Read kinyarwanda ISATA 5 Bible Online

ISATA 5 - kinyarwanda bible

ISATA 5

¹Ka daux bawg yam hoek daux loe singaix, Isata ceep kraung ceep laux simiang mai ex cung ka plak daux piang nyiex haw simiang pa koe plak toi nyiex simiang glang yam kawn ngawm simiang piang dang ngeung cie nawh ka daux nyiex haw, khawm simi ti jhak ka plak see diang laig daux nyiex haw heue.

²Yam yaox simiang ka cung laux simiang Isata ka daux piang plak daux an, Isata hoik yaox pon tix bwanson plak sivoe nawh mai simiang yaog tix tawx pliah khri pa koe daux taix tix ka Isata, khaix an Isata hu dex mai hu teeh ka toh pliah an.

³Simiang ah nin ka nawh, “Laux simiang Isata eue, mawh sang lo maix ceu patix lie? mawh sang mhaing maix ceu patix lie? Aux tak sang tawx ka maix tom haktiex aux khankix tix plak.”

⁴Isata deeh pawk ah nin, “Phan mawh pa khaw rhawm simiang, kieh simiang mai Haman hoek tix ih priex pawie khan kheu pa khre rien son nawh ka daux in singaix.”

⁵Simiang ah nin, “Kok Haman hoek phai phai, sonsang pon nawh ti yuh, awm ah Isata, mawh kheu nan simiang mai Haman hu ka pawie priex pa hoik khre rien Isata heue.

⁶Ka daux pawie khan kheu rawm plix siiet simiang ah nin ka Isata, “Mawh koe rhawm maix tix sang lo ceu patix lie? Aux tak tawx ka maix, mawh sang mhaing maix ceu patix lie? tom meung haktiex aux tix plak lie? Aux tak tawx heue.”

⁷Isata deeh pawk lox ah nin, “Ceu pa sang lo aux mai ceu pa sang khyox khaw aux rawg mhaing aux mawh inkix,

⁸phan aux mawh pa pon bwanson ka plak sivoe simiang mai phan mawh pa khaw rhawm simiang tix sang tawx ceu pa lo aux mai yuh ceu pa khyox khaw rawg mhaing aux khankix grum naog, kieh simiang mai Haman hoek ka pawie pa khre rien aux tix khan kheu ka son kix mai ka daux pasax, aux tak yuh awm pa ah simiang heue.”

⁹Ka daux singaix an Haman lih hu ka plak praix khawm gaux rhawm mai nyawm rhawm tix, viang mawh nan yam yaox Haman ka Mawdakie ka daux diang siviex simiang mai Mawdakie ang lai kaoh cung nab yam ka plak sivoe nawh tan, nawh kied koe krax pa song rhawm ka Mawdakie.

¹⁰Haman gun rhawm tix mai ing ka nyiex mai nawh ploi pui hu kok ka paox grawm nawh khankix mai khawm moeng nawh Zeriet.

¹¹Haman krai kix mhong grawng pa magmi tix mai pa haoh hun kawn praix tix khankix mai grawng pa hoik yaog simiang ti deuh nawh mawh pa kied ting lhaong khaing piang cao kaing khankix mai khawm piang kawncau cub simiang khankix.

¹²Haman baox ah nin, “Lheu khaing aux, laux simiang Isata ang lai ghaok pui tix kaux kawx, sonsang hoek tix tau mai simiang ka pawie priex pa hoik khre rien nawh mai ka daux pasax kawx nawh baox deeh ghaok aux, hu tau mai simiang.

¹³Glang yam kawn yaox aux Mawdakie pa mawh pui Yudax an, pa ngawm diang siviex simiang, ceu inkix khawmuik ang lai mawh pa koe bwanson ka son aux.

¹⁴Khaix an moeng nawh Zeriet mai khawm paox grawm nawh khankix khawmuik ah nin ka nawh, “Yuh khaox sigang, kieh lhaong tixphwan sawk mai yam hoek plak ponngawb, tawx krax pa keud maix ka simiang, sonsang teuk teue Mawdakie yum piang an, khaix an hu ka daux pa gaux rhawm tix tau mai simiang ka pawie priex khan kheu an mai ceu an mawh pa khaw rhawm Haman, mawh kheu nan nawh tom yuh tix jung khaox sigang heue.