Read kinyarwanda SIDIEX 6 Bible Online

SIDIEX 6 - kinyarwanda bible

SIDIEX 6

¹Aux hoik yaox ka koe ceu pa caox ka greem singaix mai an mawh pa kied cien ka piang kawn pui khankix,

²pui tix kaux Siyiex hoik tawx krax magmi mai kraung khrai mai min plakngai khankix, son ang nawh lai koe krax cud krax cha pie tix ceu kawx son tokaux tix ka can pa simie rhawm nawh khawmuik; viang mawh nan Siyiex ang tawx sibrawm sonsang ih nawh ka an, viang mawh nan pui tang praix klawng tix kaux tak teei ti ih heue. In mawh pa giex going mai mawh pa kied caox caig heue.

³Phan pui tix kaux koe kawn praix tix yieh kaux mai yaox ti ot tom reung num, bawg yam singaix tix kawx, viang mawh nan rhawm nawh ang nyang fah ka ceu pa mhawm koe tix heue. Yum ka daux pa ang yaox ti sipaung heue. Aux ah nin, kawn nyawm pa lawt an tix kaux kawn nie lheu mhawm khaing nawh heue.

⁴Mawh kheu nawh lih bleeh ka daux pa giex going mai lih hu ka daux pa faik mai ceu kaux nawh mawh pa hoik kheem tix ka pa faik heue.

⁵lheu khaing an, nawh ang sax yaox ka singaix mai ang sax tawng ka grawng tix ceu kawx, nawh hoik nie lheu pon krax laux lee khaing pui ting an,

⁶viang nawh yaox tix im ju ra rheng num kawx mai ang mawh pa koe bwanson heue. Ku kaux khawmuik hoik mawh pa hu tix dah ang mawh lie?

⁷Can kaing jhaw pa yuh pui khawmuik mawh son jheeh nawh, viang yuh nan kawx rhawm pa simie tix ih ang chix fah heue.

⁸Grawh grawng nawh pui pa koe pingnya cuyi sang nie lheu koe ceu patix khaing pui vao pui caox lie? Mawh koe bwanson krax im ju pui hot sibhawm ka plak sivoe ngai pui im ju khankix yuh ka mawx lie?

⁹Grawng pa chix yaox ngai ceu pa mhawm khankix mawh pa nie lheu mhawm khaing krax lunglang rhawm maix tix cie heue. In kawx mawh pa giex going mai mawh pa ih ka bhaung khaing heue.

¹⁰Can pa koe yam in ceu patix ang ah, dawg sum ti deuh ceu kaux heue. Mawh kheu tawng grawng kawn pui mawh pa giex going mai nawh ang pon silah tix tau mai Nawh Cao pa nie lheu ting sibrawm khaing nawh heue.

¹¹Mawh kheu kied haok hwan krax pa giex going, kawn pui sang koe bwanson ka ceu patix lie?

¹²Grawh grawng nawh mawh pui mawx pa tawng ka ceu pa mhawm son pui ka daux baux ju pa giex going nawh khankix khawmuik, pa luan hu awm veei lie? Mawh pui mawx pa pon krai ceu pa sang lih ti koe khaix nawh greem singaix ka kawn pui lie?