Read kinyarwanda SIDIEX 9 Bible Online

SIDIEX 9 - kinyarwanda bible

SIDIEX 9

¹Aux keud ti yaox ka grawng in khawmuik ka daux rhawm tix, sonsang tiag cheu aux ti yaox ka kaing jhaw pa yuh pui rahsee mai pui koe pingnya khankix ka daux tawm taix Siyiex heue. Krax moh krax rhawm ang ah mai krax koeng krax khoi ang ah, kawn pui ang tawng ka tix kaux kawx, can pa koe sivoe ngai kix khawmuik mawh pa giex going heue.

²Grawng kuceu khawmuik, lih ti mawh ka pui ku kaux awm paox tix, tix ceu khaing, ka pui rahsee mai pui caox caig, ka pui mhawm mai pui ang mhawm, ka pui singax singeh mai ka pui pa seeing brai, ka pui pa tawx krax tan mai ka pui pa ang tawx krax tan heue. Pui koe phimap mai pui pa ang koe phimap, grawng ceu in hoek ka piang pui pa tiextu mai ka piang pui pa lhat ka pa tiextu heue.

³In mawh ceu pa caox pa lih ti koe khawmuik ka greem singaix, an tix ceu pa hoek khaing piang pui khawmuik heue. Rhawm rhi kawn pui khankix hoik naog ka pa caox tete, mai rhawm pa yhot koe ka daux rhawm kix glang yam kawn im ju kix mai khaix an kix hu ka dee yum heue.

⁴Viang mawh nan, son can pui pa kawn im ju an khankix khawmuik mawh pa koe krax keud pot jum pot, mawh kheu sox pa im tix mu lheu mhawm khaing sivai sangsi pa yum tix mu heue.

⁵Mawh kheu pui pa im ju tawng ka tak sang yum tix, viang mawh nan, pa hoik yum ang tawng tit tix mai kix ang lai pon totaix, mawh kheu kix hoik piawm ka nawh heue.

⁶Krax moh krax rhawm kix mai krax pa koeng kix mai rhawm pa khoi kix khankix kawx, hoik grai hu, kix ang lai yaox ti dex dawd mai kaing jhaw pui pa kawn im, ka daux pa yuh tix greem singaix pie tix ceu kawx heue.

⁷Hu heue, ih pa ih tau mai krax pa gaux rhawm mai nyaux rawm plix siiet tau mai pa nyawm rhawm, grawh grawng nawh, Siyiex hoik rieb ti teei kaing jhaw pa yuh maix khankix heue.

⁸Kieh kraung ceep maix mawh pa paing jheung jheung mai paw kieh rawm bee sioe bhawng cud khaing kaing maix tix bawg kawx heue.

⁹Ot ka daux pa nyawm rhawm tau mai moeng pa moh maix daux singaix im ju pa giex going pa hoik tawx Nawh Cao ka maix greem singaix mai kieh singaix sawm maix luan daux pa nyawm rhawm tix, mawh kheu an mawh nyum ka daux ju maix mai ka daux riang rao kaing pa yuh maix greem singaix heue.

¹⁰Can kaing pa sang yaox maix ti yuh khankix coca mai sau riang ti yuh awx, mawh kheu ka daux meung yum pa sang hu maix an kaing pa yuh ang ah krax keud krax gau ang ah, krax tawng yung ang ah, pingnya cuyi ang ah, ang lai koe ka heue.

¹¹Khaix an aux hoik jhak ti yaox ka greem singaix, pui pa phai to viang silah ti to kawx ang lai pex jheung jheung, pui ting riang ang lai pex ka naing jheung jheung, pui lhak pui haing ang lai yaox tix sak vaig jheung jheung, pui pa koe krax tawng yung ang lai magmi jheung jheung, pui pa min ka kaing jhaw ang lai koe min plakngai jheung jheung, viang mawh nan bawg yam mai akhwang pa chix pon tix ka son khawmuik heue.

¹²Mawh kheu kawn pui ang tawng ka bawg yam cie tix. Awm kax pa hoik krix ka rub mai awm sim pa krix ka jhawk, mawh kheu nan, kawn pui kawx kix ang tien tawng yam krix tix ka jhawk taung pa caox caig piang kix heue.

¹³Pingnya cuyi pa yaox aux greem singaix mai pa khaw tix yaogyaw ka mawh awm in heue.

¹⁴Koe veng iak tix veng pa tux ot pui ka; mai simiang pa kied ting riang rao tix kaux hoek tix puing veng an mai lai lawm ka veng an mai yuh tab hawt vung viang veng an heue.

¹⁵Yam an ka daux veng an koe pui lhak pa hot tix kaux mai nawh hoik taoh veng an ka pingnya tix heue. Viang mawh nan pui tix kaux kawx ang lai doh keud ka pui hot an heue.

¹⁶Khaix an aux ah nin, “Pingnya cuyi mawh pa nie lheu mhawm khaing riang rao heue. Viang mawh nan pingnya cuyi pui hot shia an, mawh pa sibriem pui ka mai ka lox nawh kawx pui ang nghiet ka heue.

¹⁷Lox sikah pui lhak ka daux pa yiien yawg, mawh pa nyawm tix nghiet lheu khaing lox riag yo cao kwang piang pui vao pui caox khankix heue.

¹⁸Pingnya cuyi mawh pa nie lheu mhawm khaing kraung naing pa shiao son naing; viang mawh nan, pui pa koe map grham tix kaux, mawh pa yuh ceu pa mhawm khankix laux leeing heue.”