Read kinyarwanda HAGIE 2 Bible Online

HAGIE 2 - kinyarwanda bible

HAGIE 2

¹Ka daux khix aliah tixnga tix ngaix, gumlox Siyiex hoek ka cao jhai Hagie ah nin,

²Maix hu krai ka Zerubabelax, kawn simex Shelatilax cao kaing veng Yudax mai ka Yawsux kawn simex Yehawzadax cao kaing ting cao giex kaing li mai ka pui pa kawn deuk khankix mai ah nin heue.

³Mawh pui mawx pa kawn deuk ka daux sinax pex, pa hoik yaox min pakngai nyiex bwan in glang ka in dix lie? mai yaox pex nawh yuh ka mawx yam in lie? Ang in mawh pa koe ka daux ngai pex, awm pa ang mawh tidtix lie?

⁴Viang yuh nan kawx Zerubabelax eue, Teei ti koe riang koe rao awx, Siyiex ah nin. Yawsux kawn simex Yehawzadax cao kaing ting, cao giex kaing li eue, teei ti koe riang rao awx, pex pa mawh pui haktiex khankix eue, teei ti koe riang rao mai yuh kaing heue. “Siyiex ah nin. “Grawh grawng nawh, Aux ot tau mai pex heue, “Siyiex cao kru naing raoma ah nan heue.

⁵Awm koe gumlox pa hoik yuh Aux ti deuh sijax mukheu mai pex yam lih pex khaing daux meung Ejiptux, awm an khuan Aux tak ot ka daux sinax pex heue. Paw koe krax lhat graung awx! “

⁶Siyiex Cao kru naing raoma ah nin. “Baox tivud ticu Aux tak sang yung yiang raoma mai haktiex, rawm sigrit sigra mai haktiex kroh an khankix,

⁷“Aux tak sang yung yiang ceu pui khankix khawmuik mai ceu pui khawmuik tak sang yaox ti hoek ka krax pa koe rhawm rhi mai Aux tak sang kieh nyiex bwan in naog ka min pakngai heue. “Siyiex cao kru naing raoma ah nin.

⁸Mau mawh cie Aux mai khri kawx mawh cie Aux heue. “Siyiex cao kru naing raoma ah nan heue.

⁹“Min pakngai nyiex bwan khaix in, tak sang mawh pa nie lheu ting khaing pa koe phao voe heue. “Siyiex cao kru naing raoma ah nan heue. Ka dah dee in, Aux tak sang tawx pa nhim koe kah heue. Siyiex cao kru naing raoma ah nin heue.

¹⁰Ka daux num kwang simiang Darix ra num tix num, khix dim tixnga pon ngaix gumlox Siyiex hoek ka cao jhai Hagie ah nin.

¹¹Siyiex cao kru naing raoma ah nin, mhaing ti yaox cao giex kaing li ka son grawng gumlox beenli ah nin,

¹²Phan pui tix kaux kaux gie ti viex nex pa singax ka daux kraung ceep tix mai phan kraung ceep an krox blah, puan, rawm plix siiet mai rawm bee ang ah, pa ih tix ceu ceu ang ah, mawh kawn sang mawh pa singax singeh ka lie? Khaix an cao giex kaing li khankix deeh pawk lox ah nin “Ang mawh heue.”

¹³Hagie deeh ah nin, phan pui tix kaux kaux pa ang singax, kheu giex tix tokaux pa yum hu krox hu teeh ka inkix tix ceu ceu, ceu an mawh pa ang singax lie? Mawh kheu nan, cao giex kaing li khankix deeh pawk lox ah nin, tak mawh pa ang singax heue.

¹⁴Khaix an Hagie deeh pawk lox ah nin, ceu pui in mawh pa awm an mai pui haktiex in mawh pa awm an ka plak sivoe Aux mai kaing ceu pa yuh tix ka taix kix kuceu kawx, mawh pa awm an mai ceu pa tan kix kawx, mawh ceu pa ang singax heue. Siyiex ah nin heue.

¹⁵Yam in, keud ti yaox mhawm mhawm, jah khaing ka daux singaix in hu sivoe ngai, sivoe ang lon simaox nyang bax hoik sau tix ka piang lon simaox ka daux nyiex bwan Siyiex,

¹⁶Ka singaix an kix, yam hoek pui ka pum nghox, keud ti sang pon nghox, tixnga phliex mai pon ngie kao phliex heue. Yam hoek pui ka dee biiet rawm plix siiet, keud ti sang pon tixphwan pung mai pon ngie tixnga pung khaing heue.

¹⁷Aux tak sang tawx krax kham geu pex, ka bhaung siaoh pa kieh khaox khankix yum mai krax pa lih roik rawm ti kieh khaox khankix yum mai pre ka daux kaing jhaw riang grang can pa yuh pex ka taix tix khankix khawmuik heue. Viang yuh nan kawx, pex ang cu ti deeh ing hoek ka Aux heue. Siyiex ah nan heue.

¹⁸Keud ti yaox mhawm mhawm, jah khaing ka daux singaix in hu sivoe ngai, pa mawh khix dim tixnga pon ngaix mai keud ti yaox tom hoek daux singaix hoik sum num riah nyiex bwan Siyiex heue.

¹⁹“Mawh kawn koe nghox ka daux krao lie? Nhu plix siiet, khaox ruh, khaox plix kla jiang mai khaox sanlun khankix ang nyang bax koe plix heue. Jah ka daux in singaix hu sivoe, Aux tak sang nawb bwanson piang pex heue.

²⁰Ka daux khix in tixnga pon ngaix, gumlox Siyiex baox hoek ka Hagie ah nin,

²¹Krai ka Zerubabelax pa mawh cao kwang veng Yudax ah nin, “Aux tak sang yung yiang raoma mai haktiex heue.”

²²Aux tak sang pluk pliak ti tik dang ngeung meung haktiex khankix mai yuh sibrawm pui tang ceu khankix laux leeing heue. Aux tak sang pluk pliak ti tik ling lawx naing ka daux an khankix mai khawm ka pui pa brug ti hoek ka daux an kix, brung mai pui naing brug brung khankix tak som nai mai pui ku kaux tak sang goh ti yum ka vaid puxaik tix heue.

²³Pa ah Siyiex leeing ju cao kaing kru naing raoma ah nin, “kawn simex Aux Zerubabelax kawn simex Shelatilax eue, ka daux singaix an Aux tak sang deeh teei maix mawh cum jhup giien Siyiex leeing ju ah nin, mawh kheu hoik laug Aux ti teei maix.”