Read kinyarwanda YOHAN 17 Bible Online

YOHAN 17 - kinyarwanda bible

YOHAN 17

¹Khaix hoik ah Yesux ceu an khankix Nawh maong ti jhak ka raoma ah nin, “Keeing eue, bawg yam hoik hoek, kieh Kawn Maix koe min pakngai liak, son sang kieh Kawn Cao Maix koe min pakngai heue.

²Awm hoik tawx Maix sibrawm ka Nawh piang ceu pui khawmuik, Nawh sang tawx ju leeing ju, ka can pui pa hoik tawx Maix ka Nawh khawmuik heue.

³In mawh ju leeing ju, sonsang tawng kix ka mawh Maix Siyiex pa mawh meh tix kaux khaing Yesux Khrit pa hoik ploi Maix hoek heue.

⁴Aux hoik kieh Maix koe min pakngai piang haktiex in. Kaing pa tawx Maix ka Aux son pa yuh tom hoik Aux hoik yuh uik heue.

⁵Keeing eue tom ka ang haktiex nyang bax koe dix, min pakngai pa hoik pon Aux ka maix, yam in kawx baox yaog min pakngai maix ka Aux liak.

⁶Aux hoik plak jhi ceu kaux Maix ka pui pa hoik tawx Maix ka Aux khaing haktiex. Kix hoik mawh cie Maix, Maix hoik tawx kix ka Aux kix priex tix hawt gumlox Maix heue.

⁷Yam in kix hoik tawng grawng can ceu pa tawx Maix ka Aux khawmuik, mawh pa hoek khaing Maix.

⁸Kheu gumlox pa hoik tawx Maix ka Aux, Aux hoik tawx ka kix, kix hoik rieb titeei ka khankix kix hoik tawng grawh grawng pa hoik lih hoek Aux khaing Maix tete, kix yum rhawm grawh grawng pa hoik ploi Maix Aux hoek heue.

⁹Aux rawg bwan ka son kix, ang Aux rawg bwan ka son haktiex, viang mawh nan, Aux rawg bwan ka son pa hoik tawx Maix ka Aux khankix, kheu mawh kix cie Maix.

¹⁰Cie Aux khawmuik mawh cie Maix, cie Maix mawh cie Aux, Aux koe min pakngai kheu kix heue.

¹¹Yam in ang Aux lai deeh ot ka piang haktiex in, viang mawh nan kix kawn ot piang haktiex in Aux sang deeh hoek ka Maix. Keeing pa singax eue, priex kix pa hoik tawx Maix ka Aux ka daux ceu kaux Maix liak, sonsang mawh kix tix kaux khaing awm mawh Aux tix kaux khaing heue.

¹²Yam ot Aux mai kix piang haktiex in, Aux priex kix ka daux ceu kaux Maix, pui pa hoik tawx Maix ka Aux khankix Aux hoik kia hoik pau, ang laux leeing tix kaux kawx, lheu khaing kaw pa mawh kawn pa laux leeing, sonsang naog lox pa koe ka daux Phuk lai sigang khri heue.

¹³Yam in Aux tak sang hoek ka Maix Aux krai ceu in khankix piang haktiex, sonsang koe kix pa gaux rhawm Aux tom naog ka daux kix heue.

¹⁴Aux hoik tawx gumlox Maix ka kix haktiex koeng ka kix, kheu kix ang dex dawd mai haktiex, awm ang Aux lai dex dawd mai haktiex heue.

¹⁵Aux ang lai rawg sonsang teei Maix kix lih khaing haktiex, viang mawh nan rawg sonsang priex Maix kix khaing pa caox heue.

¹⁶Kix ang dex dawd mai haktiex, awm ang Aux lai dex dawd mai haktiex.

¹⁷Kieh kix singax ka daux pa mawh meh Maix. Gumlox Maix mawh pa mawh meh heue.

¹⁸Awm hoik ploi Maix Aux hoek ka piang haktiex in, viang Aux kawx hoik ploi kix hu ka piang haktiex heue.

¹⁹Aux kieh tokaux tix singax son kix, kix kawx tak sang kieh tokaux tix singax ka daux pa mawh meh heue.

²⁰Aux ang lai rawg bwan ka son kix khaing, viang mawh nan rawg khawm son pui khankix pa tak sang yum rhawm ka Aux kheu gumlox kix heue.

²¹Kheu kix khawmuik tak sang mawh tix kaux, Keeing Cao eue, awm ot Maix ka daux Aux, Aux ot ka daux Maix, yuh ka mawx kix kawx tak sang ot ka daux Aux sonsang yum rhawm haktiex grawng pa hoik ploi Maix Aux hoek heue.

²²Min pakngai pa hoik tawx Maix ka Aux, Aux hoik tawx ka kix, sonsang mawh kix tix kaux khaing, awm mawh Ax tix kaux khaing.

²³Aux ot ka daux kix mai Maix ot ka daux Aux, sonsang grum lih mawh kix tix kaux sonsang tawng haktiex grawng mawh Maix pa ploi Aux hoek grawh grawng hoik moh Maix ka kix, awm hoik moh Maix ka Aux heue.

²⁴Keeing eue, Aux simie ti kieh kix pa hoik tawx Maix ka Aux, ot tau mai Aux ka dee ot Aux, sonsang yaox kix min pakngai Aux, pa hoik tawx Maix ka Aux, mawh kheu hoik moh Maix ka Aux ka sang jah ti kaw num haktiex heue.

²⁵O Keeing pa rahsee, haktiex in ang lai tawng ka Maix, viang mawh nan Aux hoik tawng ka Maix, kix tawng grawng pa hoik ploi Maix Aux hoek heue.

²⁶Aux hoik kieh kix tawng ka ceu kaux Maix Aux tak sang baox kieh kix tawng heue, yuh ka mawx krax moh pa hoik moh Maix ka Aux, tak sang ot ka daux kix sonsang ot Aux ka daux kix heue.” Yohan