Read kinyarwanda YOHAN 16 Bible Online

YOHAN 16 - kinyarwanda bible

YOHAN 16

¹“Aux hoik krai lox ceu in khankix ka pex son ang pex sang laux rhawm heue.

²Kix tak sang grheu ti tik pex lih khaing daux nyiex sidiex khankix, mawh heue, pui mawx ang ah pa pah pex yum bawg yam ce ti yuh kaing krub ka son Siyiex tak sang hoek heue.

³Kix tak yuh ceu in khankix kheu ang kix lai tawng ka Keeing Cao khawm ka Aux heue.

⁴Aux hoik krai grawh grawng ceu in khankix ka pex, yuh ka mawx yam hoek bawg yam nari pa sang lih mawh khankix pex tak sang doh keud ka pa hoik krai Aux grawh grawng khankix. Aux krai ceu in khankix ka pex tom yam jah, kheu ot Aux tau mai pex heue.

⁵Viang mawh nan yam in Aux sang hu ka Kaw pa hoik ploi Aux hoek, pex tix kaux kawx ang chawk Aux, Maix sang hu dee mawx?

⁶Viang mawh nan kheu hoik krai Aux grawh grawng ceu in khankix ka pex, rhawm pex naog mai pa khi rhawm heue.

⁷Viang mawh nan Aux krai lox pa mawh meh ka pex, pa hu Aux mhawm son pex heue. Grawh grawng nawh phan Aux ang hu cao teem ang lai hoek ka pex, viang mawh nan phan Aux hu Aux sang ploi Nawh hoek ka pex heue.

⁸Yam hoik hoek Nawh tak sang plak jhi haktiex yaox ka phimap pa rahsee pa ciyang.

⁹Mawh kheu ang kix yum rhawm ka Aux, Nawh sang plak jhi yaox grawh grawng phimap heue.

¹⁰Mawh kheu hu Aux ka Keeing Cao kheu ang pex lai baox yaox Aux khaix in, Nawh tak sang plak jhi yaox grawh grawng pa rahsee heue.

¹¹Mawh kheu hoik prawng hoik ciyang ka simiang haktiex in, Nawh tak sang plak jhi yaox grawh grawng pa ciyang heue.

¹²Aux kawn koe lox ceu pa sang krai ka pex tom nie ceu, viang mawh nan ang pex pon kham pon geu yam in.

¹³Viang mawh nan pa mawh Khuan pa mawh meh hoik hoek, Nawh tak sang thong pex ka daux pa mawh meh khawmuik heue. Mawh kheu ang Nawh sang krai lox khaing tokaux tix, viang mawh nan Nawh tak sang krai can ceu pa mhong Nawh mai Nawh tak sang krai ka pex grawng ceu pa tak sang hoek khaix in heue.

¹⁴Nawh tak sang kieh Aux koe min plakngai, kheu tak sang teei Nawh cie Aux krai ka pex heue.

¹⁵Can ceu pa koe Keeing Cao khawmuik mawh cie Aux, mawh kheu nan Aux tom hoik krai ka pex, Nawh tak sang teei cie Aux krai ka pex heue.

¹⁶Khaix in rheung tivud khaing pex ang lai yaox Aux khaix in rheung tivud khaing pex tak sang baox deeh yaox Aux tix bawg”

¹⁷Mawh kheu nan kawncau Nawh tix blah tix kaux lai tix kaux ah nin ka paox tix, “Pa ah Nawh, Khaix in rheung ti vud khaing pex ang lai yaox Aux khaix in rheung ti vud khaing pex tak sang baox deeh yaox Aux tix bawg pa ah nin, Mawh kheu hu Aux ka Keeing Cao, sang ah ka mawx?”

¹⁸Mawh kheu nan kix baox ah nin, “Pa ah Nawh, Khaix in rheung ti vud khaing, Nawh sang ah ka mawx? Ex ang tawng lox pa krai Nawh heue.”

¹⁹Yesux tawng grawng pa simie kix ti chawk lox ka Nawh mai Nawh Cao ah nin ka kix, “Pex tix kaux lai tix kaux chawk ka paox tix ka grawng lox pa krai Aux pa ah nin, Khaix in rheung ti vud khaing pex ang lai yaox Aux khaix in rheung tivud khaing pex tak sang baox deeh yaox Aux tix bawg, lie?

²⁰Aux krai lox tete ka pex, pex tak sang yiiem grai yiiem riag yiiem yo heue, viang mawh nan haktiex in tak sang gaux rhawm, pex kienie tak sang khi rhawm, viang mawh nan pa khi rhawm pex tak sang pluk pliak ti mawh pa gaux rhawm heue.

²¹Yam saux yha bun, nawh koe pa khi rhawm, kheu bawg yam nari nawh hoik hoek. Viang mawh nan khaix hoik keh kawn, nawh gaux rhawm kheu hoik keh pui tix kaux piang haktiex ang nawh lai doh keud ka pa kham pa geu nawh khaix.

²²Awm an pex koe pa khi rhawm yam in, viang mawh nan Aux tak sang deeh yaox pex tix bawg rhawm pex tak sang gaux rhawm heue. Krax gaux rhawm pex tix kaux kawx ang pon rud pon teei khaing pex.

²³Ka daux singaix an pex tak ang chawk Aux ka lox tix ceu kawx. Aux krai lox tete ka pex, pex rawg ceu patix ang ah ka daux ceu kaux Aux ka Keeing Cao, Nawh tak tawx ka pex heue.

²⁴Tom yam in ang pex sax rawg tix ceu kawx ka daux ceu kaux Aux. Kheu krax gaux rhawm pex sang naog, rawg heue. Pex tak pon.

²⁵“Aux hoik krai ceu in khankix ka daux lox tiag, viang mawh nan bawg yam ang Aux lai teei lox tiag tix krai ka pex tak sang hoek, yam an Aux tak teei lox sidawng krai grawh grawng Keeing Cao ka pex heue.

²⁶Ka daux singaix an pex tak sang rawg bwan ka daux ceu kaux Aux mai Aux ang krai ka pex, Aux sang rawg ka Keeing Cao son pex,

²⁷kheu tokaux Keeing Cao moh ka pex, mawh kheu moh pex ka Aux hoik yum rhawm grawng pa lih hoek Aux khaing Keeing Cao heue.

²⁸Aux lih hoek khaing Keeing Cao hoik hoek piang haktiex in Aux sang baox deeh lih khaing haktiex hu ka Keeing Cao heue.”

²⁹Kawncau Nawh khankix ah nin ka Nawh, “Yam in Maix ang krai lox tiag, Maix krai lox pa sidawng.

³⁰Yam in ex hoik tawng grawng tawng Maix kuceu khawmuik ang lo pui chawk ka Maix tix kaux kawx, kheu in ex yum rhawm grawng lih hoek Maix khaing Siyiex heue.”

³¹Yesux baox pawk lox ah nin ka kix, “Yam in pex hoik yum rhawm lie?

³²Jhak heue, bawg yam nari tak sang hoek, mawh heue, pie yam in kawx hoik hoek, yam pex tak sang prung prang hu dee ot pui mawx dee ot pui an sang prah Aux ot nong nong. Viang mawh nan Aux ot nong nong ang mawh, kheu Keeing Cao ot tau mai Aux heue.

³³Aux hoik krai lox ceu in khankix ka pex, sonsang koe pex pa nhim ka daux Aux, ka piang haktiex in pex tak yaox krax kha rhawm, viang mawh nan kieh koe rhawm cong awx, Aux hoik pex ka haktiex in heue.”