Read kinyarwanda YOHAN 1 Bible Online

YOHAN 1 - kinyarwanda bible

YOHAN 1

¹Yam jah koe Gumlox, Gumlox an ot mai Siyiex, Gumlox an mawh Siyiex heue.

³Pa koe kuceu koe kheu yuh Nawh mai ceu pa koe pa ang Nawh yuh ang koe tix ceu kawx heue.

⁴Ka daux Nawh koe Ju Pa Im mai Ju Pa Im an mawh Pa riang kawn pui heue.

⁵Pa riang an ca jhan riang ka daux pa faik, pa faik ang chix pex kieh pa riang an yeet heue.

⁶Pui lih hoek tix kaux, pa hoik ploi hoek khaing Siyiex ceu kaux nawh mawh Yohan heue.

⁷Nawh hoek ti mawh cao kham mhai rug, sonsang pon nawh ti kham mhai rug grawng pa riang, yuh ka mawx sonsang yum rhawm pui khawmuik kheu nawh heue.

⁸Nawh ang mawh pa riang, viang mawh nan nawh hoek ti kham mhai rug grawng pa riang heue.

⁹pa riang tete, pa chix tawx pa riang ka kawn pui ku kaux, hoik hoek piang haktiex heue.

¹⁰Nawh hoik ot ka piang haktiex, haktiex in mawh pa yuh Nawh, viang mawh nan haktiex in ang tawng ka Nawh heue.

¹¹Nawh hoek ka cie Nawh, kix pa mawh cie Nawh ang rieb Nawh.

¹²Pui pa rieb ka Nawh, pui pa yum rhawm ka ceu kaux Nawh khankix Nawh tawx akhuang kieh mawh kawn Siyiex heue.

¹³Kaw an keh kheu nham ang mawh, kheu alo nex ang mawh, kheu alo kawn pui ang mawh, mawh kheu Siyiex heue.

¹⁴Gumlox an hoik lih mawh Nex mai ot sinax ex, ex pon yaox min pakngai Nawh, pa awm min pakngai kawn Keeing Cao tix kaux khaing, pa naog bwanson pa mawh meh heue.

¹⁵Yohan kham mhai rug grawh grawng Nawh, kok yo ah nin, “In mawh kaw pa krai aux, kaw pa tak sang hoek khaix aux nie ting khaing aux, kheu hoik dawg koe Nawh ka aux heue.”

¹⁶Mawh kheu pa naog daux Nawh, ex khawmuik hoik pon, bwanson piang bwanson heue.

¹⁷Grawh grawng nawh, lox lai beenli hoik tawx ka Mose, bwanson pa mawh meh hoik lih hoek kheu Yesux Khrit heue.

¹⁸Yam mawx ang ah, pui ang sax yaox Siyiex tix kaux kawx. Mawh Kawn Cao tix kaux khaing pa ot piang naok Keeing Cao, mawh pa hoik plak jhi kieh tawng Nawh heue.

¹⁹In mawh mhai rug pa kham Yohan, yam ploi pui Yudax cao giex kaing li kix pui Lewix khankix hu khaing veng Yerusaliem ti sang chawk ka nawh, “Maix mawh mawx?”

²⁰Yohan ang mox mai krai sidawng ah nin, “Aux ang mawh Cao Khrit”

²¹Kix baox chawk nawh, “Phan mawh nan maix mawh pui yuh ka mawx? Maix mawh Eliyax lie?” Nawh baox ah nin, “Aux ang mawh” “Maix mawh Cao jhai an lie?”? Nawh baox deeh pawk lox in, “Ang mawh heue.”

²²Kix baox ah nin ka nawh, “Maix mawh mawx? Krai ka ex liak, sonsang koe ex lox ti sang krai ka pui pa ploi ex hoek. Sang ah maix ka grawng tokaux tix yuh ka mawx?”

²³Nawh baox ah nin, “Aux mawh, Lox pa kok yo daux tiag, kieh krax Simiang rahsee heue.Awm lox pa hoik krai cao jhai Isayax”

²⁴Pui pa hoik ploi kix hoek khankix mawh Pharishie.

²⁵Kix baox chawk ka nawh ah nin, “Phan maix ang mawh Cao Khrit, ang mawh Eliyax, ang mawh Cao jhai an, yuh patix maix lai cubcom pui ka rawm lie?”

²⁶Yohan baox pawk lox ah nin, “Aux cubcom ka daux rawm heue, viang mawh nan koe Kaw pa ot sigreung pex tix kaux, pa ang pex tawng.

²⁷Mawh Nawh heue, pa hoek khaix aux, pa nie ting khaing aux, pie maox kiep Nawh ang aux keung ti kah”

²⁸Ceu in mawh pa yuh daux yaong Betanix, plak toi rawm Yawdan ka dee cubcom Yohan heue.

²⁹Singaix pasax Yohan yaox Yesux hoek ka nawh ah nin, “Jhak ka Kawn Yung Siyiex pa teei phimap haktiex hu heue.

³⁰Nawh mawh pa hoik krai aux, Kaw pa tak sang hoek khaix aux nie ting khaing aux, kheu hoik dawg koe Nawh ka aux heue.

³¹Aux ang tawng Nawh glang ka an, viang mawh nan sonsang tawng pui Isarelax ka Nawh aux tom hoek ti tawx cubcom heue.”

³²Yohan kham mhai rug ah nin, “Aux hoik yaox Khuan Cao lih khaing raoma awm sikaux tum piang Nawh.

³³Aux ang tawng Nawh glang ka an, viang mawh nan Kaw pa ploi aux hoek tawx cubcom, hoik ah nin ka aux, maix tak yaox Khuan singax lih ot piang Nawh, maix tak tawng nawh mawh cao cubcom ka daux Khuan Singax heue.

³⁴“Ceu in aux hoik yaox mai aux kham mhai rug grawng mawh Nawh Kawn Siyiex heue.”

³⁵Singaix pasax Yohan baox deeh cung tau mai kawncau nawh ra kaux.

³⁶Nawh jhak yam hu Yesux ah nin, “Jhak ka Kawn Yung Siyiex heue.”

³⁷Kawncau ra kaux an mhong lox pa ah nawh mai kiex hawt khaix Yesux heue.

³⁸Yesux deeh gi mai yaox kiex hawt khaix tix, Nawh ah nin, “Sawg pax patix?” Kiex deeh ah nin ka Nawh Cao. “Rabi eue, ot Maix dee mawx?”

³⁹Nawh baox ah nin ka kiex, “Hoek! pax tak sang yaox heue.” Mawh kheu nan kiex hu mai yaox dee ot Nawh Cao kheu hoik hoek bawg yam kao taix, singaix an kiex tom ot mai Nawh heue.

⁴⁰Daux kiex ra kaux pa mhong lox krai Yohan hawt khaix Nawh Cao, tix kaux mawh Andare pux Simon Petrux.

⁴¹Dom an nawh sawg ti yaox puxke nawh Simon mai ah nin ka nawh, “Ex hoik yaox “Misiyax” dee bleeh “Misiyax” mawh “Cao Taoh”.

⁴²Andare viex puxke tix Simon hoek ka Yesux heue. Yesux jhak ka nawh ah nin, “Maix mawh Simon kawn Yonax, tak sang kok maix mawh Kephax heue.” (Dee bleeh Kephax mawh Petrux dee bleeh Petrux mawh Rang.)

⁴³Singaix pasax Yesux koe rhawm ti hu daux Meung Galilie mai Nawh Cao yaox Philipux mai ah nin ka nawh, “Hawt Aux heue.”

⁴⁴Philipux mawh pui Biesedax veng dee ot Andare Petrux heue.

⁴⁵Philipux sawg ti yaox Nasanilax mai ah nin ka nawh, “Ex hoik yaox Kaw pa hoik tiiem Mose grawng Nawh ka daux lai beenli pa hoik tiiem cao jhai khankix kawx grawng Nawh, pa mawh Yesux kawn Yosiep pui veng Nazariet heue.”

⁴⁶Nasanilax baox chawk ah nin ka nawh, “Ceu pa mhawm chix lih ka daux veng Nazariet tix ceu ceu lie?” Philipux baox ah nin ka nawh, “Hoek ti jhak heue.”

⁴⁷Yesux yaox pa hoek Nasanilax ka tix ah nin, “Jhak heue, pui Isarelax tete, pa ang chix pie lhen”

⁴⁸Nasanilax chawk ah nin ka Nawh Cao, “Maix tawng aux yuh ka mawx?” Yesux deeh pawk lox ka nawh ah nin, “Ka ang Philipux nyang bax kok maix, yam ot maix greem khaox ruh, Aux hoik dawg yaox maix heue.”

⁴⁹Nasanilax baox pawk lox ah nin ka Nawh, “Rabi eue, Maix mawh Kawn Siyiex, Simiang pui Isarelax heue.”

⁵⁰Yesux pawk lox ah nin ka nawh, “Kheu hoik krai Aux ka maix, Aux yaox maix ot greem khaox ruh maix tom yum rhawm kah lie? Maix tak sang pon ti yaox ceu pa nie lheu ting khaing in sax heue.”

⁵¹Nawh Cao baox ah nin ka nawh, “Aux krai lox tete ka maix, khaix in maix tak sang yaox baoh raoma mai kawncau Siyiex haok haok lih lih, ka piang Kawn kawn pui heue.”