Read kinyarwanda SIDIEX 4 Bible Online

SIDIEX 4 - kinyarwanda bible

SIDIEX 4

¹Khaix an aux deeh keud ti yaox krax pa tuktiak, pa hoik yuh tix greem singaix khawmuik mai jhak ka rawm ngai can pui pa yaox ti kham geu krax tuktiak, mai ang koe pui pa pon tawx krax nyawm rhawm ka kix tix kaux kawx heue. Mawh kheu can pui pa tuktiak khankix koe sibrawm, pui pa pon tawx krax nyawm rhawm ka kix ang koe tix kaux kawx heue.

²Mai aux hoik keud ti yaox nie lheu koe bwanson khaing pui pa hoik dawg yum khaing pui pa kawn im ju heue.

³Viang mawh nan pa nie lheu mhawm khaing an kiex khawm ra, mawh pa ang sax lih ti koe mai pui pa ang sax yaox kaing ceu pa caox caig, pa hoik yuh tix khankix greem singaix heue.

⁴Khaix an aux hoik yaox pui pa sau riang rao ti yuh kaing mai pa min ka kaing kuceu, mawh pa kieh paox plawg paox nyhawm tix khankix khoi rhawm ka jao an heue. In kawx mawh pa giex going mai pa ih ka bhaung khaing heue.

⁵Pui kwa pui vao bhok taix tix mai ih ka nex tix heue.

⁶Krax yiien yawg pa koe tix jhawp an, mawh pa nie lheu mhawm khaing taix pa naog khawm ra jhawp, tau mai pa taug mao mai pa ih ka bhaung khaing heue.

⁷Khaix an aux deeh keud rhawm tix mai aux hoik yaox ka ceu pa giex going greem singaix,

⁸koe pui pa ot nong nong, ang koe paox pie, nawh ang koe kawn praix mai ang koe puxaik. Viang mawh nan nawh yuh kaing ang koe dee sidah sidu mai ngai nawh ang chix fah tau mai krax pa magmi tix heue. Viang yuh nan nawh ang sax chawk yuh nin, Aux sau riang rao ti yuh ceu in khankix mai kha rhawm tix mawh son pui mawx lie? In kawx mawh pa giex going mai ceu pa taug pa mao khaing heue.

⁹Pui ra kaux mawh pa nie lheu mhawm khaing pui tix kaux, grawh grawng nawh kiex hoik pon bwanson ceu pa mhawm khaing daux kaing jhaw riang rao yuh tix heue.

¹⁰Grawh grawng nawh phan tix kaux goh, an tix kaux tak deeh yaog nawh kaoh heue. Viang mawh nan krax laux rhawm hoek piang pui goh an nong nong, mawh kheu ang pui pa sang yaog nawh koe heue.

¹¹Khaix an phan pui ra kaux noi tix it tau, kiex tak sang si u, viang mawh nan phan mawh pui tix kaux khaing tak sang si u yuh ka mawx lie?

¹²Viang pui tix kaux hoik pex ka sibrawm pui tang kaux kawx, pui an ra kaux tak pon tiebtie nawh heue. Maox brawm loe nyaing ang pon dud yie heue.

¹³Kawn nyawm pui hot pa awn ju pa koe pingnya cuyi an tix kaux, nie lheu mhawm khaing simiang riex ju pa koe rhawm kwa rhawm vao an tix kaux pa ang lai pon sidiex gau ka nawh tix bawg kawx heue.

¹⁴Grawh grawng nawh, nawh chix mawh simiang khaing pa lih tix daux thawng, viang nawh hoik mawh pa keh ka daux krax pa hot shia daux meung haktiex tix kawx heue.

¹⁵Aux hoik yaox krax im ju pui khawmuik pa lih ti mawh greem singaix heue. Kawn nyawm awn ju pa ot glawk ra an, chix pon plud tix ot ka dah dee ot nawh heue.

¹⁶Pui haktiex pa ot greem pa kwang simiang an, ang lai dak uik simin ka, viang mawh nan can pui pa plud tix hoek khaix nawh khankix, ang lai koe krax fah rhawm ka daux nawh heue. In kawx mawh pa giex going tete mai mawh pa ih ka bhaung khaing heue.