Read kinyarwanda SIDIEX 3 Bible Online

SIDIEX 3 - kinyarwanda bible

SIDIEX 3

¹Praix klawng kuceu tak koe baux yam cie tix, bawg yam tang koe son krax keud gau ti yuh kuceu greem raoma,

²koe bawg yam keh mai koe bawg yam yum, koe bawg yam sum mai koe bawg yam reeig ka pa sum tix,

³koe bawg yam pah mai koe bawg yam deeh pai moi, koe bawg yam yieh laux mai koe bawg yam pa deeh sum,

⁴koe bawg yam yiiem mai koe bawg yam nyiah, koe bawg yam khi rhawm mai koe bawg yam graoh,

⁵koe bawg yam prung prang simaox mai koe bawg yam deeh khrawm ka simaox khankix, koe bawg yam kawm ngheet paox tix mai koe bawg yam gwieh paox tix,

⁶koe bawg yam sawg mai koe bawg yam grai, koe bawg yam priex deuh mai koe bawg yam luan,

⁷koe bawg yam riah ti tik mai koe bawg yam deeh caing, koe bawg yam yiien yawg mai koe bawg yam sang sikah,

⁸koe bawg yam moh mai koe bawg yam koeng, koe bawg yam puing naing mai koe bawg yam pa nhim heue.

⁹Pui pa sau riang rao ti yuh kaing khankix sang koe bwanson ceu patix lie?

¹⁰Aux hoik yaox ka kaing jhaw pa tawx Siyiex ti deuh sonsang yuh kawn pui khankix ka daux pa taug mao tix heue.

¹¹Nawh Cao hoik yuh kuceu mhawm grang ka daux bawg yam cie tix heue. Nawh Cao hoik sau ti deuh baux bawg yam leeing ju daux rhawm kawn pui, viang mawh nan kawn pui ang chix pon cied ti yaox ka kaing jhaw pa yuh Siyiex tom jah mai tom sidah heue.

¹²Aux tawng ka ang ceu pa mhawm lai koe tix ceu kawx ka son kix lheu khaing krax gaux rhawm mai sonsang yuh ceu pa mhawm ka daux pa im ju kix,

¹³mai pui ku kaux tak sang ih mai nyaux mai gaux rhawm ka daux kaing jhaw riang rao pa yuh tix khawmuik, in mawh totaix pa tawx Siyiex heue.

¹⁴Aux tawng can ceu pa yuh Siyiex, mawh pa koe leeing ju heue. Ang laix pon tix baox piang an mai ang lai pon tix tieh khaing an heue. Siyiex yuh in khankix, sonsang lhat graung kawn pui ka plak sivoe Nawh Cao heue.

¹⁵Can pa hoik dawg lih ti koe mai awm can pa koe yam in mai can pa sang lih ti koe, hoik awm pa dawg lih ti koe mai Siyiex deeh mhaing grawh grawng ceu pa hoik luan khankix heue.

¹⁶Lheu khaing an ka greem singaix aux hoik yaox ka koe dee prawng see pa caox caig tan mai ka dah dee koe pa rahsee, pa caox caig kawx koe tan heue.

¹⁷Aux ah nin ka daux rhawm tix, “Siyiex tak sang prawng ca pui pa rahsee mai pui pa caox caig, grawh grawng nawh bawg yam tak koe sonsang cied ka krax keud krax gau kuceu mai son kaing jhaw kuceu heue.”

¹⁸Aux hoik ah nin ka daux rhawm tix, “Son grawng dah dee ot kawn pui khankix, Siyiex cheu ti yaox kix mai sonsang tawng kix tokaux tix mawh pa awm totiag khankix heue.”

¹⁹Grawh grawng nawh can ceu pa lih ti koe ka kawn pui khankix, tak sang mawh pa lih ti koe piang totiag mai tix ceu tak lih hoek piang kix, awm yum tix ceu, an tang ceu kawx tak yum heue. Mawh kheu kix khawmuik sileed bhawm awm paox tix, kawn pui ang koe ceu pa blon mhawm khaing totiag, mawh kheu mawh ceu an khankix pa giex going khawmuik heue.

²⁰Kuceu khawmuik hu ka dah dee tix mu khaing, kuceu khawmuik kaoh khaing phawng tiex mai deeh ing ka phawng tiex heue.

²¹Mawh pui mawx pa chix gwieh ti tawng ka khwan ju kawn pui khankix pa haok ka dee lhaong mai khwan ju totiag khankix, pa lih hu ka greem haktiex lie?

²²Mawh kheu nan aux hoik tawng ka ang tix ceu kawx lai mawh pa nie lheu mhawm khaing pa gaux rhawm pui ka daux kaing jhaw yuh tix, kheu mawh an nyum son nawh heue. Mawh pui mawx pa sang pon viex nawh yaox ka ceu pa tak sang lih ti mawh khaix nawh lie?