Read kinyarwanda YOHAN 20 Bible Online

YOHAN 20 - kinyarwanda bible

YOHAN 20

¹Ka daux aliah singaix, singaix tix ponngawb cao cao yam kawn faik praix, Marix Magadalax hu ka simeeig, yaox hoik greeid simaox tix khaing daux simeeig heue.

²Mawh kheu nan nawh tom to hu ka Simon Petrux kawncau tang kaux pa moh Yesux ah nin ka kiex, “Kix hoik teei Simiang lih khaing daux simeeig ang ex tawng dee hoik een kix Nawh Cao heue.”

³Mawh kheu nan Petrux kawncau tang kaux an lih hu ka simeeig.

⁴Kiex khawm ra kaux to hu tau, viang mawh nan kawncau tang kaux an luan khaing Petrux hoek ka simeeig sivoe heue.

⁵Nawh nom ti jhak ka daux, nawh yaox man pua pa koe tan, viang mawh nan ang nawh laig ka daux heue.

⁶Yam hoek Simon Petrux pa hawt khaix nawh, nawh laig ka daux simeeig yaox man pua khankix tan,

⁷man pha ced pa hoik koe piang kaing Nawh Cao, ang lai koe tau mai man pua khankix, viang mawh nan hoik pua ti een tang dah heue.

⁸Yam an kawncau tang kaux an pa hoik hoek ka simeeig ka sivoe an kawx, laig yaox mai yum rhawm kah heue.

⁹Mawh kheu ang kix nyang bax tawng gumlox pa koe ka daux Phuk lai sigang khri, pa ah Nawh Cao tak sang deeh kaoh im khaing krax yum.

¹⁰Kheu nan kawncau an deeh ing ka dee ot kiex heue.

¹¹Viang mawh nan Marix cung ka plak praix simeeig yiiem heue. Yam yiiem nawh tan nawh nom ti jhak ka daux simeeig,

¹²Nawh yaox kawncau Siyiex ra kaux ceep kraung pa paing ngawm ka dee hoik een tokaux yum Yesux kah, plak kaing Nawh tix kaux plak caong tix kaux heue.

¹³Kiex chawk nawh ah nin, “Bun eue, yiiem maix kheu patix?” Nawh deeh ah nin ka kiex, “Mawh kheu hoik teei kix Simiang aux, ang aux tawng dee hoik een kix Nawh heue.”

¹⁴Khaix hoik ah nawh nan, nawh deeh gi plak khaix tix yaox Yesux cung tan, viang mawh nan nawh ang tawng mawh Yesux heue.

¹⁵Yesux chawk ah nin ka nawh, “Bun eue, yiiem maix kheu patix? Sawg maix pui mawx?” Nawh ce Nawh mawh kaw pa pau sipeem pawk lox ah nin ka Nawh Cao, “Simiang eue, phan Maix hoik teei Nawh hu, krai aux mhong dee een maix Nawh liak aux tak sang teei ti viex Nawh hu heue.”

¹⁶Yesux baox ah nin ka nawh, “Marix eue” nawh deeh gi ah nin ka Nawh Cao ka lox Hebrie, “Rabonix” Pa ah Rabonix mawh Cao Gau.

¹⁷Yesux baox ah nin ka nawh, “Paw vi teeh Aux, kheu ang Aux nyang bax haok hu ka Keeing Cao. Viang mawh kawx nan hu ka puxaik Aux khankix krai kix grawh grawng pa sang haok Aux ka Keeing Aux Keeing pex Siyiex Aux mai Siyiex pex heue.”

¹⁸Marix Magadalax hu krai ka kawncau khankix, “Aux hoik yaox Simiang heue.” grawh grawng pa hoik krai Nawh Cao ceu an khankix ka nawh heue.

¹⁹Ka daux bo singaix an, ka daux aliah singaix, singaix tix khaix hoik nyeep dee ot kawncau khankix, kheu lhat kix ka pui Yudax khankix, Yesux hoek cung ka sinax kix ah nin, “Kieh pa nhim koe mai pex heue.”

²⁰Khaix ah Nawh nan, Nawh Cao jhi kix yaox taix Nawh, paw Nawh. Mawh kheu nan yam yaox kawncau khankix ka Simiang, kix tom koe krax gaux rhawm heue.

²¹Yam an Yesux baox deeh ah nin ka kix, “Kieh pa nhim koe mai pex heue. Awm hoik ploi Keeing Cao Aux hoek, Aux kawx ploi pex hu yuh nan heue.”

²²Khaix hoik ah Nawh nan, Nawh Cao phlu piang kix ah nin, “Pex rieb ti teei ka Khuan Singax Singeh awx.

²³Pex ploi ka phimap pui mawx ang ah, tak sang ploi phimap nawh khankix heue. Pex deuh phimap ka pui mawh ang ah, tak sang ca kawn deuh ka phimap nawh khankix heue.”

²⁴Viang mawh nan yam hoek Yesux, Thomax pa mawh kawncau tix kaux ka daux kawncau kao ra kaux, pa kok mawh Didumux ang ot mai kix.

²⁵Mawh kheu nan kawncau tang kaux an khankix ah nin ka nawh, “Ex hoik yaox Simiang heue.” Viang mawh nan nawh deeh ah nin ka kix, “Phan aux ang yaox khaix dee tawk jim rhiem ka tawm taix Nawh ang pon ti sau gien taix aux ka daux khaix tawk jim rhiem ang pon ti sau taix aux ka paw Nawh, aux ang lai yum rhawm kah heue.”

²⁶Khaix an daix singaix, kawncau Nawh khankix deeh ot ka daux dee ot tan tix bawg Thomax kawx ot tan mai kix. Viang hoik nyeep siviex kawx, Yesux hoek cung sinax kix ah nin, “Kieh pa nhim koe mai pex heue.”

²⁷Yam an Nawh Cao ah nin ka Thomax, “Nyeu gien taix maix jhak ka tawm taix Aux nyeu taix maix sau ti yaox ka daux paw Aux. Paw kieh koe krax ang yum rhawm, viang mawh nan kieh koe krax yum rhawm heue.”

²⁸Thomax deeh pawk lox ah nin ka Nawh Cao, “Simiang aux Mai Siyiex aux”

²⁹Yesux baox ah nin ka nawh, “Kheu hoik yaox maix Aux maix tom yum rhawm kah Pui pa ang yaox yum rhawm khankix, ting bwanson heue.”

³⁰Mhai pa daox am tang ceu pa yuh Yesux sivoe kawncau khankix, pa ang lai tiiem ka daux phuk lai in kied nie tete.

³¹Viang mawh nan hoik tiiem ceu inkix, sonsang yum rhawm pex grawng mawh Yesux Cao Khrit, pa mawh Kawn Siyiex kheu yum rhawm pex, pex tak sang pon ju pa im ka daux ceu kaux Nawh Cao heue.