Read kinyarwanda YOHAN 2 Bible Online

YOHAN 2 - kinyarwanda bible

YOHAN 2

¹Khaix an daux loe singaix miex Yesux kawx ot mai pui ih kapaox daux veng Kanax ka daux meung Galilie heue.

²Lheu khaing an, kix ghaok Yesux mai kawncau Nawh khankix hoek ti ih kapaox tan heue.

³Yam ang rawm plix siiet kub, miex Yesux ah nin ka Nawh Cao, “Rawm plix siiet kix ang lai koe heue.”

⁴Yesux deeh ah nin ka kiex, “Bun eue, Aux koe pa yuh mai pax ceu patix? Bawg yam Aux ang nyang bax hoek”

⁵Miex Nawh ah nin ka pui cau khankix, “Nawh nhie pex yuh ceu pa yuh ka mawx ang ah, yuh awx”

⁶Ka dee an koe ang simaox liah mu, awm pa khaw mai been pui Yudax khankix ti kieh singax heue. Tix mu ang, kub sau rawm ra loe glawm.

⁷Yesux ah nin ka kix, “Sau rawm tom naog ka daux ang khankix awx.” Kix sau rawm tom naog.

⁸Yesux ah nin ka kix, “Yam in pug ti hu tawx ka cao kwang kaing kapaox heue.” pui khankix yuh awm pa ah Yesux heue.

⁹Yam cim cao kwang kaing kapaox ti yaox rawm pa hoik kieh mawh rawm plix siiet, kheu ang nawh tawng ka grawng rawm plix siiet hoek khaing dee mawx, viang mawh nan pui cau pa pug rawm khankix tawng heue. Nawh kok ka kaw pa teei ti koe moeng,

¹⁰Ah nin ka nawh, “Pui ku kaux viex ti tawx rawm plix siiet pa mhawm phao ka khaix hoik nyaux pui tom sak, viex pa ang mhawm khaix, viang mawh nan maix deuh rawm plix siiet pa mhawm tom yam in heue.”

¹¹In mawh mhai daox am pa liang Yesux tiyuh ka daux veng Kanax, daux meung Galilie, kheu nan min pakngai Nawh sidawng, kawncau Nawh khankix yum rhawm ka Nawh heue.

¹²Khaix an Nawh Cao hu ka veng Kapeniom, miex Nawh, pux Nawh khankix mai kawncau Nawh khankix, kix ang ot tan miex ngaix tix.

¹³Ang rheung, sivoe sang yuh pui Yudax pawie Pasakha, Yesux hu ka veng Yerusaliem heue.

¹⁴Nawh Cao yaox pui pa coh mawie, yung, sikaux mai pui pa loh mau ngawm ti coh ka daux nyiex bwan tan heue.

¹⁵Nawh teei maox siah klia ti yuh pa sang sivied, grheu kix lih khawmuik khaing daux nyiex bwan, khawm yung, khawm mawie khankix Nawh klup ti tik mau pui pa loh mau, Nawh cot pheen kix cang klud.

¹⁶Nawh ah nin ka pui pa coh sikaux khankix, “Teei ceu in lih heue, paw kieh nyiex Keeing Aux mawh dee coh kraung”

¹⁷Kawncau Nawh khankix doh keud grawng hoik tiiem ti deuh ah nin, “Krax moh Aux son nyiex Maix rup daux rhawm aux awm hax ngu heue.”

¹⁸Cao kaing pui Yudax khankix chawk ah nin ka Nawh Cao. “Pa yuh Maix ceu in khankix, Maix sang jhi ex yaox mhai pa daox am ceu patix?”

¹⁹Yesux deeh pawk ah nin, “Yieh nyiex bwan in laux daux loe ngaix Aux tak sang deeh cox heue.”

²⁰Mawh kheu nan pui Yudax ah nin, “Yam sum nyiex bwan in, hoik rheung tixpon liah num Maix keud ti sang deeh pon cox daux loe singaix khaing lie?”

²¹Viang mawh nan, Nawh sang ah ka nyiex bwan Tokaux tix heue.

²²Khaix hoik deeh kaoh im Nawh Cao khaing krax yum, kawncau Nawh doh keud ka lox pa hoik krai Nawh, kix yum rhawm ka gum lox phuk lai sigang khri, mai lox pa hoik krai Yesux heue.

²³Ka daux veng Yerusaliem glang pawie Pasakha, pui hun yum rhawm ka ceu kaux Yesux, kheu hoik yaox kix mhai pa daox am pa yuh Nawh Cao heue.

²⁴Viang mawh nan Yesux ang een rhawm ti tawx tokaux tix ka kix, kheu tawng Nawh pui khawmuik heue.

²⁵Nawh ang lo cao pa kham mhai rug grawng pui, kheu hoik tawng tokaux Nawh pa koe ka daux kawn pui heue.