Read kinyarwanda LIH HU 16 Bible Online

LIH HU 16 - kinyarwanda bible

LIH HU 16

¹Cub pui hun pui Isarelax khankix lih hu khaing baoh Elem mai hoek ka daux tiag Sin, pa koe sinax Elem mai gawng Sina, ka daux khix ra kao phwan ngaix khaix hoik lih kix khaing haktiex Ejiptux.

²Cup pui hun pui Isarelax khankix, ngau ka Mose mai Arun kheu krax kha rhawm tix daux tiag,

³Pui Isarelax khankix ah nin ka kiex, “Phan ex yum ka daux taix Siyiex leeing ju, daux haktiex Ejiptux, yam ngawm ex mai aw nex mai sak vaig tix ka priex lheu mhawm, mai maix hoik viex yix hoek ka daux tiag, sonsang kieh maix cub pui hun yum ka pa cai rhawm tix.”

⁴Siyiex leeing ju ah nin ka Mose, “Aux tak kieh lhiex blah lih khaing raoma son pex, mai pui khankix tak lih khrawm kub son tix ngaix ku singaix, Aux tak cheuk ti yaox kix, sonsang tawng Aux ka hawt kix ang hawt ka gumlox Aux.”

⁵“Yam hoek singaix liah, kix tak khre rien pa khrawm ti, lheu khaing ku singaix ra son.”

⁶Mawh kheu nan, Mose mai Arun ah nin ka kawn praix Isarelax khankix, “Daux bo in, pex tak tawng ka mawh Siyiex pa viex pex lih khaing haktiex Ejiptux,

⁷plak ponngawb, pex tak yaox min pakngai Siyiex, mawh kheu hoik mhong Nawh Cao lox ngau pex, mawh kheu mawh ex pui yuh ka mawx pex lai deuh phimap ka yax lie?”

⁸Mose deeh ah nin, “Yam tawx Siyiex pex ih nex tom kub plakbo mai blah plak ponngawb gumlox in tak grum naog, mawh kheu Siyiex hoik mhong lox pa ngau tieh feen pex ka Nawh Cao, “Mawh ex pui yuh ka mawx? lox pa ngau tieh feen pex ang mawh ngau tieh feen ka yax, mawh pa ngau tieh feen ka Siyiex.

⁹Mose ah nin ka Arun, “Krai ka cub pui Isarelax khankix ah nin, hoek dex Siyiex. Mawh kheu hoik mhong Nawh Cao lox pa ngau pex, ”

¹⁰Yam sikah Arun ka cub pui hun Isarelax khankix, kix simi ti jhak ka daux tiag. Kix yaox min pakngai Siyiex jhan lih khaing daux paiawm.”

¹¹Siyiex ah nin ka Mose,

¹²“Aux hoik mhong lox pa ngau pui Isarelax khankix, krai kix mhong, plak ponbo pex tak yaox ti ih nex mai tak yaox ti ih blah plak ponngawb, mai pex tak tawng ka mawh Aux Siyiex pex.”

¹³Plak ponbo keed khankix lih hoek naog hawt dee bang kix, plak ponngawb rawm ciex lih vung viang dee bang kix,

¹⁴Khaix hoik deeh haok rawm ciex, ceu pa awm mu rawm rha khlawp pa lawmle iak koe ka piang tiex ka daux tiag tan.

¹⁵Yam yaox kawn praix Isarelax ka an, kix ah nin ka paox tix, tix kaux lai tix kaux, “In mawh patix lie? mawh kheu ang kix tawng ka mawh an patix. Mose ah nin ka kix, “In mawh blah pa hoik tawx Siyiex leeing ju, sonsang ih pex.”

¹⁶“Siyiex leeing ju tawm lox ah nin, kieh pui ku kaux khrawm son pa kub ih ti, tix kaux tix Awmie, awm diag koe kaux pui pa ot daux nyiex gox khankix.”

¹⁷Pui Isarelax khankix, yuh awm pa ah nawh, pui pa nie, khrawm hawt nie mai pui pa tux, khrawm hawt tux.

¹⁸Yam tong kix ti yaox ka khrawng Awmie, pui pa khrawm tom nie ang lai lheu mai pui pa khrawm iak ang lai cud, pui ku kaux hoik khrawm awm pa kub ih kaux mawx kaux an heue.

¹⁹Mose ah nin, “Paw kieh pui tix kaux kawx, deuh tom hoek ponngawb.”

²⁰Kix ang nghiet ka lox Mose, kix tiblah kawn deuh tom hoek plak ponngawb mai lih mawh graik mai sioe cux. Mose song rhawm ka kix.

²¹Kix khrawm an ku ngawb, son pui ku kaux, son pa kub ih kaux mawx kaux an, yam hoik hax koek an lih mawh rawm.

²²Yam hoek singaix liah, kix khrawm blah ra son, tix kaux pui ra Awmie, cao kwang cub pui hun Isarelax hoek ti krai ka Mose,

²³Nawh ah nin ka kix, “In mawh pa hoik tawm Siyiex, pasax mawh singaix twah mai mawh singaix laux mai singaix pa singax singeh ka Siyiex, nghaong ti deuh awm pa sang nghaong pex mai braong ti deuh awm pa sang braong pex son singaix twah, deuh pa kawn deuk ka son pex tom hoek ponngawb.”

²⁴Kix deuh an tom hoek plak ponngawb, awm lox ah Mose, mai an ang lai sioe mai ang koe graik,

²⁵Mose ah nin, “Ih pa deuk in daux singaix, mawh kheu mawh singaix twah cie Siyiex, in singaix maix tak ang yaox ceu in daux kaung,

²⁶“Pex tak khrawm nawh daux liah singaix, viang mawh nan, ka daux singaix aliah, mawh singaix twah, tak ang lai koe mai ang lai yaox.”

²⁷Pui tiblah lih hu ka daux singaix aliah, sonsang khrawm tix kah, kix ang yaox tix ceu kawx.

²⁸Siyiex leeing ju ah nin ka Mose, “Pex kawn sang thiang ka lox tawm pingnyap Aux mai lox tat jhawm prawng Aux miex grheung lie?

²⁹Jhak heue, Siyiex tawx singaix twah ka pex, yam hoek liah singaix Nawh Cao tawx blah son ra ngaix, kieh pui ku kaux ot dee ot tix, paw kieh pui lih hu khaing dee ot tix, tix kaux kawx, ka daux singaix aliah.

³⁰Mawh kheu nan, pui khankix laux lee tix daux singaix aliah.

³¹Nyiex ma pui Isarelax khankix, kok ceu kaux blah an mawh mannax, an paing awm simie taux ki, awm jhawm blah klu klao tix mai rawm hia.

³²Mose ah nin, “In mawh lox tawm Siyiex, teei ti deuh mannax tix Awmie, sonsang deuh pex son ru ti yaox tix ju hoik tix ju mai kix tak yaox blah pa eei Aux pex ka daux tiag, yam viex Aux pex lih khaing haktiex Ejiptux”

³³Mose ah nin ka Arun, “Teei ang tix mu mai sau blah mannax an tix Awmie daux an mai deuh sivoe Siyiex, sonsang priex pex an daux ru tix, tix ju hoik tix ju.”

³⁴Awm gumlox pa hoik tawx Siyiex ka Mose, Arun deuh an sivoe khui kham sakse mai priex ka.

³⁵Pui Isarelax khankix, hoik ih mannax tixpon num, tom hoek kix ka haktiex dee ot tix mai kix ih mannax tom hoek tix ka mee haktiex Khanan.

³⁶tix Awmie koe kao son tix son Epha heue.