Read kinyarwanda YOHAN 5 Bible Online

YOHAN 5 - kinyarwanda bible

YOHAN 5

¹Khaix in koe pawie pui Yudax tix mu, Yesux haok hu ka veng Yerusaliem.

²Ka daux veng Yerusaliem dex Siviex Yung, koe rawm dung tix mu, pa kok plak lox Hebrie Betesadax. Rawm dung an koe grah phwan lhang heue.

³Ka piang grah an khankix pui pa koe jhawm saux it tan kied hun tete. Pui dugngai, pui laux caong pui yum tix plak, kix krox yam yung yiang rawm an.

⁴Kheu, yam hoek bawg yam, kawncau Siyiex tix kaux lih hoek yuh rawm an yung yiang. Khaix yung yiang rawm an pui mawx pon laig ka sivoe paox tix daux dung an, jhawm saux tokaux nawh moi heue.

⁵Pui pa saux tixngoe daix num tix kaux ot ka dee an.

⁶Yam yaox Yesux it nawh tan, tawng grawng hoik rheung ot nawh tan awm an, Nawh Cao chawk ka nawh ah nin, “Maix mie ti moi lie?”

⁷Pui pa saux an baox pawk lox ah nin, “Simiang eue, yam yung yiang rawm, ang koe pui pa teei aux sau ka daux rawm dung an tix kaux kawx, yam hu aux pui tang kaux pon laig ka sivoe aux heue.”

⁸Yesux ah nin ka nawh, “Kaoh heue, teei kraung it maix hu heue.”

⁹Pui an moi dom mawx dom an mai teei kraung it tix hu. Singaix an mawh singaix twah heue.

¹⁰Mawh kheu nan pui Yudax ah nin ka kaw pa hoik moi an, “Singaix mawh ngaix twah pa viex maix kraung it tix hu ang khaw mai beenli”

¹¹Viang mawh nan kaw an baox pawk lox ah nin, “Kaw pa cox aux moi hoik ah nin ka aux, “Teei kraung it maix hu heue.”

¹²Kix baox chawk ka nawh, “Mawh pui mawx pa nhie maix teei kraung it maix hu?”

¹³Viang mawh nan kaw pa hoik moi an, ang tawng cao cox tix moi. Kheu koe pui hun ka dee an. Yesux hoik lih hu khaing tan.

¹⁴Khaix an Yesux yaox nawh ka daux nyiex bwan ah nin ka nawh, maix hoik moi saux, khaix in paw lai baox yuh phimap, phan ang mawh nan, ha pa lheu nu kox hoek piang maix heue.”

¹⁵Pui an hu krai ka pui Yudax, Kaw pa cox nawh moi mawh Yesux.

¹⁶Mawh kheu nan pui Yudax tuktiak tukte ka Yesux sawg ti pah Nawh yum, kheu hoik yuh Nawh ceu in khankix singaix twah heue.

¹⁷Viang mawh nan Yesux baox pawk lox ah nin ka kix, “Keeing Aux yuh kaing tom hoek yam in Aux kawx yuh heue.”

¹⁸Mawh kheu jao in pui Yudax nie sawg ti pah Nawh yum, kheu yuh Nawh singaix twah laux, ang joeng mawh nan Nawh kok Siyiex mawh Keeing tix, kheu Nawh hoik yuh ti kieh tokaux tix sidu mai Siyiex heue. Siawp Sibrawm Kawn Cao

¹⁹Mawh kheu nan Yesux baox pawk lox ka kix ah nin, “Aux krai lox tete ka pex, Kawn Cao ang chix yuh nong nong tix ceu kawx, viang mawh nan Nawh yuh kheu ceu pa yaox Nawh pa yuh Keeing Cao, Kawn Cao kawx yuh ceu an heue.

²⁰Kheu Keeing Cao moh Kawn Cao, Nawh tom jhi Nawh yaox ceu pa yuh tix khawmuik. Nawh tak jhi Nawh yaox kaing pa nie lheu ting khaing in, sonsang kieh pex daox deng kah heue.

²¹Grawh grawng nawh awm kieh Keeing Cao pui yum deeh kaoh im, viang mawh Kawn Cao kawx, koe rhawm ti sang kieh pui mawx im kawx, chix tix heue.

²²Keeing Cao ang prawng pui tix kaux kawx, viang mawh nan Nawh hoik tawx krax prawng ka Kawn Cao khawmuik.

²³Kheu son kawn pui khawmuik sang yungyi ka Kawn Cao, awm yungyi kix ka Keeing Cao. Kaw pa ang yungyi ka Kawn Cao, ang yungyi ka Keeing Cao pa ploi Nawh hoek heue.

²⁴Aux krai lox tete ka pex, kaw pa mhong lox Aux pa yum rhawm ka Kaw pa ploi Aux hoek, hoik koe ju leeing ju ang hoek krax ciyang, hoik luan khaing krax yum laig ka daux ju pa im heue.

²⁵Aux krai lox tete ka pex, bawg yam nari tak sang hoek, hoik hoek yam in mai yam tak mhong pui pa hoik yum khankix lox Kawn Siyiex kix pa mhong tak im heue.

²⁶Grawh grawng nawh, awm koe ju Keeing Cao ka daux tokaux tix, Nawh tawx Kawn Cao koe ju ka daux tokaux tix awm an.

²⁷Nawh hoik tawx sibrawm ka Kawn Cao ti ciyang, kheu mawh Nawh Kawn kawn pui heue.

²⁸Paw daox deng ka ceu in, kheu bawg yam tak sang hoek, yam can pa ot ka daux simeeig khawmuik tak mhong lox Nawh lih hoek,

²⁹Kix pa hoik yuh pa mhawm deeh kaoh ka son pa im ju heue. Kix pa hoik yuh pa caox pa ang mhawm, tak deeh kaoh ka son krax prawng pa ciyang heue.

³⁰“Aux ang chix yuh nong nong tix ceu kawx, Aux prawng awm pa mhong Aux, krax prawng Aux, mawh pa rahsee. Mawh kheu ang Aux sawg ti yuh alo tokaux tix, viang mawh nan Aux yuh alo Keeing Cao pa ploi Aux hoek heue.

³¹Phan Aux kham mhai rug grawng tokaux tix, mhai rug Aux ang mawh pa mawh pa meh.

³²Mawh tang kaux pa kham mhai rug grawng Aux mai Aux tawng grawng mhai rug pa kham Nawh grawng Aux mawh pa mawh meh heue.

³³Pex hoik ploi hu ka Yohan nawh hoik kham mhai rug ka pa mawh pa meh.

³⁴Viang mawh nan, Aux ang rieb ti teei mhai rug pa kham pui, viang mawh nan Aux tom krai ceu in khankix sonsang hoek pex krax taoh heue.

³⁵Nawh mawh kawk ngu pa rup pa jhan riang pex koe rhawm ti gaux rhawm ka daux pa riang nawh tivud khaing.

³⁶Viang mawh nan Aux koe mhai rug pa nie lheu ting khaing mhai rug pa kham Yohan, kheu kaing pa hoik tawx Keeing Cao ka Aux, sonsang yuh tom hoik, pa mawh kaing ceu pa yuh Aux in, mawh pa kham mhai rug son Aux grawng pa hoik ploi Keeing Cao Aux hoek heue.

³⁷Keeing Cao pa hoik ploi Aux hoek, hoik kham mhai rug grawng Aux. Ang pex sax mhong lox Nawh tix bawg kawx, ang pex sax yaox grang Nawh tix bawg kawx.

³⁸Gumlox Nawh ang ot ka daux pex, mawh kheu ang pex yum rhawm ka Kaw pa ploi Nawh hoek heue.

³⁹Pex sawg daux Phuk lai sigang khri kheu ce pex ti sang pon ju leeing ju ka daux phuk lai an heue. Phuk lai an mawh pa kham mhai rug ka grawng Aux.

⁴⁰Sonsang pon pex ju pa im pex ang lai hoek ka Aux heue.

⁴¹Aux ang rieb ti teei min pakngai pa tawx kawn pui.

⁴²Viang mawh nan, Aux tawng grawng krax moh Siyiex ang koe ka daux pex.

⁴³Aux hoek ka daux ceu kaux Keeing Aux pex ang rieb ti teei Aux, phan tang kaux hoek ka daux ceu kaux tokaux tix, pex tak sang rieb ti teei ka kaw an.

⁴⁴Pex chix yum rhawm yuh ka mawx? Pex pa sawg ti pon min pakngai ka paox tix, tix kaux lai tix kaux pex ang sawg ti pon min pakngai ka Siyiex pa koe tix kaux khaing.

⁴⁵Paw ce Aux sang deuh phimap ka pex plak sivoe ngai Keeing Cao. Pa sang deuh phimap ka pex kawn koe tix kaux, pa mawh Mose pa een pex rhawm tix kah heue.

⁴⁶Grawh grawng nawh phan pex hoik yum rhawm ka Mose, pex tak sang yum rhawm ka Aux, kheu hoik tiiem nawh grawng Aux heue.

⁴⁷Viang mawh nan phan pex ang yum rhawm ka lox ceu pa tiiem Mose, pex tak sang chix yum rhawm ka lox Aux yuh ka mawx?”