Read kinyarwanda YOHAN 19 Bible Online

YOHAN 19 - kinyarwanda bible

YOHAN 19

¹Khaix an Pilat teei Yesux kieh sivied Nawh.

²Pui naing khankix taing mhok kat lawm sau ka piang kaing Nawh Cao teei kraung ceep raoh klai ceep ka Nawh.

³Kix hoek ka Nawh Cao ah nin, “Simiang Pui Yudax eue, kieh nyawm ot heue.” Kix teei taix tix simang ka Nawh

⁴Pilat deeh lih hu tix bawg ah nin ka pui khankix, “Jhak heue, aux viex Nawh lih ka pex, sonsang tawng pex grawng pa ang aux yaox dee lud ka daux Nawh tix ceu kawx”

⁵Mawh kheu nan Yesux ceep mhok kat lawm ceep kraung ceep raoh klai lih hoek heue. Pilat ah nin ka kix, “Jhak ka Pui in heue.”

⁶Yam cao giex kaing li pa ting khankix pui cau kix khankix yaox Nawh Cao kix kok yo ah nin, “Tawk Nawh piang khaox lhak heue. Tawk Nawh piang khaox lhak heue.” Pilat ah nin ka kix, “Pex tang teei Nawh tawk Nawh piang khaox lhak heue, kheu ang aux yaox deeh lud Nawh tix ceu kawx heue.”

⁷Pui Yudax khankix baox pawk lox ah nin ka nawh, “Ex koe beenli phan hawt beenli ex Nawh khaw ti yum kheu Nawh yuh tokaux tix mawh Kawn Siyiex heue.”

⁸Mawh kheu nan yam mhong Pilat lox an, nawh baox nie lhat kah.

⁹Nawh deeh laig daux nyiex haw chawk Yesux ah nin, “Maix kaoh khaing dee mawx?” Viang mawh nan Yesux ang pawk lox tix gum kawx heue.

¹⁰Yam an Pilat baox ah nin ka Nawh Cao, “Ang Maix sikah ka aux lie? Maix ang tawng grawng pa koe aux sibrawm ti ploi Maix, sibrawm ti tawk Maix piang khaox lhak lie?”

¹¹Yesux baox pawk lox ah nin ka nawh, “Maix ang tau ti koe sibrawm ti yuh tix ceu kawx ka Aux, phan ang tawx ka maix khaing dee long. Mawh kheu nan kaw pa teei ti tawx Aux ka maix nie lheu ting phimap heue.”

¹²Jah tom yam an Pilat sawg ti ploi Nawh Cao, viang mawh nan pui Yudax khankix kok yo ah nin, “Phan maix ploi Pui in maix ang lai mawh paox pie simiang Kesa. Can pui ku kaux pa yuh tokaux tix mawh simiang mawh pui pa koeng ka simiang ting Kesa heue.”

¹³Mawh kheu nan yam hoik mhong Pilat lox ceu an kix, nawh viex Yesux lih kieh Nawh ngawm dee ngawm cao prawng see, dee kok mawh Dee Tawm Simaox, Lox Hebrie kok mawh Kabathax.

¹⁴Singaix an mawh singaix khre kix son pawie Pasakha dex hoek liah nari. Pilat ah nin ka pui Yudax khankix, “Jhak Simiang pex heue.”

¹⁵Mawh kheu nan kix tom kok yo ah nin, “Teei ti tik Nawh. Teei ti tik Nawh. Tawk Nawh piang khaox lhak heue.” Pilat baox ah nin ka kix, “Aux tak sang teei ti tawk Simiang pex piang khaox lhak lie?” Cao giex kaing li pa ting khankix pawk lox ah nin, “Lheu khaing simiang Kiesa ex ang lai koe simiang tix kaux kawx heue.”

¹⁶Yam an Pilat tawx Yesux ka kix, sonsang tawk Nawh piang khaox lhak. Kix teei Yesux tok Nawh hu heue.

¹⁷Nawh Cao klawm khaox lhak tokaux tix hu dee kok mawh Dee Siang Kaing. Daux lox Hebrie kok mawh Gawlaxgawthax heue.

¹⁸Kix tawk Nawh Cao piang khaox lhak ka dee an mai tang kaux ra kaux kawx kix tawk tau mai Nawh Cao, tix kaux tix plak Yesux ot ka sinax heue.

¹⁹Pilat tiiem ti deuh lai ka piang khaox lhak Nawh Cao pa ah nin, YESUX PWI VENG NAZARIET, SIMIANG YUDAX”

²⁰Pui Yudax haoh hun phat ti yaox lai an heue, mawh kheu dee tawk kix Yesux piang khaox lhak dex ka veng mai lai pa tiiem an mawh daux lox Hebrie, lox Romax mai lox Helasax heue.

²¹Mawh kheu nan cao giex kaing li pui Yudax pa ting khankix hu ka Pilat ah nin, “Paw tiiem lai pa ah, Simiang Pui Yudax, viang mawh nan tiiem lox pa ah nin, Nawh ah, Aux mawh Simiang Pui Yudax”

²²Pilat baox pawk lox ah nin, “Pa hoik tiiem aux, aux hoik tiiem”

²³Mawh kheu nan khaix hoik tawk pui naing khankix Yesux ka piang khaox lhak, kix teei kraung ceep Nawh gwieh pon son, son pui naing tix kaux tix son, sibex kawx kix teei heue. Sibex an ang koe khaix caing, mawh pa hoik taing jah tom plak piang tom dee hoik.

²⁴Mawh kheu nan kix tix kaux lai tix kaux ah nin ka paox tix, “Ex paw riah sibex in, ex nieb ti yaox pui mawx sang pon” In mawh sonsang naog gumlox Phuk lai sigang khri pa ah nin, “Kix gwieh ti teei kraung ceep Aux mai nieb ti yaox teei sibex Aux” Kheu nan pui naing khankix tom yuh ceu an.

²⁵Yam an miex Nawh Cao mai pux o miex Nawh Cao Marix moeng Kalawphax mai Marix Magadalax khankix cung dex ka khaox lhak Cao Yesux heue.

²⁶Mawh kheu nan yam yaox Yesux miex Nawh mai kawncau pa moh Nawh cung dex tan, Nawh Cao ah nin ka miex Nawh, “Bun eue, jhak ka kawn maix heue.”

²⁷Khaix an Nawh Cao baox ah nin ka kawncau an, “Jhak ka miex maix heue.” Jah tom yam an kawncau an teei miex Nawh Cao ot mai tix ka daux nyiex nawh heue.

²⁸Khaix an kheu tawng Yesux grawng pa hoik hoik kuceu, sonsang naog gumlox Phuk lai sigang khri, Nawh Cao ah nin, “Aux sang nyaux nie rawm”

²⁹Ka dee an koe aw pa naog rawm sidah niex tix mu kix teei gai ploh pa awm tih, pa koe daux rawm sigrit sigra cub ka daux rawm sidah niex sau ka toh kak khaox Hesop yaog ti sau ka jheeh Nawh Cao.

³⁰Mawh kheu nan khaix hoik ih Yesux rawm sidah niex, Nawh Cao ah nin, “Hoik hoik khawmuik” Nawh nom kaing tix, deeh tawx Khuan tix heue.

³¹Singaix an mawh Singaix Khre son ang sang koe tokaux yum khankix ka piang khaox lhak singaix twah, (mawh kheu singaix twah an mawh pa ting lhaong), pui Yudax khankix tom hu rawg mhaing ka Pilat mai kieh nawh nhie raig caong kix pot, sonsang pon ti tik kix kak heue.

³²Mawh kheu nan pui naing khankix hu mai raig caong kaw phao ka tix kaux pot mai tang kaux an pa hoik tawk tau mai Yesux.

³³Viang mawh nan, yam hoek kix ka Yesux yaox hoik yum Nawh Cao, kix ang lai raig caong Nawh pot heue.

³⁴Viang mawh nan, pui naing tix kaux teei pliah suat paw Nawh Cao, nham rawm lih dom mawx dom an heue.

³⁵Kaw pa hoik yaox grawh grawng an kham mhai rug, mhai rug nawh mawh pa mawh pa meh. Nawh tawng grawng lox pa krai nawh mawh pa mawh pa meh, yuh ka mawx viang pex kawx tak sang yum rhawm kah heue.

³⁶Grawh grawng nawh ceu in khankix hoik mawh sonsang naog lox Phuk lai sigang khri pa ah nin, “Si ang Nawh tak ang lai pot tix mu kawx heue.”

³⁷Daux Phuk lai sigang khri tang dah baox deeh ah nin, “Kix tak sang jhak ka Kaw pa hoik suat kix kah heue.”

³⁸Khaix ceu in khankix, Yosiep pa mawh pui veng Arimase, pa mawh kawncau Yesux tix kaux, viang mawh nan nawh briex ti yuh kheu lhat nawh ka pui Yudax khankix, hu rawg hu mhaing ti teei tokaux yum Yesux, ka Pilat mai Pilat tawx akhwang ka nawh, mawh kheu nan nawh hu teei tokaux yum Nawh Cao heue.

³⁹Nikawdimux pa mawh kaw pa hoik hoek ka Nawh Cao yam ponsawm phao ka kawx, viex sidah bhawng pa mawh Muran mai Acaw pa hoik klao tau, dex tixngoe coi.

⁴⁰Mawh kheu nan kix teei tokaux yum Yesux mai teei man pua tokaux Nawh tau mai sidah bhawng an, awm sax koe been pui Yudax, yam sang sipaung kix pui heue.

⁴¹Koe sipeem tix dah ka dex dee hoik tawk Nawh Cao piang khaox lhak ka daux sipeem an koe simeeig pa khraox tix dah, dee ang sax deuh pui tix kaux kawx heue.

⁴²Kheu singaix an mawh Singaix Khre pui Yudax kheu koe simeeig an dex dee an, kix tom deuh tokaux yum Yesux tan heue.