Read kinyarwanda SIDIEX 5 Bible Online

SIDIEX 5 - kinyarwanda bible

SIDIEX 5

¹Yuh satix ka diang caong hu tix khankix, yam hu maix ka nyiex bwan Siyiex, pa greed tix dex sonsang nghiet ka lox Siyiex, lheu mhawm khaing sonsang tawx pui vao pui caox krax tan pa appong tix khankix heue. Grawh grawng nawh kix ang tawng ka yuh tix pa caox heue.

²Yuh satix mai priex jheeh tix mai paw kieh rhawm maix luan phai sikah tix ceu kawx ka plak sivoe Siyiex. Mawh kheu Siyiex ot ka daux meung raoma mai maix ot piang haktiex heue. Mawh kheu nan paw kieh lox maix haoh heue.

³Awm kied haoh hun kaing yuh lih ti mawh camaox, mai tawng ka pui vao pui caox, kheu pa mhong haoh lox sikah nawh heue.

⁴Yam yuh maix sijax mukheu ka Siyiex, paw lai greed bawg yam sang yuh tix an, mawh kheu Nawh Cao ang khaw rhawm ka daux pa yuh pa vao pa caox heue. Tawx awm ceu pa hoik yuh maix sijax mukheu heue.

⁵Phan ang yuh sijax mukheu nie mhawm khaing yuh maix sijax mukheu mai ang tie hawt ti yuh heue.

⁶Paw kieh jheeh maix viex maix hoek ka daux phimap mai paw lai kieh maix yaox tix ah ka plak sivoe kawncau pa ting Siyiex aux hoik lud loe tix heue. Siyiex tak song rhawm ka lox khyox khaw maix mai yuh laux ka kaing jhaw pa yuh maix ka taix tix khankix kheu jao patix lie?

⁷Mawh kheu ka daux krax pa kied nie camaox mai ka daux lox sikah haoh hun khankix kawx, mawh ceu pa giex going heue. Mawh kheu nan kieh maix koe krax pa lhat graung ka Siyiex heue.

⁸Phan maix yaox ka pui hot shia yaox ka krax tuktiak mai prawng ca ka kix ka daux pa ang rahsee daux haktiex tix dahdah, paw vi daox deng ka grawh grawng ankix awx. Mawh kheu awm jhak simiang ting piang paox tix, tix kaux lai tix kaux mai simiang pa nie lheu ting lhaong khankix koe ka piang kix heue.

⁹Lheu khaing an bwanson pa kaoh khaing haktiex mawh son kuceu khawmuik; tokaux simiang kawx mawh pa pon bwanson khaing daux kaung heue.

¹⁰Pui pa moh ka mau, tak ang chix koe krax fah rhawm tau mai mau mai pui pa moh ka sinngao, tak ang chix koe krax fah rhawm tau mai krax pa haok hwan sinngao tix heue. In kawx mawh pa giex going heue.

¹¹Yam haok hwan kraung khrai, pui pa sang ih kawx haok hwan heue. Mawh kheu nan cao kraung khrai sang koe bwanson ceu patix lheu khaing yaox kix ka ngai tix lie?

¹²Pui pa yuh kaing, jiet nyawm laig it, viang nawh ih ceeix ang ah ih tom nie ang ah, viang mawh nan pui pa kied mag kied mi, krax magmi an, ang chix kieh nawh nyawm it heue.

¹³Aux hoik yaox krax caox pa kied kin, ka greem singaix, krax magmi pa hoik khrawm kix ti deuh, deeh mawh pa krix cao kix kah,

¹⁴mai can sinngao an khankix grai grup ka daux krax pa ang mhawm, yam pon nawh kawn simex tix kawx, ang lai koe tidtix ka daux taix nawh heue.

¹⁵Awm lih hoek kakaong nawh khaing daux vaig miex tix nawh tak deeh ing awm an mai nawh ang pon teei ti viex tix ceu kawx khaing riang rao pa hoik yuh nawh ka taix tix heue.

¹⁶In kawx mawh krax caox pa kied kin, awm hoik lih hoek nawh yuh ka mawx nawh tak sang yaox ti hu awm an heue. Nawh sang koe bwanson ka ceu patix, ka pa sau nawh riang rao ti yuh kaing son bhaung,

¹⁷mai nawh nai singaix sawm daux pa ih nyaux tix ka daux pa faik mai nawh koe krax laux rhawm mai krax saux krax ngia mai krax pa song rhawm tom nie heue.

¹⁸Jhak heue, in mawh pa hoik yaox aux, an mawh ceu pa mhawm mai pa khaw caw ka son pui pa sang ih sang nyaux mai sonsang koe krax nyawm rhawm daux kaing jhaw pa mhawm yuh nawh khawmuik, ka daux pa sau nawh riang rao tix greem singaix, daux baux singaix ju nawh khankix, ka pa tawx Siyiex ka nawh heue. Mawh kheu an mawh nyum cie nawh heue.

¹⁹Awm hoik tawx Siyiex krax magmi mai krax koe kraung khrai sinngao son pui ku kaux mai hoik tawx sibrawm ka nawh sonsang ih khaing an mai rieb mawh nyum cie tix mai koe krax gaux rhawm ka daux riang rao kaing jhaw yuh nawh, in mawh bwanson totaix pa tawx Siyiex heue.

²⁰Mawh kheu nawh tak ang yaox ti keud ka daux baux singaix im ju nawh khankix heue. Grawh grawng nawh Siyiex kieh nawh nyawm rhawm ka daux rhawm tix tau mai yuh tix kaing tom nie heue.