Read kinyarwanda YERAMIX 32 Bible Online

YERAMIX 32 - kinyarwanda bible

YERAMIX 32

¹Bawg yam kwang Zedekix simiang meung Yudax haktiex kao num mai yam kwang Nebukhaneza haktiex kao daix num, gumlox Siyiex hoek ka Yeramix heue.

²Yam an cub kru naing simiang Babulon khankix, hoik lai lawm ka veng Yerusaliem mai laung ka cao jhai Yeramix ka daux thawng nyiex haw simiang meung Yudax heue.

³Grawh grawng nawh, Zedekix simiang meung Yudax, hoik laung ka Yeramix ah nin, “Maix lai krai lox jhai grawng pa ah Siyiex yuh nin, jhak heue, Aux tak ap veng in ka daux tawm taix simiang Babulon mai nawh tak sang rhim ti teei veng an,

⁴mai Zedekix simiang pui Yudax khankix tak ang lai luad luan khaing daux tawm taix pui Khaladie, viang mawh nan, kix tak sang laig ka daux tawm taix simiang Babulon mai tak yaox tix sikah tau mai nawh, pakngai taw pakngai paox tix mai yaox ka ngai paox tix, tix kaux lai tix kaux,

⁵khaix an nawh tak sang thong Zedekix hu ka veng Babulon mai nawh tak sang ot tan, tom hoek bawg yam ang Aux nyang hoek kia ngien ka nawh, Siyiex ah nin, viang pex puing ka pui Khaladie kawx, pex tak ang pex ka heue.”

⁶Yeramix ah nin, gumlox Siyiex hoek ka aux ah nin,

⁷Jhak heue, Hanamelax kawn simex keeing iak maix Shalum tak hoek ah nin, taoh ka gwang kaung aux, pa koe ka daux veng Anatok, mawh kheu koe akhwang sang deeh laug maix ka an sonsang liag maix tix cie heue.

⁸Khaix an Hanamelax kawn simex Keeing iak aux hoek bleeh ka aux ka daux biang thawng awm gumlox Siyiex mai ah nin ka aux, yuh bwanson liag gwang kaung aux, pa koe ka daux veng Anatok, ka daux haktiex Benyamin, mawh kheu koe akhwang maix tix taoh mawh sinngao cie tix mai laug ti teei mawh cie maix, liag maix cie ka an Khaix an aux hoik tawng ka mawh in gumlox Siyiex heue.

⁹Mawh kheu nan, aux hoik liag gwang kaung an khaing Hanamelax kawn simex keeing iak aux pa koe ka daux veng Anatok mai ciang ti tawx mau ka nawh kao aliah Shekhe heue.

¹⁰Aux hoik tiiem ka lai mhai rug mai hoik tawk cum piang an mai kok ka cao kham sakse khankix mai hoik ciang ti tawx mau an ka jiang heue.

¹¹Mawh kheu nan, aux hoik teei lai mhai rug liag kaung, pa hoik tawk cum, awm pa hoik koe been khankix mai hoik paoh ti deuh,

¹²aux hoik ap ka lai mhai rug pa liag kaung ka Baruk, pa mawh kawn simex Nerix kawn simex Maseyax plak sivoe ngai Hanamelax pa mawh kawn simex keeing iak aux mai ka sivoe ngai pui pa kham sakse khankix, pui pa koe ceu kaux piang lai mhai rug grawng liag ka an, sivoe ngai pui Yudax khankix pa ngawm ka daux biang nyiex thawng heue.

¹³Khaix an aux hoik ah lox khin ka Baruk, plak sivoe kix ah nin,

¹⁴Siyiex Cao kru naing raoma, pa mawh Siyiex ceu pui Isarelax ah nin, teei pheen lai mhai rug liag kaung pa hoik tawk cum mai pa hoik paoh ti deuh mai sau tix priex ka daux aw tiex, sonsang pon kham lai an tom rheung singaix sawm heue.”

¹⁵Grawh grawng nawh, Siyiex Cao kru naing raoma, pa mawh Siyiex ceu pui Isarelax ah nin, “Nyiex mai kaung mai sipeem plix siiet ka daux haktiex in tak deeh yaox tix cie ka heue.”

¹⁶“Yam ap aux pheen lai mhai rug liag kaung ka Baruk pa mawh kawn simex Nerix, rawg bwan ka Siyiex ah nin,

¹⁷Siyiex eue, jhak heue, Maix Cao hoik yuh raoma mai haktiex ka sibrawm pa kied ting lhaong tix tau mai pa hoik nyeu Maix Cao plawng taix tix heue. Ang koe ceu pa nu ka son Maix Cao pie tix ceu kawx heue.

¹⁸Maix Cao jhi krax moh pa caux rhawm tix ka pui kaing rheng kaing mheen mai deeh viied krax pa lud keeing khankix piang kaing kawn praix kix, pa sang hoek khaix kix heue. Siyiex pa kied ting riang rao mai min ceu kaux Maix Cao mawh Siyiex Cao kru naing raoma heue.

¹⁹Krax keud Maix Cao mawh pa kied ting riang rao mai mawh pa kied ting sibrawm ka daux kaing jhaw pa yuh tix, grawh grawng nawh, ngai Maix Cao mawh pa simi ti jhak ka daux krax hu kawn pui khawmuik, sonsang tawx bwanson ka pui ku kaux awm kaing jhaw plix pa yuh nawh khankix heue.

²⁰Maix Cao hoik deuh mhai rug mai mhai pa daox deng ka daux meung Ejiptux tom hoek ka daux in singaix mai ka daux haktiex Isarelax mai daux sinax pui kuceu mai min ceu kaux Maix Cao hoik ao min awm pa koe tom hoek ka daux in singaix heue.

²¹Maix Cao hoik viex ceu pui Isarelax khankix lih khaing meung Ejiptux tau mai mhai rug pa daox deng mai taix pa ting riang rao tau mai pa nyeu ka plawng taix tix, tau mai ceu pa kied lhat kied graung ka heue.

²²Maix Cao hoik tawx haktiex in ka kix, pa mawh haktiex pa hoik tiextu Maix Cao ka keeing kix, pa mawh haktiex dee lih rawm teeih mai rawm hia heue.”

²³Kix hoik laig ka daux mai teei ti cie haktiex an, viang mawh nan, kix ang cu nghiet ka lox Maix Cao mai ang lawng hu ka daux lox tat jhawm prawng Maix Cao heue. Kix ang yuh awm pa hoik tawm Maix kix yuh tix ceu kawx heue. Mawh kheu nan, Maix Cao hoik kieh krax pa kha rhawm in khawmuik hoek piang kix heue.

²⁴Jhak ti yaox ka tab pau dee lhaong rawb rim guh veng khankix, kix hoik hoek sonsang rhim ka veng mai hoik ap veng an sonsang hoek krax kha rhawm ka lawm vaig mai sibhawm praix mai ka jhawm saux preng, ka ceu pui Khaladie pa sang puing ka kix heue. Maix Cao hoik yaox grum naog awm gumlox pa krai tix heue.

²⁵Siyiex eue, Maix Cao hoik ah nin ka aux, viang veng an hoik tawx tix ka daux tawm taix pui Khaladie kawx, liag kaung an ka mau mai kok ka pui pa kham sakse khankix heue.”

²⁶Khaix an gumlox Siyiex hoek ka Yeramix ah nin,

²⁷“Jhak heue, Aux mawh Siyiex pa kwang ka kawn pui mai totiag khawmuik heue. Mawh koe pa nu tix ceuceu pa ang Aux chix yuh lie?

²⁸Mawh kheu nan, Siyiex ah nin, jhak heue, Aux tak sang ap veng in ka daux tawm tai pui Khaladie mai ka daux tawm taix Nebukhaneza, simiang Babulon mai nawh tak sang rhim ti teei an heue.

²⁹Pui Khaladie pa hoek puing ka veng in, tak sang keeig veng in ka ngu mai gleeing ti tik an pa mawh nyiex ma pa tan nyawng bhawng ka siyiex Balax piang braux nyiex tix mai pa prauk krax tan pa nyaux ka siyiex tang kaux tang hak, sonsang so Aux song rhawm,

³⁰kheu jao yuh kawn praix ceu pui Isarelax mai kawn praix ceu pui Yudax pa caox caig ka plak sivoe Aux, jah ka tom yam mawh kix kawn nyawm heue. Grawh grawng nawh, kawn praix ceu pui Isarelax khankix hoik so ngie Aux song rhawm, ka kaing pa yuh tix, Siyiex ah nan heue.

³¹Grawh grawng nawh, veng in, hoik so Aux koe krax song rhawm mai kieh Aux meet rhawm meet rhi, jah khaing singaix pang ka veng an, tom hoek ka daux singaix heue. Mawh kheu nan, Aux tak sang gah ti tik veng an khaing sivoe ngai Aux.

³²Kheu pa caox caig yuh kawn praix ceu pui Isarelax mai kawn praix ceu pui Yudax khankix mai simiang kix, cao kaing kix mai cao giex kaing li kix, cao jhai kix, pui haktiex Yudax mai can pui pa ot ka daux veng Yerusaliem hoik so krax pa song rhawm Aux lih heue.

³³Kix hoik ghaix blawg tix ka Aux mai ang lai veeh ngaix tix ka Aux, viang Aux kaoh caocao mai sidiex gau ka kix kawx, kix ang lai nghiet mai ang rieb ka lox sidiex gau Aux heue.

³⁴Viang mawh nan, kix hoik deuh ceu pa seeing brai khankix sonsang seeing yuh ka daux nyiex bwan, pa hoik kok ka min ceu kaux Aux,

³⁵kix hoik sum ti deuh ka dee pa kied ting lhaong son siyiex Balax, pa koe ka daux lung kawn simex Hinom sonsang tan kawn simex kawn bun tix khankix ka siyiex Mulawk, pa ang Aux sax tawm ka kix mai pa ang sax keud ka daux rhawm tix, sonsang yuh kix ceu pa seeing brai mai sonsang kieh pui Yudax koe phimap ka heue.

³⁶Mawh kheu nan, Siyiex pa mawh Siyiex ceu pui Isarelax ah nin, son grawng pa dex dawd mai veng in ah nin, tak sang ap veng an ka daux tawm taix simiang Babulon, ka krax pa kha rhawm ka lawm vaig, ka sibhawm praix mai ka jhawm saux preng khankix heue.

³⁷Jhak heue, Aux tak deeh khrawm kix lih khaing daux haktiex an khawmuik, ka daux pa song rhawm Aux mai ka daux krax pa meet rhawm Aux mai ka daux pa kied ting saux rhawm tix, Aux tak sang deeh viex kix hoek ka baoh dee in mai Aux kieh kix ot yiien yawg heue.

³⁸Kix tak sang mawh pui Aux mai Aux tak sang mawh Siyiex kix.

³⁹Khaix an Aux sang tawx rhawm tix mu mai krax tix nyaing sonsang koe krax lhat graung ka Aux leeing ju, sonsang mawh pa mhawm son kix mai ka son kawn praix kix, pa tak sang hoek khaix kix heue.

⁴⁰Aux tak sang yuh sijax mukheu leeing ju tau mai kix, sonsang ang Aux lai veeh khaing pa sang yuh tix bwanson pa mhawm ka kix heue. Viang mawh nan, Aux tak sang sau ti deuh krax pa chix lhat graung ka daux rhawm kix, son ang kix lai lih hu khaing Aux heue.

⁴¹Mawh heue, Aux tak sang gaux rhawm sonsang yuh tix bwanson ceu pa mhawm piang kix mai Aux tak sang sum kix kaux cong ka daux haktiex in, khawm rhawm mai khawm ju khwan Aux khawmuik heue.

⁴²Grawh grawng nawh, Siyiex ah nin, awm hoik viex Aux krax pa ting kha rhawm hoek piang ceu pui in, yuh ka mawx, Aux tak sang viex nang ceu pa mhawm hoek piang kix khawmuik awm hoik koe sijax Aux piang kix heue.

⁴³Tak sang liag kaung ka daux haktiex in khaing pa hoik ah pex nin, “An mawh dee yiien dee ang pui ot mai dee ang totiag khankix lai koe mai an hoik ap tix ka daux tawm taix pui Khaladie khankix heue.

⁴⁴Pui khankix tak sang liag kaung ka mau mai yuh lai mhai rug pa liag kaung mai pa hoik tawk cum ka mai kok cao pa kham sakse, khaing ka daux haktiex Benyamin, khaing hawt rawb rim veng Yerusaliem mai khaing ka daux veng Yudax mai khaing veng pa koe piang gawng khankix mai khaing ka daux veng pa koe daux lung daux ngawd mai khaing ka daux veng pa koe plak laong, grawh grawng nawh, Aux tak deeh viex pui pa giex laung khankix deeh hoek, Siyiex ah nin heue.”