Read kinyarwanda MATHIEX 23 Bible Online

MATHIEX 23 - kinyarwanda bible

MATHIEX 23

¹Yam an Yesux sidiex gau ka cub pui hun mai kawncau Nawh khankix, ah nin,

²“Pui tiiem lai khankix mai Pharishie khankix ngawm piang dee ngawm Mose heue.

³Ceu pa sidiex kix ka pex, pex priex mai hawt yuh heue. Viang mawh nan paw hawt yuh awm pa yuh kix. Kheu patix kien nie, kix sidiex kawx kix ang hawt yuh.

⁴Mawh heue, kix phyawk kraung pa cien, pa nu ti klawm mai deuh piang klip pui khankix heue. Viang mawh nan tokaux kix ang gah ka kraung an ka gien taix kix heue.

⁵Pa yuh kix khawmuik kix yuh sonsang yaox kawn pui khaing heue. Kheu ceep kix sibex pa vieh hau, pa sau ti deuh lai Siyiex, pa mawh sibex ting ciem tai ka heue.

⁶Kix moh dee ngawm pa mhawm dee koe pakngai dee yuh pawie khankix mai dee ngawm pa mhawm khaing paox tix ka daux nyiex dee sidiex khankix,

⁷moh ka ceu pa yaog yaw pui ka daux lah daux cau mai pa kok pui sara cao gau ka kix heue.

⁸Paw kieh pui kok pex mawh sara cao gau, kheu Sara cao gau koe tix kaux ngie khaing mai pex khawmuik ra lai mawh puxaik heue.

⁹Paw kok keeing ka pui tix kaux kawx piang haktiex in, kheu pex koe keeing tix kaux ngie khaing pa ot ka daux meung raoma heue.

¹⁰Paw kieh pui kok pex mawh cao sidiex gau, kheu pex koe cao sidiex gau tix kaux ngie, pa mawh Khrit heue.

¹¹Ka daux pex pa mie ti ting khaing paox tix, tak mawh siliex pex heue.

¹²Pui mawx ang ah, pa yaog tokaux tix ting, tak sang yeen nawh koe rhawm tiem mai pui mawx ang ah, pa deuh rhawm tokaux tix tiem, tak sang yaog nawh ting heue.”

¹³“Pui tiiem lai mai Pharishie, pui pa pie lhen khankix eue, pex tak kha rhawm, mawh kheu nyeep pex meung raoma sivoe kawn pui heue. Kheu tokaux pex kawx ang laig ka pui pa mie ti laig khankix kawx pex ang tawx akhwang khankix heue.

¹⁴Pui tiiem lai mai Pharishie pui pie lhen khankix eue, pex tak kha rhawm, kheu pex rud ti ih nyiex miexmai khankix mai yuh grang tix mai kieh lox rawg bwan tix lang, mawh kheu nan pex tak nie pon krax prawng ciyang pa ting heue.

¹⁵Pui tiiem lai mai Pharishie pui pa pie lhen khankix eue, pex tak kha rhawm. Kheu pex tiang krax rawm mai hu krax gawng sonsang pon pui pa laig ka beenli tix kaux. Khaix hoik laig nawh daux beenli, pex yuh nawh mawh kawn mawnarhok lheu khaing tokaux pex ra son heue.

¹⁶Pui dug ngai pa thong ka pui khankix eue, pex tak kha rhawm heue. Pex ah, pui mawx ang ah, phan tiextu ka nyiex bwan ang ot ceun. Viang mawh nan phan tiextu ka khri nyiex bwan, tak ceun heue.

¹⁷Pui brai pui dug ngai eue, mawh khri pa nie lheu ting lie, phan ang mawh nan mawh nyiex bwan pa kieh khri singax pa nie lheu ting lie?

¹⁸Pex ah, pui mawx ang ah pa tiextu ka khu dee tan, ang mawh tidtix. Viang mawh nan pui mawx ang ah, tiextu ka pa tan pa koe piang khu, nawh koe ceuk heue.

¹⁹Pui dug ngai eue, pa yuh ka mawx lheu ting, pa tan lie, phan ang mawh nan khu dee tan, pa kieh pa tan singax lie?

²⁰Mawh kheu nan kaw pa tiextu ka dee tan, nawh tiextu ka dee tan mai ka ceu pa koe piang dee tan khawmuik.

²¹Kaw pa tiextu ka nyiex bwan, tiextu ka nyiex bwan mai ka Kaw pa ot ka daux nyiex bwan heue.

²²Kaw pa tiextu ka raoma, tiextu ka dang ngeung Siyiex mai ka Kaw pa ngawm piang dang ngeung an heue.

²³Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex tan, taux pak haw, taux ki, taux ki la, kao son tix son, viang mawh nan pex ang yuh grawng pa ting pa koe daux lox lai beenli, pa rahsee, pa khaw caw, pa caux rhawm mai pa kaux sijax khankix heue. Pex khaw ti yuh tang ceu an khankix mai ceu in khankix kawx khaw ti yuh heue.

²⁴Pui dug ngai pa thong ka pui chix yaox eue, pex cia ti tik maing mai bleet kala-uk heue.

²⁵Pui tiiem lai mai Pharishie, pui pa pie lhen khankix eue, pex tak kha rhawm heue, kheu phak pex plak praix kawk mai tawg ngie, viang mawh nan plak daux naog mai pa rud ti teei mai yuh pa ang rahsee heue.

²⁶Pharishie pa dug ngai eue, phak plak daux kawk mai tawg ka ha, phan yuh nan plak praix kawx, tak singax heue.

²⁷Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex awm simeeig pa hoik kraix simaox ceed, pa nyawm ti jhak plak praix, viang mawh nan plak daux hoik naog si-ang pui yum mai pa seeing brai kuceu heue.

²⁸Awm an pex kawx, yam yaox pui plak praix pex, awm pa rahsee, viang mawh nan plak daux pex, naog mai pa pie lhen, pa ang rahsee kuceu heue.

²⁹Pui tiiem lai mai Pharishie, pui pa pie lhen khankix eue, pex tak kha rhawm heue, kheu pex yuh simeeig cao jhai khankix mai yuh simeeig pui rahsee kieh mhawm grang ti jhak,

³⁰ah nin, Phan ex pon ti ot ka daux bawg yam singaix tax du ex khankix, ex ang laig neuex mai kix yam hieh kix ka nham cao jhai khankix heue.

³¹Mawh kheu nan pex kham mhai rug grawng tokaux pex, grawng mawh pex kawn kix pa pah cao jhai khankix yum heue.

³²Ca kawn baox yuh pa lud pa hoik yuh tax du pex naog heue.

³³Pex pa mawh siuing, pa mawh ru siuing pa cai eue, pex sang pon ti luan khaing krax ciyang mawnarhok yuh ka mawx?

³⁴Mawh kheu nan, Aux ploi cao jhai mai pui koe pingnya pui tiiem lai khankix hoek ka pex heue. Ka kix tix blah pex tak sang teei yum mai tawk piang khaox lhak mai ka tix blah pex tak sang sivied ka daux nyiex dee sidiex pex khankix mai tukiak ka kix tix veng hoik tix veng heue.

³⁵Kheu, nham pui rahsee pa hoik lih piang haktiex in khawmuik, tak hoek piang pex, jah ka nham Abelax pa rahsee, tom sidah hoek ka nham Zakharix pa mawh kawn Barakhix, pa hoik pah pex yum sinax nyiex bwan mai khu dee tan heue.

³⁶Aux krai lox tete ka pex, ceu in khawmuik tak sang hoek piang baux ju pui yam in heue.”

³⁷“Veng Yerusaliem eue, veng Yerusaliem pa teei cao jhai khankix yum mai dheem pui pa ploi hoek ka maix ka simaox, Aux simie ti khrawm kawn praix maix, awm miex ia khrawm kawn tix greem pruik nawh miex bawg mai maix ang kieh Aux yuh.

³⁸Hoik grham nyiex pex yi ka pex heue.

³⁹Grawh grawng nawh Aux krai ka pex, khaix in pex tak ang lai baox yaox Aux, tom pex ah, Kaw pa hoek ka daux ceu kaux Simiang koe bwanson heue.”