Read kinyarwanda ISATA 9 Bible Online

ISATA 9 - kinyarwanda bible

ISATA 9

¹Ka daux khix kao ra, pa mawh khix Adax kao loe ngaix, mawh yam hoek son gumlox pa tawm simiang mai pa hoik pao nawh khankix, sonsang mawh pa yuh tix ka daux singaix an, pui koeng Yudax khankix hoik keud pot jun pot ti sang koe krax pex sibrawm kix mai pui Yudax deeh tieh ti pex ka sibrawm pui pa hoik koeng ka kix.

²Pui Yudax khankix hoik kraix khrawm paox tix ka daux nyiex yaong veng cao kix, pa koe ka daux haktiex simiang Ashuerux khawmuik, sonsang sau kix taix pah yum ka pui pa sawg ti yuh krax pa kha rhawm ka kix mai pui tix kaux kawx ang pon yaog tix tiebtie ka kix kheu jao hoik lhat graung pui khawmuik ka kix.

³Simiang cao pa kwang daux ku kien, ku veng mai cao kaing tang simiang mai cao pa kwang veng khankix mai can pui pa yuh kaing jhaw simiang khankix, hoik teem ka pui Yudax khankix, kheu jao hoik lhat graung kix ka Mawdakie.

⁴Mawh kheu Mawdakie mawh pa ting lhaong ka daux nyiex haw simiang mai krax ao min nawh hoik tah hoek ka daux haktiex khawmuik, pa mawh Mawdakie hoik kied nie yaog tix haok hwan ting lhaong tix ngaix hoik tix ngaix.

⁵Pui Yudax khankix hoik pah pui koeng ka kix khankix ka vaig mai yuh can ceu pa koe rhawm kix ti yuh ka pui pa koeng ka kix.

⁶Ka daux nyiex pau dee lhaong Shushan an, pui Yudax khankix hoik yuh laux pah yum ka pui khankix phwan yieh kaux.

⁷Khawm Pashandata, Dalaphon, Asapata,

⁸Phawrata, Adalia, Aridata,

⁹Pamashata, Arisai, Aridai mai Vayezata,

¹⁰Pui inkix kao kaux mawh kawn simex Haman, kawn simex Hamedatax pa mawh pui koeng pui Yudax khankix pa hoik pah kix yum viang mawh nan kix ang sau taix ti teei ka kraung khrai kix.

¹¹Ka daux singaix an carang pui ankix pa hoik pah kix yum ka daux nyiex pau dee lhaong Shushan an, hoik mawh pa viex tix jhi ka simiang.

¹²Simiang ah nin ka laux simiang Isata, “Pui Yudax khankix hoik yuh laux pah yum ka pui phwan yieh kaux, ka daux nyiex pau dee lhaong veng Shushan mai khawm kawn simex Haman khankix kao kaux, mawh hoik yuh kix ceu patix? ka daux baoh haktiex pa kawn deuk cie simiang lie? Yam in sang lo maix ceu patix? Aux tak tawx ka maix, phan ang mawh nan sang baox mhaing maix ceu patix lie? Aux tak sang yuh son maix,

¹³mai Isata ah nin, “Phan mawh pa khaw caw rhawm simiang kieh pui Yudax pa ot daux veng Shushan khankix sonsang deeh pon yuh kix daux pasax awm gumlox pa hoik pao tix ka daux in ngaix, kieh kix teuk teue kawn simex Haman kao kaux piang khaox sigang jung heue.

¹⁴Simiang tawx gumlox in kieh kix yuh gumlox pao lih khaing nyiex Shushan mai kix teuk teue kawn simex Haman khankix kao kaux.

¹⁵Ka daux khix Adax kao pon ngaix pui Yudax pa ot daux veng Shushan baox kraix khrawm paox tix tau mai pah yum ka pui loe yieh kaux daux veng Shushan, viang mawh nan kix ang sau taix ti teei ka kraung khrai khankix.

¹⁶Cub pui Yudax pa kawn deuk ka daux haktiex simiang khankix kraix khrawm paox tix tau mai tiebtie ju tix laux lee khaing pui koeng mai pah ka pui koeng yum aliah mheen phwan rheng kaux, viang mawh nan kix ang sau taix ti teei ka kraung khrai khankix.

¹⁷In mawh pa hoik yuh ka daux khix Adax kao loe ngaix mai yam hoek ka daux kao pon ngaix, kix laux lee tix mai yuh ti deuh an mawh ngaix pawie tix ngaix mai khawm singaix pawie pa gaux rhawm.

¹⁸Pui Yudax pa ot ka daux veng Shushan khankix kraix khrawm paox tix tau ka daux singaix kao loe mai ka daux singaix kao pon mai khawm ka daux singaix kao phwan khix an, kix laux lee tix mai yuh ti deuh an mawh singaix pawie tingaix mai singaix pawie pa gaux rhawm.

¹⁹Pui Yudax daux nyiex daux yaong pa ang nyang bax lai lawm tix ka guh veng khankix, hoik khan kheu ti yuh pawie ka daux singaix kao pon, daux khix Adax an, mawh singaix pa gaux rhawm mai khawm singaix khan kheu, pawie singaix laux lee mai deuh singaix an mawh singaix tawx totaix ka paox tix, tix kaux lai tix kaux.

²⁰Mawdakie tiiem grawng ceu inkix tawx hu ka pui Yudax khawmuik, pa koe daux haktiex simiang Ashuerux, khawm dee dex mai dee singai khawmuik,

²¹sonsang yuh kix pawie an ka daux sinax kix mai sonsang khan kheu kix yuh pawie an ku num, ka daux khix Adax kao pon, kao phwan ngaix,

²²awm ngaix laux lee pui Yudax khaing pui koeng tix khankix, awm mawh khix pa hoik dee tieh kix krax pa laux rhawm tix, hoek krax pa gaux rhawm son kix mai khaing krax khi rhawm tom hoek ngaix laux lee kix ti yuh mawh singaix khan kheu pawie mai singaix pa gaux rhawm mai hoik deuh mawh singaix tawx tix totaix ka paox tix, tix kaux lai tix kaux mai singaix tawx tix totaix ka pui pa hot shia khankix heue.

²³Pui Yudax khankix hoik rieb been yungyi pa jah kix ti yuh, awm pa hoik tiem Mawdakie ka kix,

²⁴kheu jao grawng Haman pa mawh kawn simex Hamedata pa mawh ceu pui Agat pui koeng cub pui Yudax khankix, hoik keud tix sang pah ka pui Yudax khankix yum mai sang yuh kix grai grup mai hoik yuh nieb, pura sonsang yuh kix laux leeing pak lawg.

²⁵Yam hoik hoek Isata ka plak sivoe simiang, nawh tawm lox tix ka lai, grawng ceu pa caox caig in, pa hoik keud Haman ti yuh piang pui Yudax khankix, deeh kieh hoek piang kaing cao nawh mai teuk teue nawh mai kawn simex nawh khankix piang khaox sigang jung an.

²⁶Mawh kheu nan kix kok singaix in mawh purim, khaix ceu kaux pura, mawh kheu jao grawng gumlox ankix pa koe ka daux lai in mai khawm ceu pa hoik yaog kix ka son grawng in mai khawm ceu pa hoik lih ti koe piang kix,

²⁷pui Yudax khankix pang ti deuh been mai deuh beeh glawm piang tokaux cao kix mai khawm piang doeh ru kix mai can pui pa tak sang sitoe tix mai kix mai ka daux krax pa ang lai tik vud kix tak khan kheu ti yuh singaix in ra ngaix, daux ku num, awm krax pa hoik tiiem tix gumlox pa sang hawt kix ti yuh khankix mai awm bawg yam krax pa hoik tat tix,

²⁸mai singaix inkix, mawh pa doh keud tix mai pa hawt priex rien ka daux baux ju sinax doeh ru kix ku cub caw, ku nyiex ma, ku kien mai ku veng, son ang ngaix purim inkix tak ang lai piawm tix mai khan kheu ti yuh pawie ngaix an ka daux sinax pui Yudax khankix mai krax pa deeh doh keud kix ka ankix, tak mawh pa ang chix grai ka daux sinax doeh ru kix.

²⁹Laux simiang Isata kawn bun Abihelax mai Mawdakie pa mawh ceu pui Yudax, hoik tiiem lai sibrawm pa grum naog ra bawg tix bawg sonsang kaux cong lai purim.

³⁰Mawdakie tawx lai ankix hu ka pui Yudax khawmuik, pa ot ka daux haktiex kwang simiang Ashuerux khankix tixnga aliah kien, tau mai gumlox pa nhim mai pa mawh meh,

³¹song sang kaux cong singaix purim in ka daux bawg yam pa hoik tin ti deuh awm hoik tat Mawdakie, pa mawh pui Yudax mai laux simiang Isata ti deuh nawh son kix mai awm hoik tawx kix gumlox paox an ka son tokaux cao kix mai ka son doeh ru kix, sonsang twah kix priex preem mai yiiem yo.

³²Mawh kheu nan gumlox Isata hoik kieh grawng purim cong mai grawng in mawh pa hoik tiiem tix ka daux phuk lai heue.