Read kinyarwanda MATHIEX 16 Bible Online

MATHIEX 16 - kinyarwanda bible

MATHIEX 16

¹Pharishie mai Sadukie khankix hoek ti cheuk ka Nawh mai rawg Nawh Cao jhi kix yaox ka mhai rug pa daox deng khaing raoma heue.

²Viang mawh nan, Nawh Cao pawk lox ah nin ka kix, “Yam kawn mawh ponbo pex ah, Tak blang praix, kheu raoh raoma,

³Yam ponngawb, praix ang mhawm daux singaix, bhaung tak phlu kheu raoh raoma mai ceep paiawm. Pex tawng sang caw ti teei dee bleeh pakpeung raoma lih, viang mawh nan, pex ang chix teei dee bleeh mhai grawng bawg yam khankix lih lie?

⁴Baux ju pa caox mai ru pa lud, rawg mhai pa daox deng heue. Viang mawh nan lheu khaing mhai pa daox deng cao jhai Yonax, tak ang tawx mhai pa daox deng ka kix heue.” Nawh Cao prah kix mai lih hu heue.

⁵Yam hoik hoek kawncau khankix plak toi rawm plak an, kix piawm ti viex blah heue.

⁶Yam an Yesux ah nin ka kix, “Rien rhawm pex ka susaix Pharishie mai Sadukie khankix heue.”

⁷Kix tix kaux lai tix kaux ah nin ka paox tix, “Mawh kheu ang ex viex blah heue.”

⁸Yesux tawng grawng an ah nin, “Pex pa iak krax yum rhawm khankix eue, kheu pa tix pex tix kaux lai tix kaux ah ka paox tix ka grawng ang blah koe lie?

⁹Pex ang nyang tawng lie? Ang pex doh keud ka grawng blah phwan lon mai pui phwan rheng kaux mai pex deeh pon ti khrawm miex phliex?

¹⁰Blah aliah lon mai pui pon rheng mai pex deeh pon ti khrawm miex phliex?

¹¹Yuh patix pex khex ang tawng pa ang Aux krai grawng blah ka pex? Rien rhawm pex ka susaix Pharishie mai Sadukie khankix.”

¹²Yam an kix tawng, Nawh Cao ang krai grawng sang rien rhawm ka susaix blah, rien rhawm ka lox sidiex lox gau Pharishie mai Sadukie khankix heue.

¹³Yam hoek Yesux ka daux haktiex Kesarix Philippix mai Nawh Cao chawk ka kawncau Nawh khankix ah nin, “Ka mawh aux kawn pui, Pui ah Kawn kawn pui mawh mawx lie?”

¹⁴Kix deeh ah nin, “Tix blah ah mawh Yohan cao cubcom, viang mawh nan tix blah ah mawh Eliyax mai tang kaux ah mawh Yeramix, phan ang mawh nan, mawh cao jhai tix kaux kaux heue.”

¹⁵Nawh Cao baox chawk ka kix ah nin, “Pex ah Aux mawh mawx?”

¹⁶Simon Petrux pawk lox mai ah nin ka Nawh Cao, “Maix mawh Khrit Kawn Siyiex pa im ju heue.”

¹⁷Yesux deeh pawk lox ah nin ka nawh, “Simon Bayonax eue, maix koe bwanson heue. Kheu ang mawh nex nham pa plak jhi ka maix, mawh Keeing Aux pa ot ka daux meung raoma pa plak jhi heue.

¹⁸Aux krai ka maix, maix mawh Petrux mai Aux tak sum ceucao Aux piang simaox in mai siviex meung yum ang doh pex ka ceu cao an heue.

¹⁹Aux tak tawx jiak saw meung raoma ka maix heue. Maix phyawk ceu patix ang ah piang haktiex in, tak sang phyawk ka daux meung raoma mai maix kah ceu patix ang ah piang haktiex in, tak sang kah daux meung raoma heue.”

²⁰Yam an Nawh Cao tawm lox ka kawncau Nawh khankix, son ang kix sang krai grawng mawh Nawh Cao Khrit ka pui tix kaux kawx heue.

²¹Jah ka yam an hu sivoe, Yesux jhi kawncau Nawh khankix yaox, grawng tak sang hu Nawh ka veng Yerusaliem mai kham geu tom nie ceu, daux tawm taix kuad song mai cao giex kaing li pa ting mai pui tiiem lai khankix mai grawng tak kham geu pa yum mai grawng tak deeh kaoh im khaix an daux loe ngaix tix ngaix heue.

²²Petrux teei Nawh Cao hu mai ah nin ka Nawh, “Simiang eue, tiebtie liak, paw kieh ceu in lih mawh ka Maix pie tix bawg kawx.”

²³Nawh Cao deeh veeh ah nin ka Petrux, “Satan eue, hu plak khaix Aux maix mawh dee sideeing ka Aux, kheu ang maix keud grawng ceu pa dex dawd mai Siyiex, viang mawh nan maix keud grawng ceu pa dex dawd mai kawn pui khaing.”

²⁴Yam an Yesux ah nin ka kawncau Nawh khankix, “Phan pui tix kaux kaux simie ti hawt khaix Aux, kieh nawh thiang ti tik ka tokaux tix mai klawm khaox lhak tix mai hawt Aux heue.

²⁵Pui mawx ang ah, pa simie ti taoh ju tokaux tix, tak sang som ju heue. Pui mawx ang ah pa som ju son Aux, tak sang yaox ju heue.

²⁶Phan pui tix kaux kaux pon haktiex khawmuik mai som ju tokaux tix, sang koe bwanson ceu pa tix? Lheu khaing an, pui sang teei pa tix, taoh ka ju tix lie?

²⁷Kawn kawn pui tak sang hoek ka daux min plakngai Keeing tix, tau mai kawncau Siyiex khankix, yam an Nawh tak tawx ka pui ku kaux awm pa hoik yuh nawh heue.

²⁸Aux krai lox tete ka pex, pui pa cung tin tix blah, tak ang cim krax yum tom yaox kix Kawn kawn pui hoek ka daux Meung tix heue.”