Read kinyarwanda YOHAN 3 Bible Online

YOHAN 3 - kinyarwanda bible

YOHAN 3

¹Yam an koe Pharishie tix kaux, pa kaux Nikawdimux, pa mawh simiang giex kaing pui Yudax tix kaux.

²Nawh hoek ka Yesux yam ponsawm ah nin, “Sara cao gau eue, yix tawng Maix mawh cao gau pa kaoh khaing Siyiex, kheu pui tix kaux kawx ang chix yuh mhai pa daox am pa yuh Maix inkix, phan Siyiex ang ot tau mai Maix heue.”

³Yesux pawk ah nin, “Aux krai lox tete ka maix, phan pui ang baox deeh keh tix bawg, nawh ang pon ti yaox Meung Siyiex heue.”

⁴Nikawdimux baox ah nin, “Pui pa riex ju sang deeh pon keh yuh ka mawx? Nawh deeh chix laig ka daux vaig miex tix mai baox deeh chix keh kah lie

⁵Yesux baox deeh pawk lox ah nin, “Aux krai lox tete ka maix, phan pui ang keh daux rawm mai Khuan, nawh ang pon ti laig ka daux Meung Siyiex.

⁶Pa keh khaing nex mawh nex mai pa keh khaing Khuan mawh khuan heue.

⁷Paw daox am kheu hoik krai Aux ka maix, maix tak baox deeh keh

⁸Bhaung kienie, simie ti phlu dee mawx nawh phlu tan maix pon mhong lox nawh, viang mawh nan ang maix tawng kaoh khaing dee mawx mai sang hu dee mawx. Pui pa keh daux Khuan ku kaux kawx awm an heue.”

⁹Nikawdimux baox pawk lox mai ah nin ka Nawh, “Ceu in khankix tak chix mawh yuh ka mawx?”

¹⁰Yesux deeh pawk ah nin, “Maix mawh cao gau ka daux pui Isarelax tix kaux ang maix tawng ceu in lie?”

¹¹Aux krai lox tete ka maix ex krai ceu pa tawng ex mai kham mhai rug grawng pa hoik yaox ex pex ang rieb ti teei mhai rug pa kham ex.

¹²Phan Aux hoik krai grawng ceu pa dex mai haktiex in pex ang yum rhawm kah, phan Aux krai grawng ceu pa dex mai meung raoma, pex sang chix yum rhawm kah yuh ka mawx?

¹³Pui tix kaux kawx ang sax haok ka meung raoma, lheu khaing Kaw pa lih khaing meung raoma, pa mawh Kawn kawn pui pa ot ka daux meung raoma heue.

¹⁴Awm hoik yaog Mose siuing ka daux tiag, ka Kawn kawn pui kawx, tak sang yaog yuh nan heue.

¹⁵Can pui pa yum rhawm ka Nawh Cao khankix ang lai hoek krax laux leeing tak pon ju leeing ju heue.

¹⁶“Mawh kheu Siyiex kied moh haktiex sigrien sigre, Nawh tom tawx Kawn tix pa koe tix kaux khaing, son can pui pa yum rhawm ka Nawh khankix, tak ang lai hoek krax laux leeing, tak pon ju leeing ju heue.

¹⁷Siyiex ploi Kawn Nawh hoek sonsang prawng, ciyang ka haktiex ang mawh, ploi hoek sonsang hoek haktiex krax taoh kheu Nawh heue.

¹⁸Kaw pa yum rhawm ka Nawh Cao ang hoek krax prawng, ciyang, kaw pa ang yum rhawm ka Nawh, krax prawng, ciyang hoik koe piang nawh, kheu ang nawh yum rhawm ka ceu kaux Kawn Siyiex pa koe tix kaux khaing heue.

¹⁹Tak hoek krax prawng, ciyang kheu pa riang hoik hoek piang haktiex in, kawn pui nie lheu moh ka pa faik khaing pa riang, in mawh kheu pa yuh kix mawh pa caox heue.

²⁰Grawh grawng nawh, pa yuh pa caox ku kaux daux pui nieh jhak ka pa riang ang hoek ka pa riang, son ang pa yuh tix sang lih heue.

²¹Kaw pa yuh pa mawh meh hoek ka pa riang, sonsang sidawng pa yuh tix, grawng mawh pa hoik yuh ka daux Siyiex heue.”

²²Khaix ceu in khankix, Yesux mai kawncau Nawh khankix hu ka daux meung Yudax, Nawh ot mai kix tan mai tawx krax cub com heue.

²³Yohan kawx cub com daux Enon dex veng Salim, kheu haoh rawm tan kix hoek tix cubcom heue.

²⁴Kheu yam an ang nyang bax sau Yohan ka daux thawng heue.

²⁵Yam an kawncau Yohan khankix mai pui Yudax tix kaux thung thiang paox tix grawng pa kieh singax.

²⁶Kix hoek ka Yohan mai ah nin ka nawh, “Rabi eue, Kaw pa ot plak toi rawm Yawdan tau mai maix, pa kham maix mhai rug grawng Nawh, Nawh tawx krax cub com yam in, pui khawmuik hu ka Nawh”

²⁷Yohan baox pawk lox ah nin, “Pui ang chix pon tix ceu kawx phan ang mawh pa tawx Siyiex ka nawh.

²⁸Tokaux pex mawh mhai rug grawng pa hoik krai aux, Aux ang mawh Cao Khrit, viang mawh nan aux mawh kaw pa hoik ploi ka sivoe Nawh khaing

²⁹Kaw pa pon moeng yam yuh kapaox, mawh kaw pa yuh kapaox heue, viang mawh nan paox grawm nawh pa cung dex nawh, kied gaux rhawm kheu mhong nawh lox kaw pa yuh kapaox. Awm an krax gaux rhawm aux hoik naog heue.

³⁰Nawh tak sang baox nie ting hu, aux tak sang baox nie deeh iak hu heue.

³¹“Kaw pa kaoh khaing dee long mawh pa ting piang khawmuik. Kaw pa kaoh khaing haktiex mawh pa dex dawd mai haktiex chix krai grawh grawng haktiex khaing. Kaw pa kaoh khaing raoma mawh pa ting piang khawmuik.

³²Nawh kham mhai rug grawng pa hoik yaox, hoik mhong Nawh, pui tix kaux kawx, ang rieb ti teei mhai rug pa kham Nawh.

³³Kaw pa rieb ti teei mhai rug pa kham Nawh, hoik tawk cum ka nawh grawng mawh Siyiex pa kaux sijax heue.

³⁴Kaw pa ploi Siyiex Nawh hoek chix krai gumlox Siyiex, kheu Siyiex ang tiag ti tawx Khuan kah heue.

³⁵Keeing Cao moh ka Kawn Cao hoik tawx kuceu khawmuik ka daux tawm taix Nawh heue.

³⁶Kaw pa yum rhawm ka Kawn Cao koe ju leeing ju, kaw pa ang yum rhawm ka Kawn Cao ang lai pon ti yaox ju, viang mawh nan pa song rhawm Siyiex koe piang nawh heue.”