Read urhobo 1 Samuẹl 8 Bible Online

1 Samuẹl 8 - urhobo bible

1 Samuẹl 8

¹Ri Samuẹl vwọ ghwore, ọ da vwẹ emọ rọye ru iguẹdjọ vwẹ Izrẹl.

²Odẹ rẹ ọmọ ọkpako rọye ki Joẹl, odọ rẹ ọrivẹ kẹ Abijah; ayen kẹ iguẹdjọ vwi Bẹẹr-shẹha.

³Dede na emọ rọye yan nene idjerhe rọye-e, ẹkẹvuọvo esi rẹ erere kọye ayen nene; ayen da re udi ayen da bọvwọ ẹdjọ rhu.

⁴Etiyin ekpako rẹ Izrẹl ejobi da ghwẹ koko bru Samuẹl rhe vwi Ramah,

⁵ayen da ta kẹ, Nighe, wọ ghwore yẹ emọ wẹn yan nene idjerhe wẹ-ẹn: Asakiephana gba vwẹ ovie mu kẹ avwanre ro sun avwanre kerẹ ẹgborho ri chekọ na ejobi

⁶Ẹkẹvuọvo ota na je Samuelu-u rẹ ayen vwọ ta, Kẹ avwanre ovie ro sun avwanre. Samuẹl da nẹ ẹrhovwo kẹ Ọrovwohwo.

⁷Ọrovwohwo da ta kẹ Samuẹl, Nyo obo rẹ ihwo na ta kẹ wẹ ejobi; kidie ọ dia owẹ ayen sẹnre-e, ẹkẹvuọvo mẹvwẹ ayen sẹnre nẹ ọ dia ovie kẹ aye-en.

⁸Kerẹ emu ejobi rẹ ayen ru kẹ vwẹ na, nẹ ẹdẹ Me vwọ reyọ ayen nẹ otọ rẹ Ijipt rhe rhi te nonẹ, ayen sẹn vwẹ ayen ga edjọ ọtiọye rhe ayen ji ruẹ kẹ wẹ na.

⁹Asakiephana, kerhọ rẹ ayen; takpe, jomaotọ vwẹ ayen; ru wo dje kẹ ayen idjerhe rọ ovie ro che sun ayen na.

¹⁰Etiyin Samuẹl da ta ota rẹ Ọrovwohwo na kẹ ihwo na re nọ ekpẹn rẹ ovie mie.

¹¹Ọ da ta. Enana keye cha dia idjerhe rẹ ovie ro che sun ovwan na: kọ cha reyọ emeshare rẹ ovwan vwo ru ihwo re gua rọye kugbe lyesi rọye, rere e mia djẹ vwẹ obaro rẹ rọye;

¹²kọ vwẹ inotu rẹ uriori mu kugbe inotu rẹ ujuvẹ gbe ihwe, evọ ki voro udju rọye kẹ evo ki rhe vun orhọ rọye kẹ, evo ki duvwu ekuakua rẹ ofovwi rọye kugbe ekuakua rẹ rọye.

¹³Kọ reyọ emetẹ rẹ ovwan re dia ichere-udẹ kugbe icheremu kugbe ekakemu.

¹⁴Kọ reyọ udju rẹ ovwan ro me yovwi kugbe ogba ri vain rẹ ovwan kugbe ogba rẹ oliv rẹ ovwan kọ vwẹ ayen kẹ idibo rọye.

¹⁵Kọ reyọ ẹkẹ-ihwe rẹ ọka rẹ ovwan kugbe ogba ri vain rẹ ovwan ọ me vwẹ ayen kẹ iruiruo rọye kugbe idibo rọye.

¹⁶Kọ reyọ idibo rẹ ovwan rẹ eshare kugbe idibo rẹ ovwan rẹ emetẹ, kugbe uchuru rẹ ovwan ri me yovwi kugbe ekẹtẹkẹtẹ rẹ ovwan, kẹ eye o che vwo ru iruo rọye.

¹⁷Kọ reyọ ẹkẹ-ihwe rẹ igodẹ rẹ ovwan, ovwan ke dia eviẹn rọye.

¹⁸Vwẹ ẹdẹ yena ovwan ki che kperi fiki rẹ ovie rẹ ovwan na, rẹ ovwan jẹ ke oma rẹ ovwan na; ẹkẹvuọvo Ọrovwohwo rhe kpahe kẹ vwẹ ẹdẹ yena-a.

¹⁹Ẹkẹvuọvo ihwo na rha davwerhọ ri Samuelu-u; ayen da ta, Ẹjo, ẹkẹvuọvo avwanre guọnọ ovie ro sun avwanre,

²⁰rere avwanre dia kerẹ ẹgborho ri chekọ na, rere ovie rẹ avwanre sun avwanre rọ ka obaro kẹ avwanre re phi ofovwi kẹ avwanre.

²¹ọke ri Samuẹl vwo nyo ota rẹ ihwo na ejobi, ọ da vwariẹn ayen kẹ Ọrovwohwo na.

²²Ọrovwohwo da ta kẹ Samuel, Kerhọ rẹ ota rayen na, re wọ vwẹ ovie mu kẹ ayen. Samuẹl da ta kẹ ihwo rẹ Izrẹl, Yanran kpo dohwo dorere rọye.