Read kinyarwanda ISATA 6 Bible Online

ISATA 6 - kinyarwanda bible

ISATA 6

¹Ka daux sawm an simiang ang lai laig it, mawh kheu nan nawh tawx lox kieh pui tix kaux viex phuk lai grawng can pa hoik tiiem daux lai been khankix hoek, mai kix phat ka plak sivoe simiang,

²hoik yaox ka daux pa hoik tiiem an ti deuh ka pa hoik krai Mawdakie grawng Bigatan mai Teriet mai pa mawh pui sieh cie simiang ra kaux, pa mawh cao pa pau diang siviex khankix, pa sawg tix sang sau taix tix piang simiang Ashuerux heue.

³Simiang ah nin, “Hoik yaog tix tawx min ceu patix ka piang Mawdakie son grawng in lie?” Kawncau simiang pa hoik hoek ka plak sivoe nawh khankix ah nin, “Ang nyang bax yaox tix tawx tidtix ka nawh, ”

⁴simiang ah nin, “Mawh pui mawx pa koe ka lawg plak daux lie? Yam in Haman taug khraox laig ka daux lawg plak praix nyiex haw simiang, sonsang tawx tix krax pa keud sonsang kieh simiang teuk teue Mawdakie yum, piang khaox sigang jung pa hoik khre rien nawh ti deuh.”

⁵Kawncau simiang khankix ah in ka nawh, “Haman koe tan, nawh cung ka daux piang lawg tan, ” mai simiang ah nin, “Kieh laig heue.”

⁶Haman laig ka plak daux mai simiang chawk ti yaox nawh, “Mawh sang yuh ceu patix son pui pa koe krax gaux rhawm simiang tix sang yaog min pakngai nawh lie? Haman hoik keud ti ah nin ka daux rhawm tix, “Mawh pui pa gaux rhawm simiang tix sang yaog min pakngai nawh, lheu khaing aux lie?”

⁷Haman pawk ti ah nin ka simiang, “Son pui pa tak sang gaux rhawm, simiang tix sang yaog min pakngai nawh,

⁸kieh viex hoek kraung ceep lang jung cie simiang tix pheen mai khawm brung brug simiang tix mu, pa koe mhok khri simiang ti deuh piang kaing nawh heue.

⁹Ap sibex lang jung in mai brung, ka daux tawm taix pui pa mawh simiang pa kied laoh lie cie simiang tix kaux, son tak sang pon jhi pui pa gaux rhawm simiang tix sang yaog min pakngai nawh mai kieh nawh brug brung, lailing ka daux bing pak veng mai pao krai grawng ankix ka plak sivoe nawh mawh kheu nan an tak mawh pa hoik yuh tix ka pui an, ka pa gaux rhawm simiang tix sang yaog min pakngai nawh heue.”

¹⁰Simiang ah nin ka Haman, “Nied ti yuh phai phai, teei sibex lang jung mai brung, awm krax keud pa hoik tawx maix mai yuh awm an ka Mawdakie pa mawh pui Yudax, ka pa ngawm daux diang siviex simiang, paw prah tix ang yuh can ceu pa hoik ah maix khawmuik awx.”

¹¹Haman teei sibex lang jung mai brung hoek mai tawx Mawdakie ceep mai kieh nawh bruk brung mai lailing daux bing pak veng mai pao lox tix ka plak sivoe nawh ah nin, “Awm krax pa yuh nin mawh pa yuh ka pui pa khaw rhawm simiang tix sang yaog min pakngai nawh heue.

¹²Mawdakie deeh ing ka diang siviex simiang mai Haman kawx nied tix ing ka nyiex tix tau mai krax pa voi rhawm mai kheem kaing tix.

¹³Yam hoik krai Haman grawng ankix ka moeng tix Zariet khawm ka paox grawm tix khankix, ka ceu ankix kuceu, pa hoik lih ti mawh piang nawh khankix, pui pa koe pingnya cuyi khankix mai khawm moeng nawh Zariet deeh ah nin ka nawh, “Maix hoik jah ti som ka sivoe Mawdakie, phan nawh ruk mawh pui pa kaoh khaing daux doeh ru pui Yudax maix tak ang pex ka nawh maix tak mawh pa som nai ka plak sivoe nawh tete.

¹⁴Glang yam kawn sikah kix tau mai pui sieh cie simiang khankix hoek mai sigleeig Haman hu ka pawie priex pa hoik khre rien Isata heue.