Read kinyarwanda YOHAN 15 Bible Online

YOHAN 15 - kinyarwanda bible

YOHAN 15

¹“Aux mawh nhu plix siiet pa mawh meh Keeing Aux mawh cao pa pau sipeem.

²Kak pa ang plix kukak Nawh kid titik, kak pa plix kukak sonsang nie chix plix khaing in, Nawh cox pawt mhawm mhawm heue.

³Yam in pex hoik singax, kheu lox pa hoik krai Aux ka pex.

⁴Ot ka daux Aux mai Aux ot ka daux pex. Awm kak ang chix plix nong nong phan nawh ang ot ka daux nhu miex, awm an phan pex ang ot ka daux Aux, pex ang chix plix.

⁵Aux mawh nhu plix siiet, pex mawh kak khankix heue. Kaw pa ot ka daux Aux mai Aux ot ka daux nawh, chix plix plix haoh hun. Grawh grawng nawh phan pex tang tiah khaing Aux, pex ang chix yuh tidtix heue.

⁶Phan pui ang ot ka daux Aux, teei titik nawh awm kak pa kroh hu heue. Pui khrawm kak khankix taing daux ngu mai gleeing kix heue.

⁷Phan pex ot ka daux Aux mai gumlox Aux ot ka daux pex, pex simie ti rawg ceu patix ang ah, rawg heue. Tak sang yuh son pex.

⁸Keeing Aux koe min plakngai, kheu pa plix pex plix haoh hun pex tak mawh kawncau Aux heue.

⁹Awm hoik moh Keeing Cao ka Aux, Aux kawx hoik moh ka pex heue. Pex ot ka daux pa moh Aux awx.

¹⁰Phan pex priex ti hawt lox pa tawm Aux khankix, pex tak ot ka daux pa moh Aux heue. Awm Aux kawx hoik priex ti hawt lox tawm Keeing Cao khankix ot ka daux pa moh Nawh heue.

¹¹Aux hoik krai lox ceu in khankix ka pex, yuh ka mawx sonsang ot pa gaux rhawm Aux ka daux pex sonsang naog krax gaux rhawm pex heue.

¹²In mawh lox pa tawm Aux, pex tix kaux lai tix kaux moh paox tix, awm pa hoik moh Aux ka pex heue.

¹³Krax moh pa lheu ting khaing pa deuh pui ju tix yum son paox grawm tix khankix ang koe.

¹⁴Phan pex hawt yuh ceu pa hoik tawm Aux ka pex, pex mawh paox grawm Aux khankix heue.

¹⁵Aux ang lai baox kok pex mawh siliex, kheu ang siliex tawng pa yuh simiang tix. Viang mawh nan Aux hoik kok pex mawh paox grawm, kheu hoik kieh Aux pex tawng can ceu pa hoik mhong Aux khaing Keeing Cao khawmuik heue.

¹⁶Pex laug ti teei Aux ang mawh, viang mawh nan Aux hoik laug ti teei pex hoik ciak ti deuh pex, yuh ka mawx sonsang hu plix pex plix sonsang kaux cong plix pex heue. Kheu pex sang rawg ceu patix ang ah, ka Keeing Cao ka daux ceu kaux Aux, Nawh sang tawx ka pex.

¹⁷Aux hoik tawm ceu in khankix ka pex, sonsang moh pex paox tix, tix kaux lai tix kaux heue.

¹⁸Phan haktiex in koeng ka pex. Pex tawng grawh grawng haktiex hoik koeng ka Aux, ka sang koeng ka pex heue.

¹⁹Phan pex dex dawd mai haktiex, haktiex tak moh ka pex, viang mawh nan kheu ang pex dex dawd mai haktiex, kheu hoik laug Aux ti teei pex lih khaing haktiex, haktiex tom koeng ka pex heue.

²⁰Doh keud ka lox pa hoik krai Aux ka pex, Siliex ang lheu ting khaing simiang nawh. Phan kix hoik tuktiak tukte ka Aux, viang pex kawx, kix tak sang tuktiak tukte kah heue. Phan kix hoik priex ti hawt gumlox Aux, viang lox pex kawx kix tak sang priex ti hawt heue.

²¹Viang mawh nan kix tak sang yuh ceu in khawmuik ka pex, kheu ceu kaux Aux, in mawh kheu ang kix tawng ka Kaw pa ploi Aux hoek heue.

²²Phan Aux ang hoek ang sidiex ang gau ka kix, kix ang koe phimap, viang mawh nan yam in kix ang koe dee du grawh grawng phimap kix heue.

²³Pui pa koeng ka Aux, viang ka Keeing Aux kawx, kix koeng kah heue.

²⁴Phan Aux ang yuh kaing pa ang pui tang kaux sax yuh, ka sinax kix, kix ang lai koe phimap. Viang mawh kawx nan yam in kix hoik yaox hoik koeng ka Aux khawm ka Keeing Aux heue.

²⁵Viang mawh nan sonsang naog gumlox pa hoik tiiem ka daux lai beenli kix pa ah nin, Ang koe grawh grawng tidtix kix koeng ka Aux heue.

²⁶Viang mawh nan yam hoik hoek Cao Teem pa sang ploi Aux hoek khaing Keeing Cao ka pex, pa mawh Khuan pa mawh pa meh, pa lih hoek khaing Keeing Cao, Nawh tak sang kham mhai rug grawh grawng Aux heue.

²⁷Pex kawx tak sang kham mhai rug, mawh kheu hoik ot pex tau mai Aux tom yam jah heue.