Read kinyarwanda ISATA 8 Bible Online

ISATA 8 - kinyarwanda bible

ISATA 8

¹Ka daux singaix an simiang Ashuerux tawx laux simiang Isata cie nyiex Haman pa mawh pui koeng ceu pui Yudax khankix mai Mawdakie hoek ka plak sivoe ngai simiang kheu jao hoik krai Isata ka grawng mawh nawh paox nyiex ma tix.

²Simiang peeik jeep gien cum tix ka pa hoik deeh teei nawh tix priex khaing Haman mai tawx ka Mawdakie mai Isata ap ti deuh Mawdakie kwang piang nyiex Haman.

³Isata deeh baox sikah ka simiang mai gup tix hawt caong nawh mai khyox khaw ka nawh mai roik rawm ngai, sonsang teei nawh ti tik pa caox caig pa yuh Haman, pa mawh ceu pui Agazit mai khawm krax grawng pa rang ti yuh ka pui Yudax khankix.

⁴Simiang nyeu gawng pliah khri ka plak see Isata mai Isata yaog ti kaoh cung ka plak sivoe simiang,

⁵ah nin, “Phan an mawh pa khaw rhawm simiang mai aux pon bwanson ka plak sivoe ngai nawh mai phan ceu an tak sang mawh pa yaox tix daux pa khaw caw ka simiang mai phan aux mawh pa khaw rhawm sivoe ngai nawh, kieh lai an mawh pa tiiem tix, sonsang deeh preet ti tik lai grawng pa hoik yuh tix khankix, khaing Haman pa mawh kawn simex Hamedata pa mawh ceu pui Agat pa hoik tiiem nawh ti yuh krax laux leeing ka pui Yudax khankix, pa ot ka daux baoh haktiex cie simiang khawmuik.

⁶Aux sang pon kham geu ti yaox grawng krax pa caox caig ankix, pa tak sang hoek piang ceu pui aux khankix yuh ka mawx lie? Phan ang mawh nan aux khex sang pon kham geu ti yaox krax laux leeing doeh ru aux khankix yuh ka mawx lie?

⁷Simiang Ashuerux ah nin ka laux simiang Isata mai Mawdakie pa mawh pui Yudax, “Aux hoik tawx nyiex Haman ka Isata tete, mai hoik teuk teue nawh yum piang khaox sigang jung an, kheu jao grawng hoik coca nawh ti sang sau taix tix piang pui Yudax khankix.”

⁸Tokaux cao maix deeh tiiem gumlox pa tawm tix pheen ka son pui Yudax khankix, awm krax pa koe rhawm maix ti yuh, ka daux ceu kaux simiang mai yeen ka cum jeep gien simiang; mawh kheu lai tix pheen pa hoik tiiem tix ka daux ceu kaux simiang mai pa hoik yeen tix ka cum jeep gien simiang pui tix kaux kawx tak ang pon tix preet,

⁹kix hoik kok cao tiiem lai simiang khankix hoek daux khix loe, pa mawh khix sivan tixnga loe ngaix mai an hoik mawh pa tiiem tix awm can pa hoik tawm Mawdakie ka pui Yudax cao kwang veng khankix mai cub simiang pa kwang baoh haktiex Idiyax tom hoek ka haktiex Ethiopia, Khusha pa koe tix yieh tixnga aliah meung, son meung ankix ku meung ka plakngai lai cao kix mai son ceu pui kuceu ka plak lox sikah cao kix mai son pui Yudax khankix ka plakngai lai cao kix mai ka plak lox sikah cao kix.

¹⁰Nawh hoik tiiem lai ankix ka daux ceu kaux simiang Ashuerux mai hoik yeen cum jeep gien simiang mai tawx lai ankix hu ka cao tawx lai pa brug brung eei simiang pa kied phai to an.

¹¹Ka daux lai ankix simiang tawx akhwang ka pui Yudax khankix, pa koe ka daux veng ku veng, sonsang kraix khrawm kix paox tix tau mai tiebtie son ju kix sonsang yuh laux leeing, pah yum mai kieh grai grup singax pak lawg ka pui baoh haktiex pa sang hoek tix puing ka kix, khawm kawn nyawm mai bun dai khankix mai tud rhim tix cie kraung khrai kix,

¹²ka daux tix ngaix ngie, daux baoh haktiex simiang Ashuerux ka daux khix kao ra pa mawh khix Adax kao loe ngaix.

¹³Lai gumlox tiiem tix pheen mawh pa hoik tawx tix hu, ka daux baoh haktiex ankix kudah, mai ka pui khankix, sonsang rien pui Yudax khankix tix ka daux singaix an, sonsang deeh pawk kix bix tix ka pui koeng kix,

¹⁴mai cao pa tawx lai ankix, hoik yaog tix brug brung simiang, li hu ka daux lox pa si dhiiet simiang ka kix mai lox tawm an hoik mawh pa ploi tix lih khaing daux nyiex pau dee lhaong Shushan an.

¹⁵Mawdakie lih khaing plak sivoe dee ot simiang, ka daux dee hoik ceep nawh kraung ceep simiang pa klai raoma mai pa paing khankix tau mai ceep tix mhok khri ting pa ceep simiang mai khawm kraung ceep man ceu pa mhawm pa lung pliex tix pheen, mai pui Shushan hoik grum naog ka daux krax pa gaux rhawm.

¹⁶Pui Yudax khankix hoik koe krax pa chaong rhawm tau mai krax pa gaux rhawm tau mai pa koe min pakngai tix.

¹⁷Ka daux baoh haktiex ankix mai khawm veng ku veng ka dee hoek gumlox tawm simiang mai pui Yudax khankix hoik koe krax pa nyawm rhawm mai khawm krax pa gaux rhawm tix mai kix khan kheu ti yuh pawie mai laux lee tix tingaix, khaix an pui haktiex ankix hoik kied nie deeh tieh tix laig ka been pui Yudax kheu jao lhat graung kix ka pui Yudax heue.