Read kinyarwanda YOHAN 11 Bible Online

YOHAN 11 - kinyarwanda bible

YOHAN 11

¹Pui tix kaux saux, pa mawh Lazarux pui yaong Betanix, dee ot Mathax mai pux nawh Marix heue.

²In mawh Marix pa hoik teei sidah bhawng kraix ka Simiang mai teei hauk kaing tix awt ka caong Nawh Cao. Mawh prie nawh Lazarux pa koe jhawm saux heue.

³Mawh kheu nan, nan kiex ploi pui hu ka Nawh Cao ah nin, “Simiang eue, kaw pa moh Maix koe jhawm saux heue.”

⁴Yam mhong Yesux lox an Nawh Cao ah nin, “Jhawm saux an ang mawh jhawm saux tom yum, viang mawh nan mawh jhawm saux sonsang sidawng min pakngai Siyiex, sonsang koe min pakngai Kawn Siyiex heue.”

⁵Yesux moh Mathax khawm prie nawh Lazarux heue.

⁶Viang mawh nan yam hoik mhong Nawh grawng saux Lazarux, Nawh baox ot dee ot tix tan ra singaix.

⁷Khaix an Nawh ah nin ka kawncau Nawh khankix, “Ex deeh hu daux meung Yudax tix bawg heue.”

⁸Kawncau Nawh khankix ah nin ka Nawh, “Rabi eue, pui Yudax khankix sawg ti dheem Maix ka simaox, tak khraox mawh yam in Maix khex sang baox deeh hu tan tix bawg lie?”

⁹Yesux deeh pawk lox ah nin, “tix singaix koe kao ra nari ang mawh lie? Pui mawx ang ah, phan hu yam pon ngaix ang lai sideeing caong tix kheu yaox nawh pa riang haktiex in.

¹⁰Viang mawh nan, pui mawx ang ah, phan hu yam ponsawm sideeing caong tix, mawh kheu ang pa riang koe ka daux nawh”

¹¹Khaix an Nawh Cao baox ah nin ka kix, “Paox grawm ex Lazarux hoik laig it, viang mawh nan Aux sang hu so nawh siduad khaing pa it nawh heue.”

¹²Mawh kheu nan kawncau Nawh khankix ah nin ka Nawh, “Simiang eue, phan nawh hoik laig it nawh tak sang moi heue.”

¹³Yesux hoik krai grawng pa hoik yum nawh, viang mawh nan kix ce Nawh krai grawng laux lee ti it khaing.

¹⁴Kheu nan Yesux tom krai sidawng ka kix yam an ah nin, “Lazarux hoik yum,

¹⁵Aux gaux rhawm son pex, kheu ang Aux ot tan, pex tak sang yum rhawm kah, Ex hu ka nawh heue.”

¹⁶Kheu nan Thomax pa kaux Didumux. Ah nin ka paox kawncau tix khankix, “Ex hu tau uik, ex tom yum tau mai nawh heue.”

¹⁷Yam hoek Yesux tan, sipaung Lazarux daux simeeig hoik koe pon ngaix heue.

¹⁸Yaong Betanix dex veng Yerusaliem been ra lag.

¹⁹Pui Yudax, hun hoek ka Mathax mai Marix, sonsang khu rhawm kiex kheu yum prie kiex heue.

²⁰Mawh kheu nan yam mhong Mathax grawng sang hoek Yesux, nawh hu rieb ka Nawh Cao, viang mawh nan Marix kawn ngawm ka daux nyiex heue.

²¹Mathax ah nin ka Yesux, “Simiang eue, phan Maix ot tin prie aux tak ang yum.

²²Pie yam in kawx, aux tawng Maix rawg ka Siyiex ceu patix ang ah, Siyiex tak tawx ka Maix heue.”

²³Yesux ah nin ka nawh, “Prie maix tak deeh kaoh im heue.”

²⁴Mathax deeh ah nin ka Nawh Cao, “Aux tawng grawng sang deeh kaoh im nawh, yam deeh kaoh im pui yum singaix sidah sax heue.”

²⁵Yesux baox ah nin ka nawh, “Aux mawh ceu pa deeh kaoh im ju heue. Pui pa yum rhawm ka Aux, viang nawh hoik yum kawx, tak sang im heue.

²⁶Pui pa kawn im ku kaux, pa yum rhawm ka Aux, tak ang yum tix bawg kawx. Yum rhawm maix ka lox in lie?”

²⁷Nawh deeh ah nin ka Nawh Cao, “Mawh heue, Simiang, Aux hoik yum rhawm grawng mawh Maix Cao Khrit Kawn Siyiex. Kaw pa hoek piang haktiex in heue.”

²⁸Khaix hoik ah nawh nan, nawh briex hu kok pux nawh Marix ah nin, “Cao Gau hoik hoek, Nawh kok maix heue.

²⁹Yam mhong nawh lox an Marix nied ti kaoh hu ka Nawh Cao heue.

³⁰Yam an Yesux ang nyang hoek ka daux yaong, viang mawh nan Nawh kawn ot dee hoik rieb Mathax ka Nawh.

³¹Pui Yudax khankix pa ot tau mai Marix daux nyiex pa khu rhawm nawh, yam yaox kix lih Marix, kix nied ti kaoh hawt khaix nawh, kheu ce kix nawh sang hu yiiem ka dee simeeig heue.

³²Mawh kheu nan yam hoik hoek Marix ka dee ot Yesux yaox Nawh, nawh krub dex caong Nawh Cao ah nin, “Simiang eue, phan Maix ot tin prie aux tak ang yum”

³³Yam yaox Yesux pa yiiem Marix, pui Yudax mai pa hoek ka nawh khanix, Nawh Cao ngia daux rhawm tix kied koe krax khi rhawm heue.

³⁴Chawk ah nin, “Pex sipaung nawh dee mawx?” Kix deeh ah nin ka Nawh, “Simiang eue, hoek ti jhak heue.”

³⁵Yesux yiiem heue.

³⁶Mawh kheu nan pui Yudax khankix ah nin, “Jhak yaox, Nawh phex moh nawh miex ding”

³⁷Viang kix tix blah ah nin, “Nawh kieh pui dug ngai chix blah, son ang Lazarux sang yum Nawh ang chix yuh lie?”

³⁸Mawh kheu nan Yesux baox ngia daux rhawm tix, tix bawg, yam bleeh ka simeeig daux rang hoik thox daux ka simaox.

³⁹Yesux ah nin, “Greed ti tik simaox an heue.” Mathax, nan kaw pa hoik yum an ah nin ka Nawh Cao, “Simiang eue, yam in nawh tee hoik cux sium, kheu nawh yum hoik koe pon ngaix heue.”

⁴⁰Yesux ah nin ka nawh, “Aux hoik krai phan maix yum rhawm maix tak yaox min pakngai Siyiex ang mawh lie?”

⁴¹Kix greed ti tik simaox an. Yesux maong ah nin, “Keeing eue, Aux yaog yaw bwanson Maix kheu hoik nghiet Maix lox Aux.

⁴²Aux tawng grawng nghiet Maix lox Aux jheung jheung, viang yuh ka mawx kawx sonsang yum rhawm pui pa cung sivie tin, grawng pa ploi Maix Aux hoek, Aux tom ah nin”

⁴³Khaix ah Nawh nan, Nawh Cao yo lox ting sinum ah nin, “Lazarux eue, lih hoek heue.”

⁴⁴Kaw pa hoik yum an lih hoek. Taix caong nawh hoik pua ka man simeeig mai pakngai nawh hoik vien ka man pha ced. Yesux ah nin ka kix, “Yah ti ploi nawh heue.”

⁴⁵Mawh kheu nan pui Yudax pa hun hoek ka Marix pon ti yaox ceu pa yuh Nawh, yum rhawm ka Nawh heue.

⁴⁶Viang mawh nan kix tix blah hu ka Pharishie khankix krai kix mhong grawng ceu pa hoik yuh Yesux.

⁴⁷Mawh kheu nan cao giex kaing li mai Pharishie khankix, khrawm paox tix kum ah nin, “Ex sang yuh ka mawx son Kaw in, mhai daox am yuh Nawh kied nie heue.

⁴⁸Phan ex grham Nawh yuh nin, pui khawmuik tee yum rhawm ka Nawh, pui Romax tee rud ti teei dee ot ex khawm pui ex heue.”

⁴⁹Ka daux cub kix pui tix kaux, pa kaux Kayaphax, pa mawh cao giex kaing li pa ting piang paox tix khawmuik ka daux num an, ah nin ka kix, “Pex ang tawng tidtix.

⁵⁰Ang pex keud grawng pa yum pui tix kaux khaing son pui khawmuik, son ang pui Yudax sang laux leeing khawmuik, nie lheu mhawm son pex heue.”

⁵¹Lox pa ah nawh an ang mawh lox pa lak keud tokaux nawh ti ah, viang mawh nan kheu yuh nawh cao giex kaing li pa ting piang paox tix ka daux num an, nawh tom hoik krai lox jhai grawng pa tak sang yum Yesux son pui ceu an heue.

⁵²Ang joeng mawh ngie son pui ceu an, viang mawh nan mawh sonsang deeh khrawm kawn Siyiex khankix pa hoik prung prang ku dah dee kieh mawh tix mu khaing.

⁵³Mawh kheu nan jah tom singaix an kix kum paox tix sonsang pah Nawh yum heue.

⁵⁴Mawh kheu nan khaix an Yesux ang lai hu sidawng sinax pui Yudax, Nawh lih khaing tan hu dee dex daux tiag, ka daux veng Epharim ot tau mai kawncau Nawh khankix.

⁵⁵Yam an dex hoek pawie Pasakha pui hun Yudax khankix lih khaing yaong dee ot kix haok ka veng Yerusaliem ka sang yuh pawie Pasakha, sonsang kieh tokaux tix singax heue.

⁵⁶Mawh kheu nan kix tom sawg Yesux yam cung kix ka daux nyiex bwan tix kaux lai tix kaux chawk ka paox ti ah nin, “Pex ce yuh ka mawx? Nawh sang hoek ka daux pawie in lie?”

⁵⁷Yam an cao giex kaing li pa ting khankix mai Pharishie khankix hoik tawm lox phan pui tix kaux kaux tawng dee ot Nawh Cao nhie kix krai, sonsang giex kix Nawh heue.