Read kinyarwanda SIDIEX 1 Bible Online

SIDIEX 1 - kinyarwanda bible

SIDIEX 1

¹Lox bwan kawn simex Davit pa mawh simiang veng Yerusaliem,

²Lox bwan ah nin, “Pa giex going khaing, pa giex going khaing,” “Can kuceu khawmuik mawh pa giex going heue.”

³Ka daux pa sau kawn pui riang rao ti yuh kaing greem singaix koe bwanson ka ceu patix lie?

⁴Baux ju pui hoik luan hu tix ju mai baux ju pui tak sang baox deeh hoek tix ju, viang mawh nan, haktiex kaux cong leeing ju heue.

⁵Singaix lih mai singaix deeh klip mai deeh to tix hoek ka dee hoik lih tix heue.

⁶Bhaung pa phlu hu plak seh mai deeh veeh tix ing ka plak laong, bhaung pa phlu hu jheung jheung mai baox deeh viex hoek khaix dee hoik phlu tix heue.

⁷Rawm klawng khankix hu laig daux rawm sigrit sigra, viang mawh nan rawm sigrit sigra ang chix naog, khaing dee kaoh rawm klawng khankix mai deeh baox viex tix ing tan heue.

⁸Kuceu khawmuik mawh pa ang lai dak uik krai ka grawng pa taug mao yuh kawn pui heue. Ngai kawx ang chix fah ka pa yaox tix mai yhaok kawx ang chix sak ka pa mhong tix heue.

⁹Pa hoik koe tak ang awm ceu pa sang baox koe, ceu pa hoik yuh yam in tak awm ceu pa tak sang yuh mai ceu pa khraox ang lai koe pie tix ceu kawx greem singaix heue.

¹⁰Mawh kawn sang koe pa krai tix ceuceu lie? “Jhak heue, in mawh pa khraox,” ceu an hoik dawg mawh pa koe ka sivoe ex heue.

¹¹Ang koe ceu pa doh keud glang ka an mai tak ang koe krax doh keud ka ceu an khankix, ka can pui pa tak sang hoek khaix an heue.

¹²Aux pa sidiex lox bwan, yam mawh tix simiang piang ceu pui Isarelax ka daux veng Yerusaliem heue.

¹³Aux hoik koe rhawm sonsang sawg grawng pa dex dawd ka ceu an khawmuik pa koe greem raoma ka cuyi pingnya tix heue. Krax pa kha rhawm in, mawh pa hoik tawx Siyiex sonsang yuh kawn pui ka heue.

¹⁴Aux hoik yaox kaing jhaw can pa hoik yuh tix khankix greem singaix khawmuik mai ceu an khankix hoik mawh pa giex going mai ceu pa ih ka bhaung khaing heue.

¹⁵Ceu pa kawk tak ang pon yuh rah mai ceu pa cud cha tak ang pon simin ka heue.

¹⁶Aux hoik keud mai hoik ah nin daux rhawm tix, “Jhak heue, aux hoik mawh pui pa kied ting lhaong mai hoik lheu koe pingnga cuyi khaing pui khawmuik, pa koe sivoe aux ka veng Yerusaliem heue. Rhawm aux hoik kied koe krax tawng yung ka daux pingnya cuyi pa kied ting lhaong heue.”

¹⁷Aux hoik koe rhawm sonsang tawng ka pingnya cuyi mai sonsang tawng ka grawng pa yhot pa vaw khankix heue. Aux hoik tawng ceu in khankix mawh pa ih ka bhaung heue.

¹⁸Mawh kheu pa nie koe pingnya cuyi mawh pa nie koe krax laux rhawm mai kaw pa nie baox ka krax tawng yung nie baox krax pa laux rhawm heue.