Read kinyarwanda HAGIE 1 Bible Online

HAGIE 1 - kinyarwanda bible

HAGIE 1

¹Ka daux baux num kwang simiang Darix, ra num tix num daux khix liah, tix ngaix, gumlox Siyiex hoek ka cao jhai Hagie, krai ka Zerubabelax kawn simex Shelatilax, cao kwang veng Yudax mai ka Yawsux kawn simex Yehawzadax, cao kaing ting cub cao giex kaing li khankix mai ah nin heue.

²Siyiex cao kru naing raoma ah nin, pui an kix ah nin bawg yam pa sang sum ka nyiex bwan Siyiex ang nyang bax hoek heue.

³Mawh kheu nan gumlox Siyiex hoek ka cao jhai Hagie ah nin.

⁴Khex mawh in bawg yam sonsang ot tokaux pex ka daux nyiex pa koe braux ra glawk mai tak sang grham nyiex bwan in grhup ti laux leeing lie?

⁵Yam in Siyiex cao kru naing raoma ah nin, “Keud ti yaox krax grawng pa yuh pex heue.”

⁶“Pex hoik rhuat simie tom nie mai pon teei ngie ceeix khaing heue. Pex ih mai ang sak, pex nyaux mai ang fah heue. Pex ceep kraung mai ang lai siu mai pa pon ngawh kaing yuh tix kawx mai sau ngawh kaing yuh tix ka daux bau pa doh heue.

⁷Siyiex cao kru naing raoma ah nin, “Keud ti yaox krax grawng pa yuh pex heue.”

⁸Pex haok ka piang gawng mai viex khaox hoek mai sum nyiex bwan, Aux tak khaw rhawm kheu grawng in mai koe min plakngai kah heue. “Siyiex ah nin heue.

⁹Pex keud ce ti sang pon tom nie mai pon ngie ceeix khaing mai yam hoik viex pex nawh hoek ka nyiex, Aux hoik phlu ti tik heue. Mawh kheu patix lie? Mawh kheu nyiex bwan Aux hoik laux leeing, pex tang keud ngie ti ing ot ka nyiex tokaux tix heue. Siyiex Cao kru naing raoma ah nin heue.

¹⁰Mawh kheu nan jao pex raoma ang lai tawx rawm ciex mai haktiex kawx ang lai plix heue.

¹¹Aux hoik kok krax pa kroh kroing hoek ka piang tiex mai ka piang gawng khankix mai ka piang simie nghox mai ka piang rawm plix siiet pa khraox mai rawm bee mai ka piang can ceu pa tak sang lih khaing daux tiex, ka piang pui khankix mai to brie pa eei mai ka piang can ceu pa yuh pex khawmuik ka riang rao taix pex heue. Grawng Krax Cu Nghiet Pui

¹²Yam an Zerubabelax kawn simex Shelatilax mai Yawsux kawn simex Yehawzadax cao kaing ting cao giex kaing li mai pui pa kawn deuk khankix, hoik cu hoik nghiet ka lox Siyiex kix, pa mawh Siyiex leeing ju mai ka gumlox cao jhai Hagie, awm hoik ploi Siyiex kix, pa mawh Siyiex leeing ju nawh hoek mai pui khankix hoik koe krax lhat graung ka plak sivoe ngai Siyiex leeing ju heue.

¹³Yam an Hagie pa mawh kawncau Siyiex hoik krai lox grawh grawng pa tawm Siyiex ka pui khankix ah nin, “Aux ot tau mai pex heue.”

¹⁴Siyiex hoik so rhawm rhi Zerubabelax, kawn simex Shelatilax cao kwang veng Yudax mai rhawm rhi Yawsux kawn simex Yehawzadax, cao kaing ting cao giex kaing li mai rhawm rhi pui pa kawn deuk khankix mai kix hoek ti yuh kaing ka daux nyiex bwan Siyiex cao kru naing raoma, pa mawh Siyiex kix heue.

¹⁵In mawh ka daux baux num kwang simiang Darix, ra num tix num daux khix liah tixnga pon ngaix heue.