Read kinyarwanda YOHAN 8 Bible Online

YOHAN 8 - kinyarwanda bible

YOHAN 8

²Yam ponngawb cao cao Nawh deeh hoek ti laig ka daux nyiex bwan mai pui khawmuik khawm leeing hoek ka Nawh, Nawh ngawm mai gau ka kix heue.

³Pui tiem lai mai Pharishie khankix viex bun tix kaux pa hoik yaox kix yam phit vao nawh, kieh nawh ot sinax pui tan.

⁴Kix ah nin ka Nawh Cao, “Sara Cao Gau eue, bun in mawh pa pon giex dom yam phit vao nawh heue.

⁵Daux lai beenli Mose nhie ex teei simaox dheem pui pa yuh nan yum. Viang mawh nan, Maix sang ah grawng nawh yuh ka mawx?”

⁶Kix ah nin kheu sang cheuk kix ti yaox Nawh sonsang yaox dee deuh phimap ka piang Nawh Cao heue. Yam an Yesux nom ti tiiem piang tiex ka giien taix tix.

⁷Kheu ca chawk kix Nawh law lawx, Nawh cung mai ah nin ka kix, “Kaw pa ang koe phimap ka daux pex, kieh nawh teei simaox dheem ka nawh ka ha”

⁸Nawh Cao deeh nom ti tiiem piang tiex.

⁹Kix pa hoik mhong lox an, rhawm kix chix keud chix tawng deeh kieh kix doh ka phimap tokaux tix, tix kaux lai tix kaux lih hu, jah ka pui riex ju khaing paox tix, tom sidah hoek ka pui awn ju. Kix prah Yesux ot nong nong bun an cung sinax tan tix kaux khaing heue.

¹⁰Yam an Yesux yaog ti kaoh ang lai yaox pui tang kaux tix kaux kawx, yaox ngie bun an tix kaux khaing, Nawh Cao ah nin ka nawh, “Bun eue, pui pa deuh phimap piang maix ot dee mawx? Pui tix kaux kawx ang prawng see maix lie?”

¹¹Nawh deeh ah nin, “ang prawng tix kaux kawx Simiang eue” Yesux baox ah nin, “Aux kawx ang prawng maix, hu heue. Khaix in paw baox yuh krax lud tix bawg kawx”

¹²Yam an Yesux baox ah nin ka kix tix bawg, “Aux mawh pa riang haktiex heue. Kaw pa hawt khaix Aux tak ang hu ka daux pa faik, nawh tak sang pon pa riang im ju heue.”

¹³Pharishie khankix ah nin ka Nawh Cao, “Maix kham mhai rug grawng tokaux tix, mhai rug Maix ang mawh pa mawh meh heue.”

¹⁴Yesux deeh pawk ah nin ka kix, “Viang Aux kham mhai rug grawng tokaux tix kawx, mhai rug Aux mawh pa mawh pa meh, kheu tawng Aux dee kaoh Aux mai dee sang hu Aux heue. Viang mawh nan, ang pex tawng dee kaoh Aux mai dee sang hu Aux.

¹⁵Pex prawng hawt nex nham heue, Aux kienie ang prawng ka pui tix kaux kawx.

¹⁶Phan Aux prawng, pa prawng Aux mawh pa mawh pa meh, kheu ot Aux nong nong ang mawh, Keeing Cao pa ploi Aux hoek ot tau mai Aux heue.

¹⁷Hoik tiiem ti deuh daux lai beenli pex, grawng lox kham pui ra kaux mhai rug mawh pa mawh meh.

¹⁸Aux mawh Kaw pa kham mhai rug grawng Tokaux tix, Keeing Cao pa ploi Aux hoek kham mhai rug ka grawng Aux heue.”

¹⁹Kheu nan kix baox chawk Nawh Cao ah nin, “Keeing Maix ot dee mawx?” Yesux baox pawk ah nin, “Pex ang tawng ka Aux, ka Keeing Aux kawx pex ang tawng. Phan pex tawng ka Aux, Keeing Aux kawx, pex tak sang tawng heue.”

²⁰Yam sidiex gau Nawh daux nyiex bwan, Nawh krai lox ceu in ka daux lawg dee deuh mau. Tix kaux kawx ang giex Nawh kheu bawg yam Nawh ang nyang bax hoek heue.

²¹Nawh baox ah nin ka kix tix bawg, “Aux sang hu heue. Pex tak sang sawg ka Aux mai pex tak yum ka daux phimap tix. Dee sang hu Aux ang pex pon ti hoek kah”

²²Mawh kheu nan pui Yudax khankix ah nin, “Nawh sang plaux tokaux tix yum lie? Kheu ah Nawh, Dee sang hu Aux ang pex pon ti hoek kah”

²³Nawh ah nin ka kix, “Pex mawh pa kaoh khaing plak greem, Aux mawh pa kaoh khaing dee long. Pex mawh pui haktiex in, Aux ang mawh pui haktiex in.

²⁴Mawh kheu nan Aux tom hoik krai ka pex, Pex tak yum ka daux phimap tix, grawh grawng nawh phan pex ang yum rhawm grawng mawh Aux Kaw an, pex tak sang yum ka daux phimap tix heue.”

²⁵Mawh kheu nan kix baox pawk lox ah nin ka Nawh Cao, “Maix mawh mawx?” Yesux baox ah nin ka kix, “Aux mawh awm pa hoik krai Aux ka pex tom yam jah heue.

²⁶Aux koe lox pa krai, pa prawng grawng pex kied nie tete, viang mawh nan, Kaw pa ploi Aux hoek mawh pa mawh meh ceu pa mhong Aux ka Nawh, Aux sidiex ceu an khankix ka haktiex heue.”

²⁷Ang kix tawng grawng krai Nawh grawh grawng Keeing Cao ka kix.

²⁸Mawh kheu nan Yesux ah nin ka kix, “Khaix hoik yaog pex Kawn kawn pui, yam an pex tak sang tawng grawng Aux mawh Kaw an grawng pa ang Aux yuh alo tokaux tix, tix ceu kawx, Aux sidiex ngie ceu pa gau Keeing Cao ka Aux khankix khaing.

²⁹Kaw pa ploi Aux hoek ot tau mai Aux, ang Nawh prah Aux ot nong nong, kheu yuh Aux ceu pa khaw rhawm Nawh ku jheung jheung heue.”

³⁰Yam krai Nawh ceu in khankix pui yum rhawm ka Nawh Cao haoh hun heue.

³¹Mawh kheu nan Yesux ah nin ka pui Yudax pa hoik yum rhawm ka Nawh khankix, “Phan pex ot ka daux gumlox Aux, pex mawh kawncau Aux tete heue.

³²Pex tak tawng pa mawh meh, mai pa mawh pa meh an tak sang kieh pex lawd luan”

³³Kix ah nin ka Nawh Cao, “Ex mawh ru Abraham, ang ex sax yuh siliex ka pui tix kaux kawx. Maix lai ah, tak sang kieh pex lawd luan, yuh ka mawx?”

³⁴Yesux baox deeh ah nin ka kix, “Aux krai lox tete ka pex, pui pa yuh phimap ku kaux daux pui mawh siliex phimap heue.

³⁵Siliex kienie, pon ti ot ka daux nyiex jheung jheung ang mawh. Pa mawh kawn pon ti ot ka daux nyiex jheung jheung heue.

³⁶Mawh kheu nan phan Kawn Cao kieh pex lawd luan, pex pon lawd luan tete.

³⁷Aux tawng pex mawh ru Abraham, viang mawh nan, pex sawg ti pah Aux yum kheu gumlox Aux ang ot ka daux pex.

³⁸Aux sidiex ceu pa hoik yaox Aux ka Keeing Aux khankix, viang pex kawx yuh ceu pa hoik yaox pex ka keeing pex heue.”

³⁹Kix baox pawk lox ah nin ka Nawh, “Abraham mawh keeing ex” Yesux baox ah nin ka kix, “Phan pex mawh kawn Abraham, pex khaw ti yuh awm pa yuh Abraham.

⁴⁰Yam in pex sawg ti pah ka Aux, Kaw pa krai ceu pa mawh meh, pa hoik mhong tix khaing Siyiex ka pex. Abraham ang doh yuh nin.

⁴¹Pex hawt yuh ceu pa yuh keeing pex.” Kix deeh ah nin “Ex ang mawh kawn sut, ex koe Keeing tix kaux khaing pa mawh Siyiex heue.”

⁴²Yesux baox ah nin ka kix, “Phan Siyiex mawh Keeing pex, pex tak sang moh Aux, kheu kaoh hoek Aux khaing Siyiex heue. Grawh grawng nawh, Aux hoek kheu alo Tokaux tix ang mawh, viang mawh nan mawh Nawh pa ploi Aux hoek heue.

⁴³Mawh kheu patix pex lai ang tawng lox Aux? Mawh kheu ang pex chix nghiet lox Aux heue.

⁴⁴Pex lih hoek khaing keeing pex pa mawh phi caox, pex simie ti yuh alo keeing pex. Tom yam jah mawh pa pah pui yum, ang cung ka daux pa mawh meh, kheu pa mawh meh ang koe daux nawh. Yam ah nawh lox pie lhen, nawh lak ah lox tokaux tix, kheu mawh nawh pa chix pie lhen nawh mawh keeing pa pie lhen heue.

⁴⁵Kheu krai Aux pa mawh meh, pex ang yum rhawm ka Aux.

⁴⁶Ka daux pex mawh mawx pa pon jhawp pon krai grawng koe phimap Aux? Phan Aux krai lox pa mawh meh, yuh patix pex lai ang yum rhawm ka Aux?

⁴⁷Kaw pa dex dawd mai Siyiex chix nghiet lox Siyiex, Kheu ang pex dex dawd mai Siyiex, pex tom ang chix nghiet ka lox Nawh heue.”

⁴⁸Yudax khankix deeh ah nin ka Yesux, “Pa ah yix, Maix mawh pui Samarix pa koe phicaox, khaw, ang mawh lie?”

⁴⁹Yesux deeh pawk ah nin, “Ang Aux koe phi caox, viang mawh nan Aux yungyi ka Keeing Aux, pex yuh pa ang yungyi ka Aux heue.

⁵⁰Aux ang sawg min pakngai tokaux tix. Koe tix kaux pa sawg min pakngai son Aux, pa sang prawng.

⁵¹Aux krai tete ka pex, phan pui priex ti hawt lox Aux, nawh tak ang yaox krax yum tix bawg kawx heue.”

⁵²Yudax khankix baox ah nin ka Nawh Cao, “Yam in ex tawng Maix koe phi caox tete, Abraham cao jhai khankix hoik yum, Maix ah, Phan pui priex ti hawt lox Aux ang yaox ti cim krax yum tix bawg kawx

⁵³Khex lheu ting Maix khaing keeing ex Abraham pa hoik yum lie? Cao jhai khankix kawx hoik yum. Maix sang yuh tokaux Maix mawh mawx?”

⁵⁴Yesux baox pawk ah nin, “Phan Aux yaog yaw tokaux tix, pa yaog yaw an ang koe bwanson tidtix. Mawh Keeing Aux pa yaog yaw Aux, Kaw pa ah pex mawh Siyiex pex heue.

⁵⁵Pex ang lai tawng Nawh, viang mawh nan Aux tawng Nawh, phan Aux ah, ang Aux tawng Nawh, Aux tak awm nang pex pa mawh pui pie lhien. Aux tawng Nawh priex ti hawt lox Nawh heue.

⁵⁶Keeing pex Abraham gaux rhawm kheu tak sang yaox nawh singaix Aux, nawh hoik yaox ti gaux rhawm kah heue.

⁵⁷Kheu nan Yudax khankix ah nin ka Nawh, “Pie ju Maix ang nyang bax koe tixphwan num. Maix khex hoik yaox Abraham lie?”

⁵⁸Yesux baox ah nin ka kix, “Aux krai tete telai ka pex, ka ang Abraham nyang bax keh, Aux hoik dawg mawh heue.”

⁵⁹Kheu nan kix tom teei simaox sonsang dheem ka Nawh. Yesux mox tix, hu sinax kix lih khaing daux nyiex bwan heue.