Read kinyarwanda YOHAN 18 Bible Online

YOHAN 18 - kinyarwanda bible

YOHAN 18

¹Khaix hoik ah Yesux lox ceu an khankix, Nawh lih hu tau mai kawncau Nawh khankix ka plak toi rawm klawng Kedron, dee koe sipeem tix dah Nawh Cao mai kawncau Nawh khankix laig tan heue.

²Yudax kaw pa sang tik tawx Nawh Cao kawx, tawng dee an, kheu Yesux hoik hu tan tau mai kawncau Nawh khankix law lawx heue.

³Mawh kheu in Yudax viex pui naing cao giex kaing li pa ting khankix Pharishie khankix, viex ngu proh mai kawk ngu kraung naing hoek tan.

⁴Mawh kheu hoik tawng Yesux grawng ceu pa tak sang hoek ka piang Nawh khawmuik, Nawh Cao tom hu chawk ka kix ah nin, “Sawg pex pui mawx?”

⁵Kix deeh pawk lox ka Nawh Cao ah nin, “Sawg Yesux pui veng Nazariet” Yesux baox ah nin ka kix, “Mawh Aux heue.” Yudax kaw pa sang tik sang tawx Nawh Cao kawx, cung tau mai kix heue.

⁶Yam krai Yesux ka kix, “Aux mawh Nawh heue.” kix deeh yawn plak khaix mai goh piang tiex heue.

⁷Mawh kheu nan Nawh Cao baox deeh chawk ka kix, “Sawg pex pui mawx?” kix ah nin, “Sawg ka Yesux pui veng Nazariet heue.”

⁸Yesux baox pawk lox ah nin, “Aux hoik krai ka pex grawng mawh Aux Nawh, mawh kheu nan phan pex sawg Aux, kieh pui in khankix hu dee hu kix heue.”

⁹Kheu lox pa hoik ah Nawh nin, “Pui pa hoik tawx Maix ka Aux khankix, Aux ang kieh laux kieh leeing tix kaux kawx” tak naog heue.

¹⁰Yam an Simon Petrux kheu koe nawh vaid tix kre lawd vaid an kid ti tik yhaok khawn dawm siliex cao giex kaing li pa mawh Malakhux heue.

¹¹Mawh kheu nan Yesux ah nin ka Petrux, “Teei vaid maix deeh sau ka daux phak tix. Kawk pa hoik tawx Keeing Cao ka Aux, Aux tak ang lai nyaux kah lie?”

¹²Yam an cao giex kaing naing pui naing nawh pui cau pui Yudax khankix giex Yesux phyawk Nawh Cao heue.

¹³Kix tok Nawh hu ka sivoe ka Annax, kheu mawh nawh paox Kayaphax, cao giex kaing li pa ting piang paox tix daux num an.

¹⁴Kayaphax mawh kaw pa hoik gau lox ka pui Yudax khankix, grawh grawng pa yum pui tix kaux son pui khankix mawh pa mhawm son kix heue.

¹⁵Simon Petrux mai kawncau tang kaux tix kaux hawt hu khaix Yesux heue. Kawncau an mawh pa tawng cao giex kaing li pa ting laig tau mai Yesux ka daux nyiex haw cao giex kaing li pa ting an.

¹⁶Petrux kienie, cung dex siviex plak praix. Mawh kheu nan kawncau tang kaux an, pa tawng cao giex kaing li pa ting an, hu sikah ka bun pa pau siviex an viex Petrux laig heue.

¹⁷Yam an bun pa pau siviex ah nin ka Petrux, “Maix kawx mawh kawncau Pui an tix kaux lie?” Nawh deeh ah nin, “Aux ang mawh”

¹⁸Yam an siliex pui cau khankix hoik phlu gaox ngu mai cung tan. Kheu kwat yam an, kix cung ti co ngu Petrux kawx cung tau mai kix co ngu heue.

¹⁹Yam an cao giex kaing li pa ting an chawk ka Yesux grawh grawng kawncau Nawh khankix grawh grawng pa sidiex pa gau Nawh.

²⁰Yesux baox pawk lox ka nawh ah nin, “Aux hoik krai sidawng ka haktiex khawmuik. Aux hoik sidiex hoik gau daux nyiex dee sidiex khankix mai daux nyiex bwan dee khrawm pui Yudax khankix paox tix jheung jheung Aux ang mox ti sidiex dee glip tix ceu kawx.

²¹Maix lai chawk ka Aux yuh ka mawx? Chawk ka kix pa hoik mhong ka Aux, grawng pa hoik krai Aux patix ka kix, kix tawng grawng ceu pa hoik krai Aux khankix heue.”

²²Yam hoik ah Nawh Cao lox an, pui cau pa cung tan tix kaux teei taix tix simang ka Yesux ah nin, “Maix chix pawk lox cao giex kaing li pa ting yuh nan lie?”

²³Yesux pawk lox ah nin, “Phan Aux hoik ah pa caox pa ang khaw, tawx mhai rug grawh grawng pa caox pa ang khaw an, viang mawh nan phan Aux hoik krai ceu pa mhawm, yuh patix maix lai simang Aux?”

²⁴Annax deeh ploi Yesux hu ka Kayaphax pa mawh cao giex kaing li pa ting piang paox tix heue.

²⁵Yam an Simon Petrux cung tan mai co ngu. Mawh kheu nan kix ah nin ka nawh, “Maix kawx mawh kawncau Nawh tix kaux lie?” Nawh thiang ah nin, “Aux ang mawh”

²⁶Siliex cao giex kaing li pa ting, pa mawh paox ceu kaw pa hoik kid Petrux ti tik yhaok tix kaux ah nin, “Aux hoik yaox ot tau maix mai Yesux ka daux sipeem ang mawh lie?”

²⁷Petrux baox deeh thiang tix bawg ia ux dom mawx dom an heue.

²⁸Pon ngawb cao cao kix viex Yesux lih khaing Kayaphax tuk Nawh hu ka daux nyiex haw. Viang mawh nan tokaux kix ang laig ka daux nyiex haw, sonsang luan kix khaing pa seeing brai mai pon ti ih pawie Pasakha heue.

²⁹Mawh kheu nan Pilat lih hu ka kix chawk ah nin, “Pex deuh phimap ceu patix ka Pui in?”

³⁰Kix baox pawk lox ah nin ka nawh, “Phan Pui in ang mawh Pui pa yuh pa caox, ang ex lai viex ti tawx Nawh ka maix”

³¹Mawh kheu nan Pilat baox ah nin ka kix, “Pex teei Nawh prawng ca Nawh awm pa khaw mai beenli pex” Pui Yudax khankix baox ah nin ka nawh, “Ex ang koe been ti pah pui yum tix kaux kawx.”

³²Kheu sonsang naog lox pa hoik grux krai Yesux grawh grawng sang yum Nawh, ka krax yum pa yuh ka mawx heue.

³³Mawh kheu nan Pilat deeh laig ka daux nyiex haw kok Yesux mai chawk ah nin ka Nawh Cao, “Maix mawh Simiang Pui Yudax lie?”

³⁴Yesux baox pawk lox ah nin, “Lox in mawh lox pa lak keud maix tix ah lie, phan ang mawh nan mawh pui tang kaux pa hoik krai grawng Aux ka maix lie?”

³⁵Pilat baox pawk lox ah nin, “Aux mawh pui Yudax lie? Pui ceu Maix cao giex kaing li pa ting khankix, hoik tawx Maix ka aux. Maix hoik yuh ceu patix?”

³⁶Yesux baox pawk lox ah nin, “Meung Aux ang dex dawd mai haktiex in, phan meung Aux dex dawd mai haktiex in, kawncau Aux tak sang yuh naing son ang sang kieh tawx Aux ka daux tawm taix pui Yudax, viang mawh nan meung Aux ang dex dawd mai pa yuh nin”

³⁷Mawh kheu nan Pilat chawk ah nin ka Nawh Cao, “Phan mawh nan Maix mawh Simiang lie?” Yesux baox pawk lox ah nin ka nawh, “Awm pa ah maix, Aux mawh simiang heue, Mawh kheu in Aux tom keh mai hoek piang haktiex in, yuh ka mawx sonsang kham Aux mhai rug grawh grawng pa mawh meh. Pa dex dawd pa mawh meh ku kaux daux pui nghiet lox Aux heue.”

³⁸Pilat baox chawk ah nin ka Nawh Cao, “Pa mawh pa meh mawh patix?” Khaix hoik ah nawh nin, nawh deeh lih hu ka pui Yudax khankix tix bawg ah nin ka kix, “Aux ang yaox pa lud ka Kaw in tix ceu kawx.

³⁹Viang mawh nan, pex koe been, pa kieh aux ploi pui tix kaux ka pex yam yuh pawie Pasakha, mawh kheu nan pex sang kieh aux ploi Simiang Pui Yudax ka pex lie?”

⁴⁰Yam an kix khawmuik baox kok tix bawg ah nin, “Ang sang kieh ploi Pui in, ploi ka Barabax heue.” Barabax mawh pui tud rhim heue.