Read urhobo 1 Samuẹl 7 Bible Online

1 Samuẹl 7 - urhobo bible

1 Samuẹl 7

¹Ihwo ri Kiriat-jearim da rhe rhi mu ekpeti rẹ Ọrovwohwo na, ayen de muo kpo uwevwi rẹ Abinadab vwẹ obenu rẹ ugbenu; ayen da vwẹ Eleazar, ọmọ rọye mu, rere ọ vwẹ ẹro te ekpeti rẹ Ọrovwohwo na.

²Nẹ ẹdẹ re vwo mu ekpeti na kpo Kiriat-jearim, da dia ọke grogro, o te ẹgbukpe uje, uwevwi rẹ Izrẹl ke viẹ hwe Ọrovwohwo.

³Etiyin Samuẹl da ta kẹ uwevwi rẹ Izrẹl ejobi, Wa da vwẹ udu rẹ ovwan ejobi kurhẹriẹ bru vwe rhe, we gbe ku edjọ erhorha na kufia kugbe Ashera na nẹ ohri rẹ ovwan, re we hirhe udu rẹ ovwan ku Ọrovwohwo, re wa ga ọye ọvo, ko sivwi ovwan nẹ obọ rẹ ihwo ri Filistia.

⁴Etiyin Izrẹl de siobọ nẹ Baal kugbe Ashera na, ayen da ga Ọrovwohwo ọvo.

⁵Etiyin Samuẹl da ta, Se Izrẹl ejobi koko vwi Mizpah, re me nẹ ẹrhovwo kẹ Ọrovwohwo vwọ kẹ ovwan.

⁶Etiyin ayen da ra ghwẹ koko vwi Mizpah, ayen de vo ame kpare ku hẹ obaro rẹ Ọrovwohwo, ayen de chiri owẹvwe vwẹ ẹdẹ yena, ayen da ta vwẹ etiyin, Avwanre ru umwemwu kpahe Ọrovwohwo. Samuẹl da vwẹ ihwo rẹ Izrẹl gu ẹdjọ vwi Mizpah.

⁷Asakiephana rẹ ihwo ri Filistia vwo nyo nẹ Izrẹl ghwẹ koko vwi Mizpah, ehọnvwọre ri Filistia da kpare ohọnre vwọ so Izrẹl. Ọke rẹ ihwo rẹ Izrẹl vwo nyo oshọ rẹ ihwo ri Filistia de mu ayen.

⁸Ihwo rẹ Izrẹl da ta kẹ Samuel, Kperi se Ọrovwohwo kẹ avwanre wọ da unu jẹ-ẹ, rere o sivwi avwanre nẹ obo ri Filistia.

⁹Etiyin Samuẹl da reyọ omogodẹ ro viẹ evie ọ da vwẹ ọsoso rọye ze izobo rẹ ẹtorhẹ kẹ Ọrovwohwo; etiyin Samuẹl de kperi se Ọrovwohwo kẹ Izrẹl, Ọrovwohwo de nyo kẹ.

¹⁰Ri Samuẹl vwọ torhẹ izobo na, ihwo ri Filistia de rhi bi ohọnre na te Izrẹl oma; ẹkẹvuọvo Ọrovwohwo da van ovan ọgangan ku ihwo ri Filistia o de phi ozighi phihọ ohri rayen; ayen da mrẹ Izrẹl djẹ.

¹¹Ihwo rẹ Izrẹl de vrẹn nẹ Mizpah ayen da vwọ tua ihwo ri Filistia, e de hwe ayen, rhiri re te Bẹtkar.

¹²Etiyin Samuẹl da reyọ oragha o de vwo vi uvwre ri Mizpah vi Jẹshanah, o de se odẹ rọye Ẹbẹnizar, kidie ọ tare nẹ, Etinẹ na Ọrovwohwo da cha avwanre uko.

¹³Etiyin a da djẹ ihwo ri Filistia ayen gbe vwẹriẹ otọ rẹ Izrẹl ọfa-a. Obọ rẹ Ọrovwohwo da tua kpahe ihwo ri Filistia vwẹ ọke ri Samuẹl ejobi.

¹⁴Irere rẹ ihwo ri Filistia reyọ mie ihwo rẹ Izrẹl a da rhoma vwẹ ayen kẹ Izrẹl, nẹ Ekron re te Gat; Izrẹl da reyọ etọ rayen mie ihwo ri Filistia. Ufuoma da herọ vwẹ uvwre rẹ Izrẹl kugbe ihwo rẹ Amọr.

¹⁵Samuẹl da vwẹ Izrẹl gu ẹdjọ vwẹ ẹdẹ rẹ akpọ rọye ejobi.

¹⁶Kọ yan riariẹ kukpe kukpe nẹ Bẹtẹl, kpo Gilgal, nẹ Gilgal kpo Mizpah; asan nana kọye o de gu ẹdjọ rẹ Izrẹl.

¹⁷Ọ mi rhe rhivwi rhe Ramah, kidie etiyin uwevwi rọye epha, kẹ etiyin o de suẹn Izrẹl. Ọ da so agbada kẹ Ọrovwohwo vwẹ Etiyin.