Read kinyarwanda SIDIEX 10 Bible Online

SIDIEX 10 - kinyarwanda bible

SIDIEX 10

¹Roi yum khankix chix kieh rawm bee pa sioe bhawng cux si um heue. Awm an ceu pa caox ceeix khaing kieh pui koe pingnya pa nab yam pui ka laux min plakngai heue.

²Rhawm pui koe pingnya cuyi, koe ka taix khawn dawm nawh, viang mawh nan rhawm pui pa vao pa caox an, koe ka taix khawn gwiex heue.

³Yam hu pui vao pui caox krax, nawh yie piawm rhawm tix mai jhi mawh tix pui vao pui caox ka pui ku kaux heue.

⁴Phan pui kwang maix lih tix song rhawm piang maix, paw gah tix hu khaing dee ot maix, grawh grawng nawh krax pa gun yeung chix kieh krax lud ting yiien ka heue.

⁵Koe pa caox caig tix ceu pa hoik yaox aux greem singaix, mawh krax lud pa kaoh khaing cao pa kwang heue.

⁶Pui vao pui caox ngawm ka dee pa lhaong mai pui magmi ngawm ka dee pa tiiem heue.

⁷Aux hoik yaox ka brug siliex khankix brung mai yaox hu simiang khankix ka caong tix piang tiex awm siliex heue.

⁸Pui pa kaong daux o tak dee cod ka daux an mai pui pa yieh ka vie lawng siuing tak sang tut ka nawh heue.

⁹Pui pa gah ka simaox khankix, simaox tak dheem ka nawh mai pui pa lug khix, tak deeh mat ka an heue.

¹⁰Phan moe beem mai ang deeh klaing lawm, tak nie lheu yaox ti sau riang tix heue. Viang mawh nan pingnya mawh pa tawx bwanson ka pex heue.

¹¹Phan siuing hoik tut cao simeed sivoe, cao simeed ang lai koe bwanson tidtix,

¹²gumlox pa kaoh khaing daux jheeh pui koe pingnya, mawh pa koe min pa mhawm, viang mawh nan jheeh pui vao pui caox tak bleet nawh heue.

¹³Lox pa jah nawh tix sikah mawh pa vao pa caox mai deeh sidah lox pa krai nawh mawh lox caox caig pa yhot vaw heue.

¹⁴Pui pa vao pa caox kied nie lox sikah, pui tix kaux kawx ang tawng ka ceu pa sang lih tix mawh, mawh pui mawx pa pon krai nawh mhong ceu pa tak sang lih ti mawh khaix nawh lie?

¹⁵Kaing pa yuh pui vao pui caox khankix, tawx krax pa taug mao ka kix heue. Mawh kheu awm kix pui pa ang tawng ka krax pa sang hu tix ka veng heue.

¹⁶Pa mawh meung haktiex pa kwang simiang pa awn ju mai simiang cao kaing cao maix khankix pa kaoh ih nyaux ngie priex ponngawb caocao khankix eue, pex tak hoek krax laux leeing heue.

¹⁷Pa mawh meung haktiex pa kwang simiang mai simiang cao kaing maix khankix pa ang chax nie luan ih luan nyaux pa ih nyaux mai pa khaw bawg yam khankix eue, kieh bwanson koe piang pex heue.

¹⁸Kheu jao pa kied nieh, braux nyiex tak rham mai taix pa nieh cox braux nyiex, nyiex tak roik heue.

¹⁹Pawie mawh pa yuh tix son pa gaux rhawm mai rawm plix siiet mawh pa yuh tix sonsang nyawm rhawm, viang mawh nan mau mawh pa pex ka kuceu heue.

²⁰Pie ka daux rhawm keud maix kawx paw doh jhax lawg ka simiang, pie ka daux lawg it maix kawx paw doh jhax lawg ka cao mi, mawh kheu sim pa pu daux raoma tak viex lox maix hu mai sim pa pu an tak krai grawh grawng an heue.