Read kinyarwanda YOLAX 2 Bible Online

YOLAX 2 - kinyarwanda bible

YOLAX 2

¹Phlu teettawng piang gawng Zion mai lox sinum pa tawx satix piang gawng singax singeh Aux heue. Kieh pui pa ot ka daux haktiex koe krax si yaung khawmuik heue. mawh kheu singaix Siyiex hoik hoek mai hoik dex heue.

²Singaix pa faik uik mai singaix ceep paiawm mai singaix kied ceep pa faik, awm ceep simawg plak ponngawb piang gawng khankix heue. Ceu pui pa ting lhaong mai pa kied ting riang rao tak sang bleeh ti hoek, mawh cub pui pa ang sax koe glang ka in mai khaix in kawx ang lai koe tom sidah ku ju leeing ju heue.

³Ngu proe ka plak sivoe kix mai rao ngu hax ka plak khaix kix, haktiex mawh pa awm sipeem Edin ka sivoe sang hoek kix mai ka khaix hoik hoek kix, hoik lih mawh daux tiagtu pa hoik laux leeing heue. Tak ang lai koe tix ceu kawx pa pon glawd khaing kix heue.

⁴Grang pakpeung kix, awm grang pakpeung brung mai awm brax to brung heue.

⁵Lox sinum luah to kix piang gawng, awm lox luah jaong ling lawx mai awm lox sinum luah rao ngu pa proe ka nyhee nyhawk pa kroh, awm pui tix cub pa kied ting riang rao, pa khre rien ti sang puing naing heue.

⁶Ka plak sivoe kix, pui lu lax mai khi rhawm tix, pakngai kix hoik tieh loh tix khawmuik heue.

⁷Kix to awm pui pa kied ting riang rao khankix, kix haok piang guh veng, awm pui naing, pui ku kaux hu plak sivoe rahsee awm paox tix mai kix ang lai tang tiah khaing paox tix heue.

⁸Kix ang lai teeh paox tix, tix kaux lai tix kaux, pui ku kaux tang hu ka daux krax cub mawx cub an heue. Yam krox brung kix ka daux sinax kraung naing, kix ang koe krax mat heue.

⁹Kix to jee blaong ka daux veng, kix to piang guh veng, kix haok ka daux nyiex, kix laig ka daux diang siviex iak, awm pui briex heue.

¹⁰Haktiex yung yiang ka plak sivoe kix, raoma kawx yung yiang, singaix mai khix tak sang faik mai simuing ang lai jhan riang tix heue.

¹¹Siyiex tawx lox tix, plak sivoe cub kru naing Nawh Cao, kheu mawh cub tab Nawh pa kied ting lhaong heue. Pa pon hawt ti yuh awm gumlox tawx Nawh Cao mawh kaw pa ting sibrawm heue. Grawh grawng nawh, singaix Siyiex mawh pa ting lhaong mai mawh pa kied koe krax lhat kah, mawh pui mawx pa pon thiang kah lie?

¹²Mawh kheu nan yam in Siyiex ah nin, “Deeh veeh ti ing ka Aux, khawm rhawm khawm rhi tix mai twah pa ih mai yiiem yo mai krax pa khi rhawm tix heue.

¹³Mawh kheu nan, riah rhawm pex mai paw riah kraung ceep pex, deeh ing ka Siyiex, pa mawh Siyiex pex heue.” Mawh kheu Nawh Cao koe krax pa tawx bwanson mai krax pa chix caux rhawm, Nawh Cao lang rhawm mai mawh pa grum koe krax moh krax rhawm mai Nawh Cao tak sang deeh tieh rhawm tix ang tawx krax kha rhawm heue.

¹⁴Ha Nawh Cao deeh veeh rhawm tix mai koe krax pa deeh doh keud mai deuh krax pa nawb bwanson, deuh krax phawng nghox ca im mai krax tan pa nyaux son Siyiex, pa mawh Siyiex pex, mawx pa tawng kah lie?

¹⁵Phlu teettawng piang gawng Zion, tat ti deuh singaix twah pa ih, krai pao pawie pa singax singeh heue.

¹⁶Kraix khrawm pui hun mai kieh kix tang yuh tix singax heue. Kraix khrawm kuad song khankix, kraix khrawm kawn nyawm mai khawm kawn nyawm pa kawn peux khankix heue. Kieh sinaw pa sang koe moeng lih khaing daux lawg mai kieh bunkrih pa sang koe mex lih khaing daux lawg jawg nawh tix heue.”

¹⁷Kieh cao giex kaing li pa yuh kaing jhaw Siyiex khankix, yiiem sinax sidub nyiex mai dee koe khu dee tan mai ah nin “Siyiex eue, caux rhawm ka pui Maix liak lox salao, son ang pui tang ceu pon ti kwang piang kix, maix lai sang grham pui tang meung ah nin, Siyiex kix koe dee mawx lie?”

¹⁸Khaix an Siyiex tak sang deeh koe rhawm ka son haktiex Cao Nawh mai koe krax caux rhawm ka pui Nawh heue.

¹⁹Siyiex deeh pawk mai ah nin ka pui Nawh heue. “Jhak heue, Aux tak sang tawx nghox koi, rawm plix siiet mai rawm bee ka pex mai kieh pex sak heue. Aux tak ang lai kieh pex pon lox salao ka daux sinax ceu pui tang meung khaix in heue.

²⁰Aux tak sang kieh cub kru naing plak laong singai hu khaing pex mai tak grheu kix luan ka dah dee ang pui koe mai ka haktiex pa kroh kroing an mai kieh cub phao voe laig daux rawm sigrit sigra plak lih singaix, kieh cub phao khaix laig ka daux rawm sigrit sigra plak glip singaix, mawh kheu bhawm sioe cux mai bhawm si um kix tak yaog ti haok dee lhaong kheu hoik yuh kix grawng ceu pa ting caox an khankix heue.

²¹Haktiex eue, paw lhat graung, koe krax nyawm rhawm mai koe krax gaux rhawm heue. Grawh grawng nawh, Siyiex hoik yuh pa kied ting lhaong khankix heue.

²²Totiag daux tiagtu khankix eue, paw lhat graung, grawh grawng nawh, biang dee klai rib hoik glaoh mai khaox khankix hoik koe plix, khaox ruh mai nhu plix siiet khankix hoik kraoh ti koe riang rao heue.

²³Pui veng Zion khankix eue, kieh pex koe krax nyawm rhawm mai gaux rhawm ka daux Siyiex pa mawh Siyiex pex, kheu Nawh Cao hoik tawx rawm lhiex cao ka pex ka daux krax pa rahsee tix mai Nawh tak sang kieh rawm lhiex lih ka son pex, pa mawh rawm lhiex cao mai rawm lhiex lha awm phao voe heue.

²⁴Biang glah dee pah nghox, tak naog ka nghox ca, ang mai aw khang ting maix khankix tak kreh ti naog ka rawm plix siiet khraox mai rawm bee heue.

²⁵Mawh kheu nan aux tak sang deeh naok ti tawx ka pex can pa hoik kiied sido nghox khankix ti ih, sido hauk mi sido ngai liag mai sido kai kip khankix, pa mawh kru naing pa kied ting lhaong Aux khankix, ka pa hoik ploi Aux nawh hoek ka daux sinax pex heue.

²⁶Pex tak sang yaox ti ih tom nie mai hoik sak mai yaogyaw ceu kaux Siyiex, pa mawh Siyiex pex, pa hoik yuh krax pa daox deng ka pex mai pui Aux khankix, tak ang lai koe krax kaig tua khaix in leeing ju heue.

²⁷Pex tak tawng ka Aux ka daux sinax ceu pui Isarelax mai ka mawh Aux Siyiex, pa mawh Siyiex pex mai ka ang siyiex tang kaux ang lai koe heue. Pui Aux khankix tak ang lai koe krax kaig tua khaix in leeing ju heue.

²⁸Khaix in sax Aux tak kieh khuan Aux lih piang pui khawmuik heue. Kawn simex kawn bun pex tak sang krai lox jhai mai pui awn ju pex, tak sang yaox riang susai mai pui kuad song pex tak sang camaox ti yaox heue.

²⁹Ka daux singaix ankix Aux tak sang kieh khuan Aux lih piang kawncau simex cie Aux mai kawncau bun cie Aux khankix heue.

³⁰Aux tak jhi yaox mhai rug pa daox deng ka raoma long mai mhai ka greem piang haktiex pa mawh nham mai ngu mai taox ngu heue.

³¹Singaix tak tieh loh ti mawh pa faik mai khix tak deeh tieh ti mawh nham, sivoe sang hoek singaix pa ting lhaong Siyiex mai singaix pa koe krax lhat graung kah heue.

³²Ka daux singaix an can pui pa kok ka ceu kaux Siyiex, tak sang hoek krax taoh heue. Grawh grawng nawh, piang gawng Zion mai ka daux veng Yerusaliem khankix, tak sang koe pui pa pon ti luad luan awm pa hoik ah Siyiex, ka daux sinax pui pa kawn deuk khankix, tak koe pa kok Siyiex ti teei heue.