Read kinyarwanda PINGNYAP 17 Bible Online

PINGNYAP 17 - kinyarwanda bible

PINGNYAP 17

¹Maix tak ang pon ti appong mawie ang ah, yung ang ah, pa koe dee mat dee ne mai pa koe dee laux maung ka Simiang Siyiex, mawh kheu an mawh pa seeing brai Simiang Siyiex ka.

²Ka daux sinax pex ka daux veng pa tawx Simiang Siyiex ka pex khankix mai phan sipub simex ang ah, bun ang ah, pa yuh pa caox caig ka plak sivoe ngai Simiang Siyiex mai lud ka gumlox sijax mukheu Nawh Cao,

³mai nawh hoik lih hu yuh kaing jhaw mai krub siyiex tang kaux khankix, pa mawh singaix ang ah, khix ang ah mai ceu pa koe ka daux raoma tix ceuceu pa ang Aux sax tawm khankix,

⁴mai phan an mawh pa hoik krai ka maix mai phan maix mhong ka grawng an khankix, khaix an maix tak jawg ti chawk tom kriem, phan rug mawh tete, phan grawng pa seeing brai an hoik mawh pa yuh ka daux ceu pui Isarelax khankix,

⁵khaix an maix tak teei simex an mai bun an, pa hoik yuh ceu pa caox caig an, lih ka plak praix siviex veng mai maix tak dheem yum ka simaox.

⁶Pui mawx pa keung tix yum tak kieh nawh yum awm pa kham sakse son nawh ra kaux, loe kaux, viang mawh nan, phan pa kham sakse koe tix kaux ngie tak ang pon ti kieh nawh yum.

⁷Pui pa kham sakse tak sau taix ti ka, khaix an pui hun tak sau taix ti kieh nawh yum. Mawh kheu nan maix tak teei ti tik pui caox caig khaing daux sinax pex.

⁸Phan grawng see pa kied nu tix prawng koe ka son maix, daux sinax veng ot pex, pa mawh grawng see pa pah pui, grawng see pa simah mai grawng see pa tap toi paox ti khankix, khaix an maix tak yaog ti kaoh mai haok ka dah dee pa hoik laug Simiang Siyiex,

⁹maix tak hoek ka cao giex kaing li ceu pui Lewix khankix, pa mawh cao prawng see khankix tan, ka daux baux yam an mai chawk tix yaox ka grawng an. Kix tak krai grawng lox pa sang prawng ka maix.

¹⁰Grawng pa sang prawng ca pa hoik krai kix ka maix, ka dah dee pa hoik laug Simiang Siyiex tan. Maix tak priex rhawm tix sonsang yuh maix awm gumlox pa tawm kix ka maix.

¹¹Awm grawng prawng ca pa tat kix ka maix mai awm grawng lox prawng ca pa krai kix ka maix khankix maix tak yuh awm an maix tak ang pon veeh ti hu ka plak khawn gwiex khawn dawm, khaing krax prawng ca pa hoik tat kix ka maix.

¹²Phan koe pui pa hawt ti yuh awm koe rhawm vao tix mai pa ang cu tix nghiet ka cao giex kaing li pa cung ti yuh kaing jhaw Siyiex tan, ka plak sivoe Simiang Siyiex ang ah, ka plak sivoe cao prawng see ang ah, tak kieh pui an yum, mawh kheu nan maix tak teei ti tik pui caox caig khaing daux sinax ceu pui Isarelax khankix.

¹³Pui khawmuik tak mhong mai tak koe krax lhat graung mai kix tak ang lai baox yuh ceu an khankix, ka daux pa koe rhawm vao tix khaix in sax heue.

¹⁴Yam hoek maix ka haktiex pa tawx Simiang Siyiex ka maix mai yam hoik pon ot pex ka daux an, phan maix ah nin, “Aux tak yaog ti deuh simiang tix kaux piang tix awm ceu pui khankix, pa ot hawt vung viang aux khankix.

¹⁵Maix tak yaog ti deuh simiang tix kaux, ka daux puxaik maix khankix, ka pui pa laug Simiang Siyiex. Maix tak ang pon yaog ti deuh pui tang meung pa ang mawh puxaik maix mawh simiang.

¹⁶Viang mawh nan, simiang an tak ang pon ti eei brung tom nie mai ang chix kieh pui haktiex deeh ing ka meung Ejiptux, sonsang baox nie brung eei nawh, grawh grawng nawh Simiang Siyiex hoik ah nin ka pex, pex tak ang pon ti deeh ing ka krax an.”

¹⁷Nawh tak ang pon ti koe moeng tom nie, ha rhawm nawh, veeh ti hu plak pa caox mai ang pon ti sawg mau, khri tom nie son tokaux tix.

¹⁸Yam ngawm nawh piang dangngeung meung haktiex, nawh tak tiiem thawk ti deuh gumlox been inkix ka daux phuk lai tix phuk son tokaux tix, khaing daux phuk lai pa koe ka plak sivoe cao giex kaing li, ceu pui Lewix khankix.

¹⁹Nawh tak deuh lai an mai tix, nawh tak phat an glang singaix im ju nawh khawmuik, sonsang pon gau nawh ti lhat graung ka Simiang Siyiex mai sonsang priex rien nawh ti hawt yuh awm lox inkix mai gumlox beenli inkix khawmuik,

²⁰son ang nawh pon ti lhaong rhawm ca nyhau ka puxaik pux o tix khankix mai son ang nawh veeh ti hu ka plak gwiex plak dawm khaing gumlox pingnyap in, phan yuh nan, nawh khawm kawn praix nawh tak lang ju, daux meung haktiex cao nawh mai ka daux sinax ceu pui Isarelax khankix heue.