Read urhobo 1 Samuẹl 9 Bible Online

1 Samuẹl 9 - urhobo bible

1 Samuẹl 9

¹Ohwo rẹ orua ri Bẹnjamin ọvo herọ odẹ rọye Kish, ọmọ rẹ Abiẹl, ọmọ ri Zẹrọr, ọmọ ri Bẹkọrat, ọmọ rẹ Afiah, ohwo rẹ orua ri Bẹnjamin, ohwo na ọdafe;

²o de vwo ọmọ re se odẹ rọye Sọl, emeghele yoyovwi. O vwo ohwo ọvuọvo vwẹ Izrẹl na ro yovwi te-e o vwi ki igabọ kpenu gro nọ kohwo kohwo ejobi.

³Asakiephana ekẹtẹkẹtẹ ri Kish, ọsẹ ri Sọl, de ghwru. Etiyin Kish da ta kẹ Sọl rẹ ọmọ rọye, Reyọ odibo ọvo vwọ ba oma, wo vrẹn, yanran ra guọnọ ekẹtẹkẹtẹ na

⁴Ayen da rhe wan vrẹn orho rẹ ubgenu na Ifrem rhe wan vrẹn otọ ri Shalisha, ẹkẹvuọvo ayen mrẹ aye-en. Ayen da wan vrẹn otọ ri Shaalim, ẹkẹvuọvo ayen hẹ etiyi-in. Etiyin ayen da wan vrẹn otọ ri Bẹnjamin, ẹkẹvuọvo ayen je mrẹ aye-en.

⁵Ọke rẹ ayen rhi vwo te otọ ri Zuf, Sọl da ta kẹ odibo ro nene na, Yanrhe, re rhivwi, ọ rha dia ọtiọye-e ọsẹ mẹ ko che gbobọ nyẹ ekẹtẹkẹtẹ na kẹ avwanre ọ cha ro ẹnwa rọye.

⁶Ẹkẹvuọvo ọ da ta kẹ, Nighe, ohwo rẹ Ọghẹnẹ ọvo hẹ evun rẹ orere na, ọ da dia ohwo re mu ọghọ kẹ; obo rọ tare ejobi sẹ. Jẹn e kpo etiyin; ọkeọvo ọ sa ta kẹ avwanre obo ma vwi fiki rọye yan.

⁷Etiyin Sọl da ta kẹ odibo rọye, Ẹkẹvuọvo avwanre da ra, kidie a mrẹ vwọ kẹ? Kidie ikara rọ hẹ ekpu rẹ avwanre reri, yo vwo ọko ra mrẹ phare rhe ohwo rẹ Ọghẹnẹ na-a. Die avwanre vwori?

⁸Odibo na da rhoma kpahe kẹ Sọl, Mi vwo ẹkẹ ẹne ri shẹkẹl rẹ idọnọ vwẹ etinẹ, ke me vwọ kẹ ohwo rẹ Ọghẹnẹ na, ro dje idjerhe kẹ avwanre.

⁹(Jovwo vwẹ Izrẹl, ọke rẹ ohwo de re duotọ rẹ emu vwẹ obọ rẹ Ọghẹnẹ, ọ me ta, Yanrhe, re kpo obo rẹ ọmrorẹ; kidie ohwo re se ọmraro asakiephana ọmrorẹ e se jovwo.)

¹⁰Sọl da ta kẹ odibo rọye, omamọ ota wọ tare; yanrhe, ra ra. Etiyin ayen de kpo orere rẹ ohwo rẹ Ọghẹnẹ na epha.

¹¹Rẹ ayen vwo yere ugbenu na kpo obo orere na, ayen da vwa emetẹ ri re vo ame, ayen da nọ ayen, ọmrorẹ na hẹ etinẹ?

¹²Ayen da kpahe, ọ herọ; nighe, ọye hẹ obaro rẹ ovwan na. Kpare awọ; nana nana o di kpo obo orere na, fikiridie ihwo na re ze izobo nonẹ na vwẹ obenu rẹ ugbenu.

¹³Wa da ghwa ro orere na, wa cha mrẹ, tavwe ro ki kpo obenu rẹ ugbenu na ra re emu; kidie ihwo na cha re emu bẹsiẹ ro vwọ rhe-e, rọ vwọ dia ohwo ro muẹdia ze izobo na; kẹsiẹye ihwo re seri na ke ria. Asakiephana wa yanran, kidie wa cha vwa nana nana.

¹⁴Etiyin ayen de kpo obo orere na; Rẹ ayen ghwa vwọ ro orere na, ayen da mrẹ Samuẹl rọ yan cha ro kpo obenu rẹ ugbenu na.

¹⁵Asakiephana vwẹ ẹdẹ rọ wanu ri Sọl ke rhe na, Ọrovwohwo da vwọ phia kẹ Samuel:

¹⁶Odẹ rọ cha vwẹ oghẹre rẹ ọke etiọna mi che ji ohwo ọvo nẹ otọ ri Bẹnjamin bru we rhe, ku wọ vwẹ evwri te rọ dia oviẹ vwe enu rẹ ihwo mẹ Izrẹl. Ko sivwi ihwo mẹ nẹ obọ rẹ ihwo ri Filistia, kidie Me mrẹ oma ẹlaghọ rẹ ihwo mẹ, fikiridie oviẹ rayen rhi te vwẹ oma re.

¹⁷Ọke ri Samuẹl vwọ mrẹ Sọl, Ọrovwohwo da ta kẹ, Ọnana ohwo re Me ta kẹ wẹ na! Ọna ri che sun ihwo mẹ na.

¹⁸Etiyin Sọl de si kẹrẹ Samuẹl vwẹ ughere na, ọ da ta, Ta kẹ vwẹ tivọ he uwevwi rẹ ọmrẹ na?

¹⁹Samuẹl da kpahe kẹ Sol, mẹvwẹ ọmrorẹ na; karo kẹ vwẹ kpo obenu rẹ ugbenu na, kidie nonẹ na wọ vẹ ovwẹ cha re emu, vwẹ irhiọke tavwe wo ki kpo ke me ta obo re hẹ udu wẹn ejobi kẹ wẹ.

²⁰Vwọ kpahe ekẹtẹkẹtẹ wẹn ri ghwruru rhanwe ẹdẹ erha re na, wọ rha ruẹ ẹnwa rẹ aye-en, kidie a mrẹ ayen nure. Ki fiki rẹ ono a vwọ guọnọ ọyena ejobi vwẹ Izrẹl na? ọ rha dia ifiki wẹ vẹ uwevwi rẹ ọsẹ wẹn ejobi?

²¹Sọl da kpahe, Me dia ohwo ri Bẹnjamin, orua rọ ma hanvwe ejobi vwẹ Izrẹl na? ọ dia ekru me re je ma hanvwe vwẹ ekru ri Bẹnjamin na? Kidie sorọ wọ vwọ ta ota kẹ vwẹ vwẹ idjerhe ẹtiọna?

²²Etiyin Samuẹl da reyọ Sọl vẹ odibo rọye ọ da vwẹ ayen rhe obo ọguan na ọ da vwẹ uvi rẹ asan kẹ ayen vwẹ usun rẹ ihwo re seri na, ri bute ihwo ọgban na.

²³Samuẹl da ta kẹ ocheremu na, Mu ẹkẹ re me vwọ kẹ wẹ na rhe, ọ re me ta kẹ wẹ nẹ phihọ akakọ na.

²⁴Etiyin ocheremu na da reyọ owọ na vẹ ekuakua re kpaherọ o de mu ayen kẹ Sọl; Samuẹl da ta, Nighe, obo ra sẹro rọye nu na ọye e mu kẹ wẹ na. Re; fikiridie e ji ro vwo hẹrhẹ owẹ rhi te ọke nana, rere wọ vẹ erhorha na vwọ re emu. Etiyin Sọl vi Samuẹl da re emu vwẹ ẹdẹ yena.

²⁵Ọke rẹ ayen vwo wotọ nẹ enu rẹ ugbenu na cha obo orere na, a da hwa ehwa kẹ Sọl vwẹ obo okpo rẹ uwevwi na, o de she vwerhẹ.

²⁶Rẹ ọke vwo rhie Samuẹl de se Sọl vwẹ obo okpo rẹ uwevwi na, Vrẹn, re mi sun we kpo. Etiyin Sọl de vrẹn, te ọye te Samuẹl da yan ro evun rẹ urhuvwu.

²⁷Rẹ ayen che vwo te ughere rẹ orere na, Samuẹl da ta kẹ Sọl, Ta kẹ odibo na rọ yan hẹ obaro kẹ avwanre, ọke rọ da wan nu gbe mudia etinẹ emerha, re me vuẹ wẹ uwevwi rẹ Ọghẹnẹ ji vwe.