Read kinyarwanda SIDIEX 11 Bible Online

SIDIEX 11 - kinyarwanda bible

SIDIEX 11

¹Taing pa ih maix piang rawm, grawh grawng nawh ang lai rheung mai tak deeh yaox an khankix tom nie heue.

²Gwieh tix tawx nyum ka pui aliah kaux mai baox tawx ka pui daix kaux, mawh kheu ang maix tawng ka ceu pa caox pa tak sang lih ti koe piang haktiex heue.

³Phan paiawm khankix naog ka rawm lhiex mai lhiex lih piang haktiex mai phan gaw khaox goh ka plak seh ang ah, ka plak laong ang ah, ka gaw khaox an, tak noi tix ot ka dee goh tix tan heue.

⁴Pui pa chix tawng grawng bhaung, ang ruat simie mai pui pa chix keud chix sawn ti yaox ka paiawm khankix, ang lai vawg nghox heue.

⁵Awm ang maix tawng ka hu khwan mai ang tawng ka haok khwan si-ang kawnngie ka daux vaig bun nghe, mawh kheu nan maix kawx ang tawng ka kaing yuh Siyiex kuceu khawmuik heue.

⁶Ruat simie plak ponngawb mai plak ponbo kawx paw doh yoi ka taix maix, grawh grawng nawh maix ang tawng ka pa yuh ka mawx pa sang koe bwanson mai pa ang koe bwanson, mawh kheu in khawm ra ceu mawh pa mhawm awm paox tix heue.

⁷Pa riang mawh pa tie tete mai yam yaox ngai ka pa riang singaix kied gaux rhawm ka heue.

⁸Viang mawh nan phan pui lang ju tom rheung num mai koe krax gaux rhawm ka daux ceu an khawmuik, viang mawh nan kieh nawh deeh doh keud ka baux singaix pa faik an khankix mawh kheu singaix an mawh pa kied rheung heue. Can pa tak sang lih ti mawh khawmuik, mawh pa giex going heue.

⁹Pui awn ju eue, gaux rhawm yam kawn awn ju maix mai kieh rhawm maix koe krax nyawm rhwm baux yam kawn awn ju maix, hawt hu ka daux krax pa koe rhawm maix mai ka daux pa yaox maix ka ngai tix khankix heue. Viang mawh nan tawng ka mawh kaing ceu an khankix pa sang viex Siyiex tix prawng ca ka maix heue.

¹⁰Mawh kheu nan teei ti tik krax laux rhawm khaing daux rhawm maix mai teei ti tik pa caox khankix khaing daux tokaux maix heue. Mawh kheu baux yam mawh maix kawn nyawm mai baux yam awm ju maix khankix mawh pa giex going heue.