Read kinyarwanda SIDIEX 2 Bible Online

SIDIEX 2 - kinyarwanda bible

SIDIEX 2

¹Aux hoik ah nin ka daux rhawm tix, “Hoek yam in, aux sang cheuk cheu ti yaox maix ka krax pa gaux rhawm; mawh kheu nan kieh koe krax gaux rhawm ka daux pa nyawm rhawm, viang mawh nan in kawx baox mawh ceu pa giex going heue.

²Aux hoik ah nin ka daux pa nyiah tix, “An mawh pa yhot,” “Ceu pa gaux rhawm an tak sang mawh pa koe bwanson ka ceu patix lie?

³Aux hoik keud ti yaox ka daux rhawm nex nham tix pa hoik hawt khaix alo rawm plix siiet, yam kawn naog pingnya cuyi daux rhawm aux mai sonsang deuh aux rhawm tix piang pa vao pa caox, tom hoek yam yaox aux ka can ceu pa mhawm son kawn pui khankix mai pa khaw kawn pui ti yuh ka greem raoma tom sidah ju tix khawmuik heue.

⁴Aux hoik yuh kaing jhaw pa ting lhaong mai aux sum nyiex tix mai hoik sum sipeem plix siiet tix heue.

⁵Aux hoik cox khre sipeem plix kuceu mai sum khaox plix kuceu pa chix plix khankix.

⁶Aux hoik tang yuh rawm dung son cao tix sonsang lhauk rawm ka khaox pa sum tix khankix heue.

⁷Aux hoik khrawm tix cie siliex simex siliex bun khankix mai hoik koe siliex pa hoik keh hoik kung ka daux nyiex aux heue. Aux hoik nie lheu koe sinngao tobrie mai cub yung khankix lheu nie khaing pui pa hoik ot ka daux veng Yerusaliem sivoe aux khawmuik heue.

⁸Aux hoik kraix khrawm tix cie mau khri mai sinngao can ceu pa dex dawd mai simiang mai can ceu pa lih khaing haktiex an khawmuik son tix heue. Aux hoik khrawm tix cie cub simex mai bun pa chix rhax lai khankix mai pa jiet chix kieh kawn pui gaux rhawm gaux rhi ka, pa mawh bun tom nie heue.

⁹Mawh kheu nan aux hoik lih ti mawh pui ting lhaong mai hoik nie lheu mhawm khaing pui pa koe sivoe aux khawmuik ka veng Yerusaliem heue. Pingnya cuyi aux kawx, hoik kaux cong tau mai aux heue.

¹⁰Can ceu pa ghoing ngai aux tix sang pon khankix aux ang thiang khaing ceu an heue. Aux ang pon giex rhawm khaing pa nyawm rhawm tix ceu kawx heue. Grawh grawng nawh rhawm aux hoik koe krax gaux rhawm ka daux kaing jhaw pa yuh tix khawmuik mai in mawh bwanson khaing riang rao pa yuh aux khawmuik heue.

¹¹Khaix an aux deeh simi ti yaox ka kaing jhaw pa hoik yuh ka taix tix khawmuik mai kaing jhaw pa sau aux riang rao tix yuh khankix mai hoik mawh ceu pa giex going khawmuik mai mawh pa ih ka bhaung khaing heue. Ang lai mawh pa koe bwanson pie tix ceu kawx ka greem singaix heue.

¹²Khaix an aux deeh veeh tix sonsang keud ti yaox ka pingnya cuyi mai grawng pa yhot pa vaw khankix heue. Grawh grawng nawh pui pa plud ti hoek khaix simiang sang pon yuh ceu patix lie? Mawh ngie pon yuh nawh can pa hoik sax yuh tix heue.

¹³Khaix an aux hoik yaox ka kied mhawm pingnya cuyi khaing pa kwa vao, awm kied mhawm pa riang khaing pa faik heue.

¹⁴Ngai pui koe pingnya cuyi khankix koe ka daux dong kix, viang mawh nan pui kwa pui caox khankix lailing ka daux pa faik heue. Viang yuh nan kawx tokaux aux hoik grux tawng grux yaox ka can pa lih ti mawh awm paox tix piang kix tan heue.

¹⁵Mawh kheu nan aux ah nin ka daux rhawm tix, “Awm hoik lih mawh ceu an piang pui kwa pui caox, an kawx, baox lih ti mawh piang aux mai aux sang nie baox koe pingnya cuyi khaing nawh yuh ka mawh lie? “Khaix an aux deeh ah nin ka daux rhawm tix; “In kawx mawh pa giex going khaing heue.”

¹⁶Grawh grawng nawh awm ang pui koe pingnya cuyi lai koe krax doh keud leeing ju, pui kwa pui caox kawx awm an, can pa koe daux yam in tak sang mawh pa piawm tix ka daux bawg yam pa sang hoek heue. Awm yum pui pa koe pingnya cuyi an pui kwa pui caox kawx tak yum heue.

¹⁷Mawh kheu nan aux hoik mee ka krax pa im ju tix, kheu jao pa hoik kha aux rhawm ka grawng kaing jhaw pa yuh tix ka greem singaix heue. Mawh kheu ceu an khankix mawh pa giex going mai pa ih ka bhaung khaing heue.

¹⁸Aux hoik mee ka kaing jhaw pa hoik sau aux riang rao ti yuh ka greem singaix kuceu heue. Mawh kheu sang yaox aux ti prah an ka pui pa tak sang hoek khaix aux,

¹⁹Mai mawh pui mawx pa tawng ka mawh nawh pui koe pingnya cuyi, phan ang mawh nan pui kwa pui caox lie? Viang mawh nan nawh tak sang kwang ka piang kaing jhaw pa hoik sau aux riang rao ti yuh mai pingnya cuyi pa hoik plak jhi aux ka greem singaix heue. In kawx mawh pa giex going heue.

²⁰Mawh kheu nan aux hoik laux rhawm ka kaing jhaw pa sau aux riang rao ti yuh khawmuik ka greem singaix heue.

²¹Grawh grawng nawh viang pui tix kaux yuh kaing jhaw tau mai pa koe pingnya cuyi mai krax tawng yung mai pa min tix kawx, nawh tak sang yaox ti prah sinngao tix ka pui, pa ang yaox ti sau riang rao ti yuh heue. In kawx mawh pa giex going mai ceu pa kied ting caox caig tix ceu heue.

²²Grawh grawng nawh pui pa sau riang rao ti yuh kaing jhaw mai pa kied koe rhawm ti yuh greem singaix kawx, sang koe bwanson ka ceu patix lie?

²³Mawh kheu singaix sawm nawh khankix mawh krax pa laux rhawm mai kaing jhaw yuh nawh kawx mawh ceu pa voi rhawm, yam ponsawm kawx nawh ang yaox tix laux lee rhawm tix heue. In kawx mawh pa giex going heue.

²⁴Ang lai koe ceu pa lheu mhawm son kawn pui tix ceu kawx, lheu khaing pa ih pa nyaux mai rhawm nawh tak koe krax gaux rhawm ka daux riang rao kaing jhaw pa yuh tix heue. Aux hoik yaox mawh ceu in pa kaoh khaing taix Siyiex heue.

²⁵Mawh kheu phan ang mawh daux Nawh Cao, mawh pui mawx pa sang yaox ti ih mai mawh pui mawx pa pon tix koe pa nyawm rhawm lie?

²⁶Grawh grawng nawh Siyiex tawx pingnya cuyi mai krax tawng yung mai krax gaux rhawm ka pui pa mhawm ka plak sivoe Nawh Cao, viang mawh nan, ka pui pa koe phimap, Nawh Cao kieh kix yuh kaing mai khrawm sinngao sonsang tawx nawh ka pui mhawm ka plak sivoe ngai Siyiex heue. In kawx mawh pa giex going mai mawh pa ih ka bhaung khaing heue.