Read kinyarwanda SIDIEX 8 Bible Online

SIDIEX 8 - kinyarwanda bible

SIDIEX 8

¹Mawh pui mawx pa awm pui koe pingnya lie? mawh pui mawx pa pon tawng tix toe dee bleeh ceu pa kied raux an lie? Pingnya cuyi kawn pui mawh pa kieh pakngai nawh riang mai grang pakngai nawh hoik tieh loh tix heue.

²Aux tawx krax keud ka maix, “Priex ti hawt ka lox tawm simiang ka min pa hoik tiextu maix ka Siyiex heue.

³“Paw nieb lih hu khaing ka plak sivoe ngai simiang mai paw cung ti ot ka daux ceu pa caox tix ceu kawx, mawh kheu simiang pon yuh kuceu awm pa koe rhawm tix heue.

⁴Gumlox simiang mawh pa koe sibrawm mai mawh pui mawx pa pon ah ka simiang yuh nin, Mawh yuh maix ceu patix lie?”

⁵Pui pa priex ti hawt ka lox tawm nawh, tak ang yaox krax pa kha rhawm pie tix ceu kawx mai rhawm pui pa koe pingnya cuyi, chix yaox ka baux yam mai krax prawng ca khawm ra heue.

⁶Grawh grawng nawh son grawng kuceu koe bawg yam mai pa prawng ca, viang mawh pa kied kha rhawm kawx koe tom nie piang nawh heue.

⁷Grawh grawng nawh, nawh ang tawng ka ceu pa tak sang lih ti mawh, mawh kheu nan, mawh pui mawx pa pon krai, pa tak sang lih ti mawh an lie?

⁸Ang koe pui tix kaux kawx pa koe sibrawm ti giex ka khwan mai phan ang mawh nan ang koe sibrawm ka daux singaix yum heue. Ang koe daux krax pa sang glawd ka daux naing an mai pa caox caig tak ang pon taoh ka pui khankix khaing pa caox caig an heue.

⁹Aux hoik sipub ka ceu in khawmuik mai hoik keud sawn ti yaox daux rhawm tix ka kaing kuceu pa hoik yuh tix greem singaix heue. Koe bawg yam pa kwang pui tix kaux piang pui tang kaux pa deeh kieh bwanson tokaux cao nawh laux heue.

¹⁰Khaix an aux yaox ka sipaung pui ka pui caox caig khankix, pui pa hoik laig lih khaing dee pa singax singeh mai koe pui pa piawm ka kix pa yuh pa caox ka daux veng ka dee pa hoik yuh kix ceu an heue. In kawx mawh pa giex going heue.

¹¹Grawh grawng nawh mawh kheu ang khran ciyang piang kaing pa caox caig an khankix phaiphai, rhawm kawn pui khankix hoik naog ka ceu pa sang simie ti yuh ka pa caox heue.

¹²Viang pui koe map yuh pa caox tix yieh bawg mai viang nawh lang ju kawx, viang mawh nan aux tawng ka pui pa lhat graung ka Siyiex mai pa lhat graung ka plak sivoe Nawh Cao mawh pa pon bwanson tete heue.

¹³Viang mawh nan mawh kheu pui caox caig ang koe pa lhat graung sivoe ngai Siyiex mai nawh tak ang pon bwanson pa mhawm mai baux singaix pa im ju nawh pa awm veei kawx tak ang lang heue.

¹⁴Koe pa giex going tix ceu pa lih ti mawh piang haktiex awm lih ceu an ti mawh piang kaing yuh pui rahsee khankix, piang pui caox kawx awm an, awm lih ceu an ti mawh piang ju pui caox khankix piang pui rahsee kawx awm an heue. Aux hoik ah in mawh pa giex going heue.

¹⁵Mawh kheu nan aux yaogyaw ka krax pa gaux rhawm heue. Grawh grawng nawh kawn pui ang lai koe ceu pa nie lheu mhawm ka greem singaix khaing ceu pa ih pa nyaux mai krax pa gaux rhawm heue. Grawh grawng nawh mai kaing jhaw pa sau nawh riang rao ti yuh daux baux singaix im ju tix, nawh tak pon bwanson pa tawx Siyiex greem singaix heue.

¹⁶Aux hoik so rhawm tix sonsang tawng tix ka pingnya mai sonsang pub tix ka kaing jhaw pa hoik yuh tix khankix piang haktiex, mawh kheu pui tiblah ang yaox ti it pon ngaix mai ponsawm heue.

¹⁷Khaix an aux hoik yaox ka kaing jhaw pa hoik yuh Siyiex khawmuik, ka ang pui tix kaux kawx pon khre ti yaox ka kaing pa yuh Nawh Cao greem singaix heue. Grawh grawng nawh, viang kawn pui sau riang tix khre kawx nawh ang pub ka an heue. Viang pui koe pingnya cuyi sau riang tix sonsang tawng ka an kawx, nawh ang pub ang yaox ka an heue.