Read kinyarwanda YOHAN 21 Bible Online

YOHAN 21 - kinyarwanda bible

YOHAN 21

¹Khaix ceu an khankix Yesux baox deeh jhi tokaux Nawh yaox ka kawncau Nawh tix blah ka dex rawm nhawng Tiberix Nawh jhi tokaux tix yaox yuh nin heue.

²Simon Petrux Thomax pa kok mawh Didumux Nasanilax pui veng Kanax meung Galilie kawn Zebedie kawncau tang kaux ra kaux khankix ot tau heue.

³Simon Petrux ah nin ka kix, “Aux sang hu sawg kax ha. ” Kix deeh ah nin ka nawh, “Ex kawx sang hu mai maix heue.” Kix lih hu laig ka daux reu daux sawm an kix ang pon tidtix.

⁴Viang mawh nan, ponngawb yam jah praix ti riang, Yesux cung ka caong raog tan, viang mawh nan kawncau khankix ang tawng mawh Yesux.

⁵Mawh kheu nan Yesux tom chawk ah nin ka kix, “Kawn praix eue, pex koe pa ih tix ceu ceu lie?” Kix pawk lox ah nin, “ang koe. ”

⁶Nawh Cao baox ah nin ka kix, “Ploi rub pex ka plak khawn dawm reu pex tak sang pon heue.” Mawh kheu nan kix ploi rub ang pon bluh rub, kheu kied nie pon kax haoh hun.

⁷Kawncau pa moh Yesux an ah nin ka Petrux, “Mawh Simiang heue.” Kheu nan yam mhong Simon Petrux grawh grawng mawh Nawh Simiang, nawh deeh ceep sibex nawh, phoh laig ka daux rawm nhawng heue.

⁸Kawncau tang kaux khankix hoek ka daux reu mai bluh rub pa hoik naog kax hoek heue. Kheu ang kix singai khaing praok, dex koe tixphwan tawp khaing.

⁹Yam hoik hoek kix ka praok kix yaox ngu swah pa groh kax, ka piang ngu an mai blah heue.

¹⁰Yesux ah nin ka kix, “Viex kax pa pon pex yam in tix blah heue.”

¹¹Mawh kheu nan Simon Petrux laig ka daux reu mai bluh rub pa naog kax pa ting tiyieh tixphwan loe hoek ka praok, viang mawh kax nie ding dod, rub an ang griah ang laux heue.

¹²Yesux ah nin ka kix, “Hoek ti ih priex ngawb heue.” Kawncau khankix tix kaux kawx ang pon ti chawk Nawh, “Maix mawh mawx?” Kheu hoik tawng kix grawng mawh Nawh Simiang heue.

¹³Yesux hoek teei blah mai kax tawx ka kix.

¹⁴In mawh loe bawg tix bawg, pa jhi Yesux tokaux tix ka kawncau Nawh khankix, khaix hoik kaoh Nawh khaing krax yum heue.

¹⁵Khaix hoik ih kix priex ngawb Yesux chawk ka Simon Petrux ah nin, “Simon kawn Yonax eue maix lheu moh ka Aux khaing inkix lie?” Nawh ah nin ka Nawh Cao, “Mawh heue, Simiang eue, Maix hoik tawng grawng pa moh aux ka Maix.” Nawh Cao baox ah nin ka nawh,” tawx kawn yung Aux khankix sawm heue.”

¹⁶Nawh Cao baox chawk ka nawh ra bawg tix bawg ah nin “Simon kawn Yonax eue Maix moh ka Aux lie?” Nawh baox pawk lox ah nin ka Nawh Cao, “Mawh heue, Simiang eue, Maix tawng grawng pa moh aux ka Maix.” Nawh Cao baox ah nin ka nawh, “Liang yung Aux khankix heue.”

¹⁷Nawh Cao baox chawk ka nawh loe bawg tix bawg ah nin, “Simon kawn Yonax eue maix moh ka Aux lie?” Petrux khi rhawm kheu hoik chawk Nawh Cao ka nawh tom hoek loe bawg, “Maix moh ka Aux lie?” Nawh ah nin ka Nawh Cao, “Simiang eue Maix tawng grawh grawng kuceu khawmuik, Maix tawng grawng pa moh aux ka Maix heue.” Yesux baox ah nin ka nawh, “Tawx yung Aux khankix sawm heue.

¹⁸Aux krai lox tete ka maix, yam awn ju maix, maix chix nhawt maox rawd nyoi tokaux tix tiru maix pon hu dee simie maix ti hu. Viang mawh nan, yam hoik kuad maix, maix tak sang nyeu taix mai pui tang kaux tak sang nhawt maox rawd maix viex maix hu dee ang maix simie ti hu heue.”

¹⁹Yam ah nan, Nawh Cao sang krai grawh grawng Petrux tak sang yum yuh ka mawx, sonsang koe min pakngai Siyiex kah heue. Khaix hoik ah Nawh nan, Nawh Cao baox ah nin ka nawh, “Hawt khaix Aux heue.”

²⁰Petrux deeh gi ti jhak plak khaix mai yaox kawncau pa moh Yesux, hawt hoek khaix kiex, nawh mawh kaw pa neung ka naok Yesux yam ih kix priex bo yam an nhaox chawk ah nin, “Kaw pa sang tik sang tawx Maix mawh mawx?”

²¹Yam yaox Petrux ka nawh, nawh chawk ah nin ka Yesux, “Simiang eue, grawh grawng pui in sang yuh ka mawx?”

²²Yesux baox ah nin ka nawh, “Phan Aux sang kieh nawh ot tom deeh hoek Aux sax, sang dex dawd mai maix yuh ka mawx? Maix kienie hawt khaix Aux heue.”

²³Kheu an lox pa ah, “Kawn cau an tak ang lai yum,” tah hu ka puxaik khankix. Viang mawh nan Yesux ang ah, “Nawh tak ang lai yum. ” Nawh ah nin, “Phan Aux sang kieh nawh ot tom deeh hoek Aux sax, sang dex dawd mai maix yuh ka mawx?”

²⁴Mawh kawncau in pa kham mhai rug grawh grawng ceu in khankix pa tiiem grawh grawng ceu inkix ex tawng mhai rug pa kham nawh mawh pa mawh meh heue.

²⁵Pa yuh Yesux tang ceu kawn koe haoh hun, phan tiiem grawh grawng kuceu khankix, ceu mawx ceu an, aux ce pie haktiex in kawx, ang doh kub sau phuk lai pa sang tiiem khankix heue.