ashdọd echiyo ri te ẹdẹ ri nonẹ na.

⁶obọ rẹ Ọrovwohwo da rhe tua kpahe ihwo rẹ Ashdọd, ọ da djẹ oshọ mu ayen ọ da vwẹ irubeto mu ayen, te Ashdọd vẹ aghwa rọye ejobi.

⁷Ọke rẹ ihwo rẹ Ashdọd rhe vwọ mrẹ obo rẹ emu na epha re, ayen da ta, ekpeti rẹ Ọghẹnẹ rẹ Izrẹl na vẹ avwanre gbe cha dia etinẹ-ẹ; kidie obọ rọye tua kpahe avwanre kugbe Dagọn ẹdjọ rẹ avwanre.

⁸Etiyin ayen de ji ikọn re se ehọnvwọre ri Filistia ejobi koko, ayen da ta, Mavọ e ru ekpeti rẹ Ọghẹnẹ rẹ Izrẹl na? Ayen da kpahe, E jẹn e mu ekpeti rẹ Ọghẹnẹ rẹ Izrẹl na rhivwi kpo Gat. Etiyin ayen de mu ekpeti rẹ Ọghẹnẹ rẹ Izrẹl na rhivwi kpo oboyi.

⁹Ẹkẹvuọvo re vwo muo kpo etiyin nu, obọ rẹ Ọrovwohwo da tua kpahe ihwo rẹ orere na, ọ da jẹ uguegue phihọ ayen oma, ọ da vwa emiavwe mu ihwo rẹ orere na, te ighele te emare, irubeto da rhe varhe vwẹ ayen oma!

¹⁰Etiyin ayen de mu ekpeti rẹ Ọghẹnẹ na kpo Ekrọn. Ẹkẹvuọvo ọke rẹ ekpeti rẹ Ọghẹnẹ mi rhi vwo te Ekrọn, ihwo rẹ Ekrọn de bunu, Ayen mu ekpeti rẹ Ọghẹnẹ rẹ Izrẹl bru avwanre rhe obonẹ re ọ rhi hwe avwanre vẹ ihwo rẹ avwanre.

¹¹Ayen de ji ikọn re se ehọnvwọre ri Filistia ejobi koko, ayen da ta, E mu ekpeti rẹ Ọghẹnẹ rẹ Izrẹl na yanran, rere o rhivwi kpo asan rọye, rere o jẹ avwanre vẹ ihwo rẹ avwanre ehwe. Kidie uguegue rode rhe ro orere na ejobi oma. Obọ rẹ Ọrovwohwo pha tuatua vwẹ etiyin;

¹²ihwo ri ghwuru-u irubeto de mu ayen, oviẹ rẹ orere na de rhi do kpenu.