Read kinyarwanda SIDIEX 7 Bible Online

SIDIEX 7 - kinyarwanda bible

SIDIEX 7

¹Min ceu kaux pa mhawm mawh pa nie lheu mhawm khaing rawm bee sioe bhawng mai singaix yum mawh pa nie lheu mhawm khaing singaix keh heue.

²Hu ka daux nyiex yum nie lheu mhawm khaing hu ka daux nyiex pa khan kheu priex, grawh grawng nawh an mawh dee sidah sidu hoek pui khankix khawmuik mai can pui pa im ju khankix, tak pon sau tix priex an ka daux rhawm tix heue.

³Krax laux rhawm mawh pa nie lheu mhawm khaing krax pa nyiah heue. Grawh grawng nawh, kheu jao koe pakngai pa laux rhawm an chix kieh rhawm nie lheu mhawm ka heue.

⁴Rhawm pa koe pingnya cuyi koe ka daux nyiex pa yum, viang mawh nan, rhawm pui pa vao pa caox khankix, koe ka daux nyiex pa gaux rhawm heue.

⁵Pa nghiet lox sidiex gau pui pa koe pingnya cuyi, mawh pa nie lheu mhawm khaing nghiet ka lox lai rhax pui pa vao pa caox khankix heue.

⁶Grawh grawng nawh lox nyiah pui pa vao pa caox, awm lox luah taoh khaox ka gleeing greem aw, in kawx mawh pa giex going heue.

⁷Krax pa yeen ya chix kieh pui pa koe pingnya cuyi yhot ka mai krax pa ih mau cun praok chix kieh rhawm pui dieh jum ka heue.

⁸Dee sidah sidu an mawh pa nie lheu mhawm, khaing dee jah tix koe mai pa koe rhawm gun rhawm yeung, mawh pa nie lheu mhawm khaing pa lhaong rhawm heue.

⁹Paw phai dawd rhawm tom lih koe krax pa song rhawm, grawh grawng nawh, krax pa song rhawm ot piang dieb rhawm pui vao pui caox khankix heue.

¹⁰Paw doh chawk ah nin glang ka singaix pa hoik luan khankix hoik mawh pa nie lheu mhawm khaing baux in singaix kheu jao grawng patix lie? Grawh grawng nawh pa chawk cheng maix ti yaox an maix ang chawk ka daux pa koe pingnya cuyi heue.

¹¹Pingnya cuyi mawh ceu pa mhawm awm sinngao mai mawh pa koe bwanson ka son pui khankix, pa yaox ka singaix heue.

¹²Grawh grawng nawh pingnya cuyi chix tiebtie, awm an mau kawx mawh pa chix tiebtie heue. Krax tawng yung mawh pa kied mhawm mai tawx ju ka pui hoik koe pingnya heue.

¹³Keud ti yaox ka kaing jhaw pa hoik yuh Siyiex, grawh grawng nawh, pa hoik yuh Nawh Cao vawk an mawh pui mawx pa sang pon yuh rah?

¹⁴Ka daux singaix pa haok hwan gaux rhawm kah, ka daux singaix koe pa kha rhawm, keud ti yaox sonsang tawng kawn pui ka pa tak sang bleeh tix koe khaix nawh, Siyiex hoik lailoh ti tawx ceu pa mi mai ceu pa hot ka kawn pui heue.

¹⁵Aux hoik yaox ceu an khawmuik ka daux singaix baux ju pa giex going aux, pui pa rahsee tak laux leeing daux pa rahsee nawh, mai pui caox caig tak lang ju ka daux pa yuh tix pa caox heue.

¹⁶Paw doh mawh pa blon rahsee mai paw doh mawh pa blon koe pingnya cuyi maix lai sang yuh tokaux tix laux leeing kheu grawng ceu patix lie?

¹⁷Paw doh mawh pa blon caox caig mai paw doh mawh pa vao pa caox, yuh patix maix lai simie tix yum sivoe bawg yam cie maix?

¹⁸An mawh pa mhawm sonsang jhawp maix tix priex in mai paw lai yah taix tix son ang an lai gah tix hu ka tang kaux heue, mawh kheu pui pa lhat graung ka Siyiex, tak glawd khaing kix khawmuik heue.

¹⁹Pingnya mawh pa kieh pui koe pingnya cuyi, koe sibrawm khaing cao kaing naing ot daux veng kao kaux heue.

²⁰Mawh kheu ang kawn pui piang haktiex rahsee, pa yuh ceu pa mhawm mai pa ang koe phimap, ang koe tix kaux kawx heue.

²¹Paw priex ceu pa krai pui kuceu khankix daux rhawm tix, phan yuh nan maix tak mhong lox jhax lawg siliex maix ka tix,

²²mawh kheu rhawm maix hoik tawng ka jhax lawg tix ka pui tang kaux ku bawg yam heue.

²³Ka daux kuceu khawmuik aux cheuk cheu ti yaox piang tix heue. Aux hoik ah nin, Aux deuh tix mawh pa koe pingnya cuyi, viang mawh nan pingnya cuyi an hoik mawh pa singai khaing aux heue.

²⁴Mawh pui mawx pa pon sawg ti yaox ka ceu pa singai mai ceu pa kied blon raux an lie?

²⁵Rhawm aux deeh keud ti yaox sonsang tawng mai sawg cied ti yaox ka pingnya mai ka grawng ceu an khankix, sonsang tawng ka pa caox caig, pa dex mai phimap mai pa vao pa caox mai pa yhot vaw heue.

²⁶Aux yaox ceu pa nie lheu song khaing krax yum, pa mawh bun koe rhawm keud ti sang taong jhawk mai rub khankix mai maox ceu pa jiet chix phyawk pui ka taix nawh heue. Pui pa een rhawm ka Siyiex, tak glawd khaing bun an heue. Viang mawh nan pui yuh phimap khankix, tak krix ka bun an heue.

²⁷Jhak heue, cao krai lox bwan ah nin, In mawh ceu pa hoik yaox aux, mai baox naok grawng tix ceu hoik tix ceu sonsang pon sawg ti yaox ka grawng tang ceu,

²⁸pa kawn koe rhawm aux tix sawg, viang mawh nan aux ang nyang bax sipub ka, ka sinax simex tix rheng kaux aux hoik yaox ka tix kaux; viang mawh nan, ka sinax bun tix rheng kaux aux ang yaox ka tix kaux kawx heue.

²⁹Jhak heue, aux hoik yaox ngie ka an tix ceu, Siyiex hoik yuh kawn pui rahsee, viang mawh nan kix hoik sawg ti yaox kuceu ka daux krax keud tix tom nie heue.