Read kinyarwanda YOHAN 4 Bible Online

YOHAN 4 - kinyarwanda bible

YOHAN 4

¹Mawh kheu nan yam an Siyiex tawng Pharishie hoik mhong grawng pon Nawh kawncau mai cubcom ka pui nie lheu khaing Yohan,

²Viang mawh nan tokaux Yesux ang tawx krax cubcom, mawh kawncau Nawh pa cubcom khaing.

³Nawh lih khaing meung Yudax mai baox deeh hu ka meung Galilie heue.

⁴Nawh caw ti hu preeng ka daux meung Samarix,

⁵Mawh kheu nan Nawh Cao hoek ka veng pa kaux Sukha, dex ka haktiex pa tawx Yakop ka kawn nawh Yosiep heue.

⁶Ka dee an koe rawm daux Yakop, Yesux taug kheu hu krax mai ngawm dex rawm daux tan. Yam an dex hoek liah taix heue.

⁷Bun Samarix tix kaux hoek ti kin rawm, Yesux ah nin ka nawh, “Tawx Aux nyaux rawm liak”

⁸Mawh kheu yam an kawncau Nawh khankix hoik hu ti liag pa ih ka daux veng heue.

⁹Bun Samarix baox ah nin ka Nawh Cao, “Kheu Maix pa mawh pui Yudax chix mhaing ti nyaux rawm ka aux pa mawh bun Samarix lieh?” Grawh grawng nawh, pui Yudax ang sax yuh paox pie mai pui Samarix.

¹⁰Yesux baox pawk lox ah nin ka nawh, “Phan maix tawng bwanson totaix pa tawx Siyiex mai Kaw pa ah, Tawx Aux nyaux rawm mawh mawx? Maix sang mhaing rawm ka Nawh mai Nawh tak sang tawx rawm im ju ka maix heue.”

¹¹Bun an baox ah nin ka Nawh Cao, “Simiang eue, Maix ang koe ceu pa pug rawm, kheu rawm daux in kied raux tete, kheu nan Maix chix pon rawm im ju ka dee mawx?

¹²Maix khex lheu ting khaing keeing ex Yakop pa tawx rawm daux in ka ex lie? tokaux nawh mai kawn nawh to brie nawh hoik nyaux ka rawm daux in.

¹³Yesux baox pawk lox ah nin ka nawh, “Pui pa nyaux rawm in ku kaux tak sang deeh nyaux nie rawm heue.

¹⁴Viang mawh nan, pui mawx ang ah pa nyaux rawm pa tawx Aux, tak ang lai baox deeh sang nyaux nie rawm tix bawg kawx, viang mawh nan rawm pa sang tawx Aux ka nawh tak sang mawh rawm daux pa lih rawm ka daux nawh, tom kieh mawh ju pa im leeing ju”

¹⁵Bun an baox ah nin ka Nawh, “Simiang eue, tawx rawm an ka aux liak, son ang aux sang nyaux nie rawm khaix in son ang aux lai baox yaox ti hoek krax glang gleeing ti kin rawm tin”

¹⁶Yesux baox pawk lox ah nin ka nawh, “Hu kok mex maix deeh hoek tin”

¹⁷Bun an baox pawk lox ah nin ka Nawh Cao, “Aux ang koe mex” Yesux baox ah nin ka nawh, “Pa ah maix, Aux ang koe mex, caw tete.

¹⁸Kheu maix hoik koe mex phwan kaux mai kaw pa koe maix yam in, ang lai mawh mex maix, pa ah maix mawh pa mawh meh heue.”

¹⁹Bun an baox ah nin ka Nawh, “Simiang eue, aux tawng Maix mawh Cao jhai heue.

²⁰Pa mawh tax du ex dix, krub ka gawng in, pex ah dee khaw pui ti krub mawh ka daux veng Yerusaliem”

²¹Yesux baox ah nin ka nawh, “Bun eue, yum rhawm ka lox Aux, bawg yam tak sang hoek, pex tak ang krub Keeing Cao ka piang gawng in mai ka daux veng Yerusaliem.

²²Pex krub ka pa ang pex tawng, ex krub ka pa tawng ex, kheu krax taoh hoek khaing pui Yudax heue.

²³Viang mawh nan, bawg yam tak sang hoek, mai hoik hoek yam in, yam krub pui ka Keeing Cao tete, tak krub ka daux khuan mai ka daux pa mawh meh, kheu sawg Keeing Cao ka pui pa krub ka Nawh yuh nan heue.

²⁴Siyiex mawh Khuan mai pui pa krub ka Nawh, tak krub Nawh ka daux khuan mai ka daux pa mawh meh heue.”

²⁵Bun an baox ah nin ka Nawh Cao, “Aux hoik tawng grawng sang hoek Misiyax, Kaw pa kok mawh Cao Khrit, yam hoik hoek Nawh, Nawh tak sang krai kuceu khawmuik ka ex heue.”

²⁶Yesux baox ah nin ka nawh, “Aux pa sikah mai maix mawh Nawh heue.”

²⁷Yam an kawncau Nawh deeh hoek mai daox deng kheu sikah Nawh mai bun an. Viang mawh nan tix kaux kawx ang chawk ka Nawh, “Maix sawg patix? Phan ang mawh nan Maix sikah mai bun an yuh ka mawx?”

²⁸Bun an deuh aw rawm nawh tan mai deeh hu ka daux veng mai ah nin ka pui khankix,

²⁹“Hoek ti jhak ka Pui tix kaux, pa hoik krai aux can ceu pa hoik yuh aux khawmuik. Khiex chix mawh Nawh Cao Khrit lie?”

³⁰Kix lih khaing daux veng hu ka Nawh.

³¹Yam an kawncau Nawh khankix khyox khaw mai ah nin ka Nawh Cao, “Rabi eue, ih priex ceeix ha”

³²Viang mawh nan Nawh baox pawk lox ah nin ka kix, “Aux koe priex ih pa ang pex tawng”

³³Mawh kheu in kawncau Nawh tix kaux lai tix kaux ah nin ka paox tix, “Khex hoik viex ex priex ih tix kaux kaux tawx ka Nawh lie?”

³⁴Yesux baox ah nin ka kix, “Priex ih Aux mawh pa yuh alo Kaw pa ploi Aux hoek mai pa yuh kaing Nawh tom hoik heue.

³⁵Pex ah, khaix in pon khix sax, tak hoek bawg yam vawg nghox, ang mawh lie? Aux krai ka pex, jhak heue, yaog ngai pex jhak ka kaung ma khankix, nghox hoik kaux hoik lheung heue, yam khaw ti vawg hoik hoek heue.

³⁶Kaw pa vawg tak pon ngawh riang tix mai pa khrawm plix son leeing ju. Kaw pa rhuat mai kaw pa vawg tak sang pon ti gaux rhawm tau heue.

³⁷Grawh grawng nawh lox pa hoik koe pa ah nin, tix kaux mawh cao rhuat tix kaux mawh cao vawg hoik mawh tete heue.

³⁸Aux ploi pex hu vawg dee ang pex sax yuh kaing, tang kaux hoik yuh kaing pex hoik laig ka daux kaing pa yuh kix heue.”

³⁹Ka daux veng an pui Samarix tom nie yum rhawm ka Nawh Cao, kheu krai bun an lox pa ah nin, “Nawh hoik krai grawng can ceu pa hoik yuh aux khawmuik”

⁴⁰Kheu nan, yam hoek pui Samarix ka Nawh, kix khyox khaw Nawh ot mai kix, Nawh Cao ot tan ra singaix.

⁴¹Pui hun baox yum rhawm kheu gumlox Nawh Cao.

⁴²Kix ah nin ka bun an, “Yam in ex yum rhawm kheu lox pa hoik krai maix ang mawh. Mawh kheu tokaux ex hoik mhong lox Nawh mai tawng grawng in mawh Cao Khrit tete, pa mawh Cao pa taoh ka kawn pui haktiex heue.”

⁴³Khaix an ra singaix Nawh lih khaing tan mai hu ka daux meung Galilie.

⁴⁴Kheu tokaux Yesux hoik kham mhai rug grawng Cao jhai ang koe min plakngai, ka daux meung tokaux tix.

⁴⁵Yam hoek Nawh ka daux meung Galilie, pui Galilie khankix rieb Nawh, kheu hoik yaox kix pa yuh Nawh daux pawie ka veng Yerusaliem, kheu ot kix ka daux pawie an heue.

⁴⁶Nawh deeh hoek ka Kanax daux meung Galilie dee hoik kieh Nawh rawm mawh rawm plix siiet. koe simiang tix kaux, pa saux kawn ka daux veng Kapeniom.

⁴⁷Yam mhong nawh grawng hoik kaoh Yesux khaing meung Yudax, hoek ka daux meung Galilie, nawh hu ka Nawh Cao mai khyox khaw ka Nawh Cao, sonsang lih hoek Nawh ti cox kawn nawh moi. Mawh kheu saux kawn nawh dex yum heue.

⁴⁸Mawh kheu nan Yesux ah nin ka nawh, “Phan maix ang yaox mhai ceu pa daox am khankix maix ang tau ti yum rhawm kah”

⁴⁹Simiang an baox ah nin ka Nawh Cao, “Simiang eue, ka ang kawn aux nyang bax yum lih hoek liak”

⁵⁰Yesux baox ah nin ka nawh, “Hu dee hu maix heue, kawn maix tak klawd ju heue.” Pui an yum rhawm ka lox pa krai ka nawh mai nawh hu dee hu tix heue.

⁵¹Yam kawn tak ing nawh, kawncau nawh khankix kuan ti rieb nawh mai krai grawng klawd ju kawn nawh heue.

⁵²Mawh kheu in nawh chawk kix grawng jah kawn nawh ti vai yam mawx. Kix baox pawk lox ah nin, “Jhawm saux nawh grai kaw kawx bawg yam aliah nari”

⁵³Mawh kheu in keeing nawh tawng grawng bawg yam an mawh, bawg yam krai Yesux lox in ka nawh, “Kawn maix tak klawd ju heue.” Tokaux nawh mai pui daux nyiex nawh khawmuik yum rhawm heue.

⁵⁴In mawh mhai pa daox am, pa yuh Yesux ra bawg tix bawg khaix lih Nawh khaing meung Yudax hoek ka daux meung Galilie heue.