Read kinyarwanda YOHAN 6 Bible Online

YOHAN 6 - kinyarwanda bible

YOHAN 6

¹Khaix an Yesux hu plak toi rawm nhawng Galilie, pa mawh nhawng Tiberix.

²Cub pui pa kied hun hawt Nawh, kheu hoik yaox kix mhai pa daox am pa yuh Nawh piang kix pa koe jhawm saux heue.

³Yesux haok hu ka piang gawng tix mu ngawm tau mai kawncau Nawh khankix tan.

⁴Yam an dex sang hoek bawg yam pawie Pasakha pui Yudax.

⁵Yesux yaog ti jhak yaox cub pui pa kied hun hoek ka Nawh Cao mai ah nin ka Philipux, “Sonsang yaox pui inkix ti ih Ex sang pon ti liag blah dee mawx?”

⁶Ceu pa ah Nawh ka Philipux in mawh pa cheuk ti yaox nawh, kheu tokaux Nawh Cao sang yuh ka mawx, Nawh hoik tawng.

⁷Philipux baox pawk lox ah nin ka Nawh, “Teei mau denari ra yieh liag blah kawx, ang tau ti kub son kix ku kaux tix kaux ceeix ceeix.

⁸Kawncau Nawh tix kaux, Andare, pa mawh pux Simon Petrux ah nin ka Nawh Cao.

⁹“Kawn nyawm pa ot tin tix kaux, koe blah nghox ca pa lang sidax phwan lon mai kax iak ra mu, viang mawh nan son pui nie ding nie dod sang koe bwanson yuh ka mawx?”

¹⁰Yesux ah nin, “Kieh pui khankix ngawm heue.” Ka dee an kied nie pu rib tete. Kix dex koe phwan rheng.

¹¹Yesux teei blah an mai yaog yaw bwanson mai gwieh ti tawx ka pui pa ngawm tan khankix Nawh teei kax gwieh ka kix awm an, kix moh miex ding, tawx ding heue.

¹²Khaix hoik ih kix tom sak, Nawh Cao ah nin ka kawncau Nawh khankix, “Khrawm pa max pa lheu khankix, son ang tidtix sang grai”

¹³Mawh kheu nan kix deeh khrawm pa max pa lheu, blah phwan lon an khaix hoik ih pui, deeh naog kao ra phliex heue.

¹⁴Mawh kheu nan yam yaox pui mhai pa daox am pa hoik yuh Nawh Cao kix ah nin, “Kaw in mawh Cao jhai an tete pa hoek piang haktiex heue.”

¹⁵Mawh kheu tawng Yesux grawng koe rhawm kix ti sang giex ti khin Nawh yuh simiang, Nawh tom baox deeh lih hu nong nong ka piang gawng heue.

¹⁶Yam hoek ponbo kawncau Nawh khankix, lih hu ka rawm nhawng.

¹⁷Kix laig ka daux reu tix mu, hu plak veng Kapeniom. Yam an praix hoik faik Yesux ang nyang bax hoek ka kix.

¹⁸Kheu phlu bhaung ting, pukpak rawm haok hwan heue.

¹⁹Khaix hoik vai kix reu hu loe pon lag, kix yaox Yesux hu ka caong tix piang rawm hoek ka dex reu, kix die lhat kah

²⁰Viang mawh nan Nawh Cao ah nin ka kix, “Mawh Aux heue, paw lhat kah”

²¹Kheu nan kix tom rieb ti teei Nawh laig daux reu dom mawx dom an, reu hoek ka praok dee sang hu kix heue.

²²Singaix pasax cub pui hun cung toi rawm nhawng plak an, kix hoik yaox koe reu iak tan tix mu khaing, Yesux ang laig mai kawncau Nawh khankix, yam laig kix ka daux reu an, kawncau Nawh khankix hoik hu nong nong heue.

²³Viang mawh nan reu iak hoek khaing veng Tiberix hoek dex dee pon kix ti ih blah khaix hoik yaog yaw Nawh Cao bwanson.

²⁴Yam yaox cub pui hun Yesux, kawncau Nawh khankix ang ot tan, tokaux kix laig daux reu hu sawg Yesux ka daux veng Kapeniom.

²⁵Yam yaox kix Nawh Cao plak toi rawm nhawng, kix ah nin ka Nawh, “Rabi eue, Maix hoek tin yam mawx?”

²⁶Yesux baox pawk lox ah nin ka kix, “Aux krai lox tete ka pex, pex sawg Aux kheu hoik yaox pex mhai pa daox am ang mawh, viang mawh nan mawh kheu hoik pon pex ti ih blah tom sak heue.

²⁷Paw coca yuh ti pon pa ih pa chix laux leeing, viang mawh nan coca sonsang pon pa ih pa kaux tom pon ju leeing ju, pa sang tawx Kawn kawn pui ka pex. Kheu mawh Nawh Siyiex, pa hoik tawk Keeing Cao cum ka heue.”

²⁸Mawh kheu nan kix tom chawk Nawh ah nin, “Ex tak lai yuh ka mawx, sonsang pon ex ti yuh kaing Siyiex?”

²⁹Yesux baox pawk lox ah nin ka kix, “Kaing Siyiex mawh pa yum rhawm pex ka Kaw pa ploi Nawh hoek heue.”

³⁰Mawh kheu nan kix tom baox ah nin ka Nawh, “Maix sang yuh ex yaox mhai pa daox am sonsang yum rhawrn ex ka Maix ceu patix? Maix sang yuh kaing ceu patix?

³¹Tax du ex khankix hoik pon ti ih Mannax ka daux tiag, awm hoik tiiem ti deuh ah nin, “Nawh tawx blah ka kix khaing meung raoma sonsang ih heue.”

³²Mawh kheu nan Yesux baox pawk lox ah nin ka kix, “Aux krai lox tete ka pex, ang lai mawh pa tawx Mose blah khaing raoma ka pex. Viang mawh nan mawh Keeing Aux pa tawx blah pa mawh meh khaing raoma ka pex heue.

³³Grawh grawng nawh blah Siyiex mawh pa lih hoek khaing Raoma tawx ju pa im ka haktiex heue.”

³⁴Mawh kheu nan kix tom baox ah nin ka Nawh Cao, “Simiang eue, tawx blah an ka ex ku bawg yam”

³⁵Yesux baox ah nin ka kix, “Aux mawh blah pa im ju heue, kaw pa hoek ka Aux tak ang lai cai rhawm kaw pa yum rhawm ka Aux tak ang lai sang nyaux nie rawm tix bawg kawx heue.

³⁶Aux hoik krai ka pex grawng pa hoik yaox pex ka Aux, viang mawh kawx nan pex ang yum rhawm ka Aux heue.

³⁷Can pa tawx Keeing Cao ka Aux, hoek ka Aux khawmuik, pui pa hoek ka Aux, Aux ang doh tik vud tix bawg kawx.

³⁸Grawh grawng nawh Aux lih hoek khaing raoma sonsang yuh alo tokaux tix ang mawh, Aux hoek ti yuh alo Cao pa ploi Aux hoek beue.

³⁹In mawh alo Cao pa ploi Aux hoek, mawh pa ang kieh Aux grai yuh pui pa tawx Nawh Cao ka Aux tix kaux kawx, viang mawh nan kieh kix deeh kaoh singaix sidah khaix heue.

⁴⁰Grawh grawng nawh in mawh alo Keeing Aux, sonsang pon pui pa yaox ka Kawn Cao pa yum rhawrn ka Nawh ku kaux, ju leeing ju. Aux sang kieh kix deeh kaoh singaix sidah khaix heue.”

⁴¹Yam an pui Yudax khankix salao ka Nawh Cao kheu hoik ah Nawh, “Aux mawh blah pa lih hoek khaing raoma”

⁴²Kix ah nin, “In mawh Yesux kawn Yosiep ang mawh lie? Miex keeing Nawh, ex kawx tawng ang mawh lie? Nawh ah, Aux mawh pa lih hoek khaing raoma, yuh ka mawx?”

⁴³Yesux baox pawk lox ah nin ka kix, “tix kaux lai tix kaux paw salao ka paox tix heue.

⁴⁴Pui tix kaux kawx ang pon hoek ka Aux. Phan Keeing Cao pa ploi Aux hoek ang bluh nawh hoek, can pui pa hoek ka Aux, Aux tak deeh kieh nawh kaoh singaix sidah khaix heue.

⁴⁵Awm pa hoik tiiem daux Lai cao jhai khankix, Siyiex tak gau ka kix khawmuik Pui pa hoik mhong pa hoik pon krax gau khaing Keeing Cao ku kaux hoek ka Aux heue.

⁴⁶Pui tix kaux kawx ang sax yaox ka Keeing Cao, mawh ngie Cao pa kaoh khaing Siyiex, pa hoik yaox ka Keeing Cao heue.

⁴⁷Aux krai lox tete ka pex, kaw pa yum rhawm hoik koe ju leeing ju.

⁴⁸Aux mawh blah pa im ju heue.

⁴⁹Tax du pex khankix dix ih Mannax daux tiagtu, viang mawh nan kix hoik yum heue.

⁵⁰In mawh blah pa lih hoek khaing raoma pui pa yaox ti ih kah tak ang lai yum heue.

⁵¹Aux mawh blah pa im ju pa lih hoek khaing raoma, phan pui ih blah in nawh tak im leeing ju. Blah pa sang tawx Aux mawh nex Aux heue, Aux sonsang tawx sonsang im ju kawn pui haktiex heue.”

⁵²Kheu in pui Yudax khankix tix kaux lai tix kaux thung thiang paox ti ah nin, “Pui in sang chix tawx ex ih nex tix yuh ka mawx?”

⁵³Mawh kheu nan Yesux tom baox ah nin ka kix, “Aux krai lox tete ka pex, phan pex ang ih nex Kawn kawn pui, mai ang nyaux nham Nawh, pex ang koe ju pa im ka daux tokaux pex.

⁵⁴Pui pa ih nex, mai nyaux nham Aux, koe ju leeing ju Aux tak deeh kieh nawh kaoh singaix sidah khaix heue.

⁵⁵Grawh grawng nawh nex Aux mawh ceu pa ih tete nham Aux mawh ceu pa nyaux tete.

⁵⁶Pui pa ih nex mai pa nyaux nham Aux ot ka daux Aux, mai Aux ot ka daux nawh.

⁵⁷Awm mawh Keeing Cao pa im Ju pa ploi Aux hoek, Aux im ju kheu Keeing Cao, awm an kaw pa ih ka Aux tak im ju kheu Aux heue.

⁵⁸Blah in mawh pa lih hoek khaing raoma ang awm mannax pa hoik ih hoik yum tax du pex khankix, kheu pui pa ih blah in tak im ju leeing ju heue.”

⁵⁹Nawh krai lox in, yam sidiex gau Nawh ka daux nyiex sidiex veng Kapenion heue.

⁶⁰Yam mhong kawncau Nawh khankix ka lox in, kix Pui hun ah nin, “Lox in mawh pa nu tete, pui mawx chix nghiet kah?”

⁶¹Viang mawh nan kheu tawng Yesux ka daux rhawm tix grawng pa salao kawncau Nawh khankix grawng in Nawh tom ah nin ka kix, “Pex laux rhawm kheu lox in lie?”

⁶²Phan pex yaox Kawn kawn pui deeh haok hu dee hoik ot Nawh phao ka, pex sang ce yuh ka mawx?

⁶³Mawh khuan pa kieh im ju, nex ang koe bwanson tidtix. Lox pa hoik krai Aux ka pex mawh khuan ju pa im heue.

⁶⁴Viang mawh nan ka daux pex koe tix blah pa ang yum rhawm” Mawh kheu hoik tawng Yesux tom yam jah grawng mawh pui mawx pa ang lai yum rhawm, kaw pa sang tik tawx Nawh heue.

⁶⁵Nawh Cao tom ah nin, “Mawh kheu jao in Aux hoik krai ka pex, pui tix kaux kawx ang pon hoek ka Aux, phan ang mawh Keeing Cao pa kieh nawh hoek”

⁶⁶Mawh kheu in kawncau Nawh deeh blak tix, ang lai hu mai Nawh Cao heue.

⁶⁷Yesux ah nin ka kawncau Nawh kao ra kaux, “Pex kawx sang lih hu khaing Aux lie?”

⁶⁸Simon Petrux pawk lox ah nin ka Nawh, “Simiang eue, ex tak sang hu ka pui mawx? Maix koe gumlox ju leeing ju.

⁶⁹Ex hoik yum rhawrn mai tawng grawng mawh Maix Kawn Siyiex pa singax heue.

⁷⁰Yesux baox pawk lox ah nin ka kix, “Aux hoik laug ti teei pex kao ra kaux ang mawh lie? Viang mawh nan ka daux pex tix kaux mawh phi caox heue.”

⁷¹Nawh sang ah ka Yudax Isakariut, kawn Simon, kheu mawh nawh kaw pa sang tik tawx Nawh Cao mai ka daux cub kawncau kao ra kaux nawh mawh nang tix kaux heue.