Read kinyarwanda SIDIEX 12 Bible Online

SIDIEX 12 - kinyarwanda bible

SIDIEX 12

¹Doh keud ka cao pa phan pa deuh maix ka daux baux singaix yam kawn awn ju maix, sivoe sang hoek singaix pa caox caig khankix mai num khankix hoit greed tix dex yam sang ah maix nin, “Aux ang lai koe krax nyawm rhawm ka daux ceu an heue.

²Sivoe ang singaix, mai pa riang khix mai simuing khankix nyang bax faik mai paiawm nyang bax ceep khaix lhiex,

³ka dau singaix cao pau nyiex khankix hoik sikua mai pui pa ting riang rao khankix hoik die riang awn riang, cao krid mhaw khankix, hoik naox kaing yuh tix kheu hoik tux pui mai pui pa sigaig khaing daux siviex iak khankix pa riang tak faik ka kix,

⁴yam hoik yiien lox krid mhaw siviex dex krax khankix hoik yeep tix singip mai nawh kaoh caocao kheu mhong ti lox sim mai lox rhax kawn nyawm bun khankix yiien hu,

⁵kix lhat ka dee pa lhaong mai ceu pa yaoh yee koe ka daux krax daux laux, yam pruh tai khaox Batan, sido hoik cien ka tokaux tix mai rhawm pa simiex nawh tak dieh hu heue. Mawh kheu kawn pui tak kawn hu ka nyiex leeing ju tix mai pui pa yiiem yo khankix tak hu hoek ka hawt krax heue.

⁶Doh keud ka Cao pa phan pa deuh maix sivoe ang maox mau nyang dud, phan ang mawh nan sivoe max klong khri, phan ang mawh nan sivoe max singiien rawm ka daux dee lih rawm keut, phan ang mawh nan sivoe graig jaong ling hawt rawm dung heue.

⁷Khaix an phawng tiex tak sang deeh ing ka tiex ka dee hoik kaoh tix mai khwan tak sang deeh ing ka Siyiex, Cao pa tawx nawh heue.

⁸Lai lox bwan ah nin, “Pa giex going khaing pa giex going, kuceu khawmuik mawh pa giex going heue.”

⁹Lheu khaing an kheu hoik koe pingnya cuyi cao sidiex lox bwan, nawh ca kawn gau krax tawng yung ka pui khankix, nawh sawg mai tiag ti yaox ka gumlox kab khankix tom nie glawk mawx glawk an heue.

¹⁰Cao sidiex lox bwan hoik sawg ti yaox gumlox pa nyawm tix nghiet mai tiem ti deuh gumlox pa rahsee mai pa mawh meh khankix heue.

¹¹Gumlox sikah pui koe pingnya cuyi khankix awm khaox lawm mai gumlox sikah cao pa gau khankix awm gawng rhiem pa hoik tawk tix laig mhawm mhawm, pa kaoh khaing cao liang yung pa ting heue.

¹²Lheu khaing an kawn simex aux eue, rieb ti teei ka gumlox sidiex gau in khankix liak, phan yuh ka phuk lai tom nie kawx, mawh pa ang chix sidah sidu mai pa sawg tix gau lai khankix tom nie mawh pa tawx krax taug mao ka nex nham heue.

¹³Gumlox ghoik mawh yuh nin; lhat graung ka Siyiex mai priex tix hawt ka gumlox tawm pingnyap Nawh Cao khankix, mawh kheu in mawh beeh glawm kawn pui khawmuik heue.

¹⁴Mawh kheu Siyiex tak cied ka kaing kuceu mai rom tix prawng ca tau khawm ceu pa hoik mox tix khankix, viang mawh pa mhawm ang ah mawh pa caox ang ah heue.