Read kinyarwanda YOHAN 13 Bible Online

YOHAN 13 - kinyarwanda bible

YOHAN 13

¹Ka sang yuh pawie Pasakha Yesux tawng nari bawg yam tak sang lih hu Nawh khaing haktiex hu ka Keeing Cao hoik hoek. Mawh kheu moh Nawh cie Nawh pa ot piang haktiex in, Nawh moh tom sidah heue.

²Yam ih kix priex bo, kheu phi caox hoik sau pa keud pa sawn ka daux rhawm Yudax Isakariut, pa mawh kawn Simon, sonsang tik tawx nawh Yesux heue.

³Yesux hoik tawng grawh grawng Keeing Cao hoik tawx khawmuik ka daux tawm taix Nawh grawng hoik lih hoek Nawh khaing Siyiex grawng tak sang deeh hu ka Siyiex.

⁴Nawh Cao kaoh khaing pheen peeik kraung ceep tix mai teei man pha ced nhawt ka nyoi tokaux tix.

⁵Khaix an Nawh teei rawm prauk sau ka daux klong ting jah ti khoek caong kawncau Nawh khankix awt caong kix ka man pha ced pa hoik nhawt Nawh ka nyoi tix heue.

⁶Yam hoek Nawh ka Simon Petrux, Petrux ah nin ka Nawh Cao, “Simiang eue, Maix khex sang khoek caong aux lie?”

⁷Yesux baox pawk lox ah nin ka nawh, “Grawh grawng pa yuh Aux ang maix nyang tawng yam in, viang mawh nan maix koi tawng khaix in sax”

⁸Petrux baox ah nin ka Nawh Cao, “Ang aux doh kieh Maix khoek caong tix, tix bawg kawx” Yesux baox pawk lox ah nin ka nawh, “Phan Aux ang khoek caong maix, maix ang dex dawd mai Aux heue.”

⁹Simon Petrux baox ah nin ka Nawh Cao, “Simiang eue, ang joeng mawh ngie caong aux khaing, viang khawm taix khawm kaing aux kawx khoek ka liak”

¹⁰Yesux baox ah nin ka nawh, “Kaw pa hoik heem tix lo ngie pa khoek caong nawh khaing nawh hoik singax khawm kaux tix khawmuik. Pex hoik singax, viang mawh nan pex singax khawmuik ang mawh”

¹¹Mawh kheu hoik tawng Nawh kaw pa sang tik sang tawx Nawh, mawh kheu nan Nawh tom ah, “Pex singax khawmuik ang mawh”

¹²Khaix hoik khoek Nawh caong kix hoik deeh ceep kraung tix, Nawh Cao deeh ngawm neung ah nin ka kix, “Pex tawng grawh grawng pa hoik yuh Aux ka pex lie?

¹³Pex kok Aux mawh, Simiang cao gau pa ah pex caw tix, kheu mawh Aux nan heue.

¹⁴Phan Aux pa mawh Simiang cao gau hoik khoek caong pex, viang pex kawx khaw ti khoek ka caong paox tix, tix kaux lai tix kaux heue.

¹⁵Grawh grawng nawh, Aux hoik tawx pex riang dee sang hawt jawh, yuh ka mawx sonsang hawt yuh pex awm pa hoik yuh Aux ka pex heue.

¹⁶Aux krai lox tete ka pex, siliex ang lheu ting khaing simiang nawh kaw pa hu ang lheu ting khaing cao pa ploi nawh hu.

¹⁷Phan pex tawng ceu in khankix, phan pex hawt yuh, pex ting bwanson heue.

¹⁸Ang Aux krai grawh grawng pex khawmuik. Aux tawng pui pa hoik laug Aux heue, viang mawh nan yuh ka mawx sonsang naog lox Phuk lai singang khri pa ah nin, Kaw pa ih blah Aux, yaog loek caong tix tiied ka Aux heue.

¹⁹Jah tom yam in khaix in Aux sang grux krai ka pex grawh grawng ceu pa tak sang hoek ti mawh, ka ang nyang bax mawh, yuh ka mawx yam lih mawh ceu an, pex tak sang yum rhawm grawng mawh Aux Kaw an heue.

²⁰Aux krai lox tete ka pex, kaw pa rieb ti teei pui pa ploi Aux hu, rieb ti teei Aux heue. Kaw pa rieb ti teei Aux, rieb ti teei ka Kaw pa ploi Aux hoek heue.”

²¹Khaix hoik krai Yesux ceu an, Nawh koe krax khi rhawm daux khuan tix kham mhai rug ah nin, “Aux krai lox tete ka pex, ka daux pex tix kaux tak sang tik sang tawx Aux heue.”

²²Kawncau Nawh khankix tix kaux lai tix kaux jhak ka paox tix keud jee keud blaong grawh grawng sang ah Nawh ka pui mawx.

²³Ka dex pheen tan kawncau daux kawncau Nawh tix kaux, neung ka piang naok Yesux, pa moh Yesux kah.

²⁴Mawh kheu nan Simon Petrux yib taix ka nawh ah nin, “Krai ex mhong liak, Nawh sang ah grawh grawng pui mawx?”

²⁵Nawh deeh neung piang naok Yesux chawk Nawh ah nin, “Simiang eue, mawh pui mawx?”

²⁶Yesux tom baox pawk lox ah nin, “Mawh kaw pa sang teei Aux blah tix bliah tawx ka nawh, khaix cub Aux daux klong heue.” Mawh kheu nan Nawh Cao teei blah tix bliah khaix hoik cub, Nawh tawx ka Yudax Isakariut kawn Simon heue.

²⁷Khaix hoik teei nawh blah an, Satan laig ka daux nawh, Yesux ah nin ka nawh, “Ceu pa sang yuh maix, nied ti yuh laung laung heue.”

²⁸Yam an pui pa ot ka pheen ang tawng tix kaux kawx Nawh sang ah nin ka nawh kheu ceu patix.

²⁹Tiblah ce nawh mawh kheu priex Yudax hau mau, yam ah Yesux nan, Nawh Cao nhie nawh, “Hu liag ceu pa lo ex son pawie” Phan ang mawh nan, kieh nawh tawx tix ceu ceu ka pui hot pui sia heue.

³⁰Khaix hoik teei Yudax blah an, nawh lih hu dom mawx dom an. Bawg yam an mawh yam ponsawm.

³¹Khaix hoik lih hu nawh, Yesux ah nin, “Yam in hoik kieh Kawn kawn pui koe min pakngai hoik kieh Siyiex koe min pakngai ka daux Nawh heue.

³²Phan Siyiex koe min pakngai ka daux Nawh, Siyiex tak kieh Nawh koe min pakngai ka daux tokaux tix Nawh tak sang kieh Nawh koe min pakngai yam in heue.

³³Kawn nyawm Aux eue, Aux kawn ot mai pex tivud khaing. Pex tak sang sawg Aux awm hoik krai Aux ka pui Yudax khankix, Dee sang hu Aux pex ang pon ti hoek kah, Aux tom krai ka pex yam in heue.

³⁴Aux tawx gumlox pingnyap pa khraox ka pex, sonsang moh pex paox tix, tix kaux lai tix kaux, awm hoik moh Aux ka pex, sonsang moh pex paox tix, tix kaux lai tix kaux heue.

³⁵Phan pex tix kaux lai tix kaux moh paox tix, pui khawmuik tak tawng pex mawh kawncau Aux, kheu grawng an heue.”

³⁶Simon Petrux baox chawk Nawh Cao ah nin, “Simiang eue, Maix sang hu dee mawx?” Yesux pawk lox ah nin, “Dee sang hu Aux maix ang pon ti hawt Aux yam in, viang mawh nan maix tak sang pon ti hawt Aux khaix in heue.”

³⁷Petrux baox chawk ah nin ka Nawh Cao, “Simiang eue, mawh kheu patix aux ang pon ti hawt Maix yam in? Aux koe rhawm ti sang tik sang deuh ju tix yum son Maix heue.”

³⁸Yesux baox pawk lox ah nin, “Maix koe rhawm ti sang tik sang deuh ju tix yum son Aux lie? Aux krai lox tete ka maix, ka ang ia nyang ux maix tak sang thiang ti tik vud Aux loe bawg heue.”