Read kinyarwanda YOHAN 14 Bible Online

YOHAN 14 - kinyarwanda bible

YOHAN 14

¹“Paw kieh rhawm pex koe krax khi rhawm, yum rhawm ka Siyiex, ka Aux kawx yum rhawm heue.

²Daux nyiex Keeing Aux koe lawg haoh hun, phan ang mawh nan Aux tak hoik krai ka pex, mawh kheu sang hu cox Aux dee ot son pex.

³Phan Aux hu cox dee ot son pex, Aux tak deeh hoek teei pex hu sonsang ot tau mai Aux, pex kawx sang pon ti ot dee ot Aux heue.

⁴Pex tawng krax dee pa sang hu Aux”

⁵Thomax baox ah nin ka Nawh Cao, “Simiang eue, ex ang tawng dee sang hu Maix, ex khex chix tawng krax yuh ka mawx?”

⁶Yesux baox pawk lox ah nin ka nawh, “Aux mawh daux krax pa mawh meh mai ju heue. Phan ang mawh daux Aux pui tix kaux kawx ang pon ti hoek ka Keeing Cao.

⁷Phan pex hoik tawng ka Aux, viang mawh Keeing Aux kawx pex tak tawng heue. Jah tom yam in pex tawng Nawh hoik yaox ka Nawh Cao”

⁸Philipux ah nin ka Nawh, “Simiang eue, jhi ex yaox Keeing Cao liak, sonsang fah rhawm ex kah”

⁹Yesux baox ah nin ka nawh, “Philipux eue, Aux hoik ot mai pex nie grheung nie grhaoh maix khex ang tawng Aux lie? Pui pa hoik yaox ka Aux, hoik yaox ka Keeing Cao, yuh ka mawx maix lai ah, Jhi ex yaox Keeing Cao?

¹⁰Ang maix yum rhawm grawh grawng ot Aux ka daux Keeing Cao mai ot Keeing Cao ka daux Aux lie? Gumlox pa krai Aux khankix ang lai mawh lox pa kaoh khaing Aux. Viang mawh nan, mawh Keeing Cao pa ot ka daux Aux pa yuh kaing heue.

¹¹Yum rhawm ka grawh grawng ot Aux ka daux Keeing Cao grawng pa ot Keeing Cao ka daux Aux. Phan pex ang yum rhawm ka lox krai Aux yum rhawm kheu kaing yuh Aux khankix awx.

¹²Aux krai lox tete ka pex, kaw pa yum rhawm ka Aux tak sang yuh kaing pa yuh Aux nawh tak sang yuh kaing pa nie lheu ting khaing inkix, kheu sang hu Aux ka Keeing Cao heue.

¹³Pex sang rawg sang mhaing ceu patix ang ah, ka daux ceu kaux Aux, Aux tak sang yuh heue, yuh ka mawx sonsang koe min pakngai Keeing Cao, ka daux Kawn Cao heue.

¹⁴Phan pex rawg mhaing tix ceu ceu ka daux ceu kaux Aux, Aux tak sang yuh heue.

¹⁵Phan pex moh ka Aux, pex tak sang priex ti hawt lox pa tawm Aux khankix heue.

¹⁶Aux tak sang rawg mhaing ka Keeing Cao Nawh tak sang tawx Cao Teem ka pex tang kaux, sonsang ot Nawh mai pex leeing ju,

¹⁷pa mawh Khuan pa dex mai pa mawh meh heue. Kheu haktiex ang tawng ang yaox Nawh, tom ang pon ti rieb ti teei Nawh. Viang mawh nan pex tawng Nawh kheu ot Nawh mai pex, Nawh tak ot ka daux pex heue.

¹⁸Ang Aux lai prah ti kieh pex mawh kawn doe, Aux tak sang deeh hoek ka pex heue.

¹⁹Khaix in ang rheung haktiex in ang lai pon ti yaox Aux, viang mawh nan pex tak yaox Aux, kheu im ju Aux, pex kawx tak sang im ju heue.

²⁰Ka daux singaix an, pex tak sang tawng grawng pa ot Aux ka daux Keeing Aux grawng pa ot pex ka daux Aux grawng pa ot Aux ka daux pex heue.

²¹Kaw pa pon lox tawm Aux khankix priex ti hawt, mawh kaw pa moh ka Aux kaw pa moh ka Aux, Keeing Aux tak moh ka nawh Aux ka moh nawh plak jhi tokaux Aux ka nawh heue.”

²²Yudax, (Pa ang mawh Yudax Isakariut) chawk ah nin ka Nawh Cao, “Simiang eue, Maix jhi yix yaox tokaux tix Maix ang jhi haktiex yaox yuh ka mawx?”

²³Yesux pawk lox ah nin ka nawh, “Phan pui moh ka Aux nawh tak sang priex ti hawt gumlox Aux, Keeing Aux tak moh ka kaw an, Yiex tak hoek ka nawh mai ot tau mai nawh heue.

²⁴Kaw pa ang moh ka Aux ang priex ti hawt gumlox Aux khankix, gumlox pa mhong pex ang mawh lox Aux, viang mawh nan mawh lox Keeing Cao pa ploi Aux hoek heue.

²⁵Aux hoik krai lox ceu in khankix ka pex, yam kawn ot Aux tau mai pex.

²⁶Viang mawh kawx nan, Cao Teem pex, pa mawh Khuan Singax Singeh, pa tak sang ploi Keeing Cao hoek ka daux ceu kaux Aux, Nawh tak sang gau pex kuceu khawmuik kieh pex doh keud ka lox pa hoik krai Aux ka pex khawmuik heue.

²⁷Aux deuh pa nhim mai pex, pa nhim Aux, Aux tawx ka pex. Pa tawx Aux ka pex ang awm pa tawx haktiex. Paw kieh rhawm pex koe krax khi rhawm, viang krax lhat graung kawx paw kieh koe awx.

²⁸Pex hoik mhong lox pa hoik krai Aux ka pex, viang Aux lih hu yam in, Aux tak sang deeh hoek ka pex heue. Phan pex moh Aux, pex sang gaux rhawm kheu hu Aux ka Keeing Cao, grawh grawng nawh Keeing Cao nie lheu ting khaing Aux heue.

²⁹Yam in Aux hoik grux krai ka sang hoek nawh ti mawh, sonsang yum rhawm pex yam tak hoek ceu an ti mawh heue.

³⁰Khaix in Aux tak ang lai baox sikah mai pex tom nie, kheu simiang haktiex sang hoek. Viang hoek kawx ang nawh koe tidtix ka daux Aux.

³¹Viang mawh nan son sang tawng haktiex grawng pa moh keeing Cao mai grawng yuh Aux awm lox tawm jhawm krai Keeing Cao heue. Kaoh ex lih hu khaing tin heue.”