Read kinyarwanda ISATA 4 Bible Online

ISATA 4 - kinyarwanda bible

ISATA 4

¹Yam hoik tawng Mawdakie ka an khawmuik, nawh riah kraung ceep tix khankix mai ceep kraung pa kawm mai kraix nyaox khankix piang tix mai hu laig ka daux sigreung veng heue. Nawh riag yo lox tix tau mai lox pa kied ting mai yiiem sigrien sigre heue.

²Nawh hu tom hoek ka bing pak pa koe ka plak sivoe diang siviex simiang kheu jao ang pui tix kaux kawx yaox tix laig ka daux diang siviex tau mai krax pa ceep tix kraung pa kawm heue.

³Ka daux baoh haktiex dee hoik koe lox tawm simiang lox ngia pa kied ting koe ka daux sinax pui Yudax khankix, tau mai krax pa twah pa ih mai krax pa yiiem riag yiiem yo mai pui khankix it tom nie tau mai kraung pa kawm mai nyaox khankix heue.

⁴Kawncau bun Isata mai pui sieh nawh khankix, hoek krai nawh mhong grawng an mai laux simiang hoik koe krax pa laux rhawm ka, khaix an nawh sipaox kraung ceep khankix, sonsang ceep Mawdakie ka mai sonsang peeik kix ti teei kraung kawm khaing piang nawh, viang mawh nan nawh ang cu tix rieb kraung ankix heue.

⁵Isata kok ka Hatiet pa mawh pui sieh tix kaux khaing daux cub pui sieh cie simiang, pa hoik tawx kix mawh cao pa jhak pa ngien ka nawh mai Isata tawx lox tix ka nawh son grawng Mawdakie, sonsang hu jhak mawh ceu patix mai jao patix heue.

⁶Hatiet hu ka Mawdakie ka dah dee ot nawh bing pak, pa koe plak sivoe diang siviex simiang heue.

⁷Mawdakie krai nawh mhong grawng ankix khawmuik khawm leeing pa hoik lih piang nawh mai khawm grawng mau pa hoik ah Haman tix sang tawx sau ka daux krao sinngao cie simiang khankix, sonsang yuh kix krax pa laux leeing ka pui Yudax khankix heue.

⁸Nawh baox tawx lai gumlox pao pa hoik tiiem tix son krax pa sang yuh kix laux leeing ka pui Yudax ka nawh mai pa hoik tawx khaing Shushan pa mawh nyiex simiang sonsang pon jhi nawh lai an ka Isata mai krai lao gumlox an sidawng ka Isata sonsang hu laig nawh ka dee ot simiang mai sonsang hu yuh nawh krax pa khyox khaw lox awn tix ka nawh mai khyox khaw tix krai lox ka plak sivoe simiang son ceu pui nawh khankix heue.

⁹Hatiet hoik deeh ing mai krai Isata mhong gumlox sikah Mawdakie khankix heue.

¹⁰Isata sikah mai Hatiet mai nawh tawx gumlox tawm tix ka nawh son Mawdakie heue.

¹¹Cub kawncau simiang khankix mai can pui pa ot baoh haktiex simiang khankix, tawng ka koe been tix mu, simex kaux mawx ang ah, bun kaux mawx ang ah, pa hu laig ka plak daux piang dee ot simiang mai pa ang nyang mawh pa kok tix hoek khankix, tak sang mawh pa pah yum khawmuik, lheu khaing pui tix kaux pa nyee simiang pliah khri giex tix lih ka son pui an mai nawh tak pon tix im ju heue. Ka daux tixngoe singaix inkix tokaux cao aux mawh pa ang nyang bax kok tix laig ka dee ot simiang heue.

¹²Mawh kheu nan kix krai gumlox Isata ka Mawdakie.

¹³Mawdakie krai kix mhong lox pa sang dee pawk tix ka Isata ah nin, “Paw doh keud ka daux rhawm maix, ka tak sang pon glawd maix ka ot tix daux nyiex laux simiang nie lheu khaing pui Yudax tang kaux khankix heue.”

¹⁴Phan maix kawn ca kut tix ot ka daux krax pa yiien yawg ka daux bawg yam in, krax im ju maix pa taoh lawd tak sang lih kaoh ka son pui Yudax khankix khaing tang dah tang dee, viang mawh nan maix mai nyiex ma keeing maix khankix, tak sang laux leeing heue. Khex ang maix nyang bax tawng grawng krax pa hoik pon maix tix mawh laux simiang ka daux haktiex in, son daux bawg yam an awm in lie?

¹⁵Khaix an Isata deeh krai kix mhong sonsang deeh ing kix tawx gumlox pawk in ka Mawdakie heue.

¹⁶“Hu heue, kraix khrawm ceu pui Yudax pa koe ka daux veng Shushan khankix mai twah pa ih son aux, paw ih paw nyaux son daux loe ngaix loe sawm, kawncau bun aux khankix mai aux kawx tak twah ka pa ih awm an mai khaix an aux tak hu ka simiang, ka daux krax pa tieh feen been, mai phan mawh pa yum, aux tak kham tix yum ka.

¹⁷Khaix an Mawdakie hu krax hu tix mai yuh awm gumlox pa hoik tawm Isata ka nawh khawmuik.