Read kinyarwanda YOHAN 9 Bible Online

YOHAN 9 - kinyarwanda bible

YOHAN 9

¹Yam lawng Yesux krax Nawh yaox pui pa dug ngai tom yam keh tix, tix kaux.

²Kawncau Nawh khankix chawk Nawh ah nin, “Rabi eue, kaw in dug ngai kheu phimap mawx? Kheu tokaux nawh lie? Kheu miex keeing nawh lie?”

³Yesux deeh pawk ah nin, “Ang mawh kheu phimap nawh, miex keeing nawh viang mawh nan mawh sonsang sidawng kaing Siyiex ka daux nawh, nawh tom yuh nin heue.

⁴Aux tak yuh kaing Kaw pa ploi Aux ponngaix. Ponsawm tak sang hoek yam ang pui chix yuh kaing heue.

⁵Yam ot Aux piang haktiex, Aux mawh pa riang haktiex heue.”

⁶Khaix hoik ah Nawh nan, Nawh baig rawm myia piang tiex yuh tiex lan mai kraix ka ngai pui pa dug an.

⁷Ah nin ka nawh, “Hu khoek ka daux dung Silawng heue.” Dee bleeh Silawng mawh ploi hu heue. Nawh hu khoek tix, nawh chix yaox yam deeh hoek heue.

⁸Mawh kheu nan paox plawg nawh mai kix pa hoik yaox nawh glangka an yam caung nawh ti ih, ah nin, “Kaw in mawh pa ngawm caung ti ih ang mawh lie?”

⁹Tang kaux tix blah ah, “Mawh nawh heue.” Tang kaux tix blah ah, “Ang lai mawh nawh, mawh pui pa awm nawh heue.” Tokaux nawh ah nin, “Aux mawh kaw an heue.”

¹⁰Mawh kheu nan kix chawk nawh ah nin, “Phan mawh nan ngai maix hoik baoh yuh ka mawx?”

¹¹Nawh deeh ah nin, “Mawh pa kaux Yesux, Nawh yuh tiex lan kraix ka ngai aux mai ah nin ka aux, Hu khoek ka daux dung Silawng, kheu nan aux hu khoek ngai tix aux chix yaox heue.”

¹²Kix chawk nawh ah nin, “Ot Nawh dee mawx?” Nawh deeh ah nin, “Aux ang tawng.”

¹³Kix teei kaw pa hoik dug ngai glang ka an mai viex nawh hu ka Pharishie khankix heue.

¹⁴Singaix yuh Yesux tiex lan mai cox ngai nawh blah mawh singaix twah,

¹⁵Mawh kheu nan Pharishie khankix baox deeh chawk nawh ah nin, “Ngai maix pon ti chix yaox yuh ka mawx?” Nawh ah nin ka kix, “Nawh kraix tiex lan ka ngai aux mai aux hu khoek ngai tix aux pon ti chix yaox heue”

¹⁶Mawh kheu nan Pharishie tix blah ah nin, “Pui an ang mawh pa hoek khaing Siyiex, kheu ang Nawh twah klaung singaix twah” Pui tang kaux ah nin, “Pui caox chix yuh mhai pa daox am yuh nin yuh ka mawx?” Kheu nan kix tix kaux lai tix kaux tang lox siyox moing ang khaw paox tix.

¹⁷Mawh kheu nan kix deeh baox chawk pui pa hoik dug ngai an ah nin, “Kheu cox Nawh ngai maix blah maix sang ah ka mawx grawng Nawh?” Nawh pawk ah nin, “Nawh mawh Cao jhai heue.”

¹⁸Viang mawh nan, pui Yudax khankix ang yum rhawm grawng hoik dug ngai nawh tix bawg grawng hoik pon nawh ti chix yaox, ka ang kix nyang bax kok miex keeing kaw pa hoik pon ti yaox,

¹⁹chawk kiex ah nin, “In mawh kawn pax, pa ah pax, dug ngai tom yam keh lie? Phan mawh nan yam in nawh lai chix yaox yuh ka mawx?”

²⁰Miex keeing nawh pawk lox ah nin, “Yiex tawng kaw in mawh kawn yiex pa dug ngai tom yam keh heue.

²¹Viang mawh nan, mawh kheu patix nawh chix yaox yam in ang yiex tawng, yiex ang tawng Kaw pa cox ngai nawh blah heue. Nawh hoik riex ju, chawk ka nawh mai nawh tak krai grawng tokaux tix heue.”

²²Miex keeing nawh ah nan kheu lhat kiex ka pui Yudax khankix, grawh grawng nawh pui Yudax khankix hoik kum kawng paox tix yuh nin, phan pui tix kaux kaux rieb ti teei Yesux mai ah Nawh mawh Cao Khrit, tak sang grheu nawh lih khaing daux nyiex sidiex heue.

²³Mawh kheu in miex keeing nawh ah, “Nawh hoik riex ju, chawk ka nawh, nawh tak krai grawng tokaux tix heue.”

²⁴Kix baox kok pui pa hoik dug ngai an hoek ra bawg tix bawg mai ah nin ka nawh, “Yaog yaw Siyiex heue, ex hoik tawng Nawh mawh Pui phimap”

²⁵Mawh kheu nan pui dug ngai an tom baox pawk lox ah nin, “Mawh Nawh Pui phimap lie, Pui mhawm lie, ang aux tawng. Aux tawng tix ceu khaing, glang ka in aux dug ngai yam in aux hoik chix yaox heue.”

²⁶Kix baox chawk nawh ah nin, “Nawh yuh patix ka maix? Nawh cox ngai maix blah yuh ka mawx?”

²⁷Nawh pawk lox ka kix ah nin, “Pie yam in aux hoik krai ka pex, pex ang nghiet. Mawh kheu patix pex mie ti baox deeh mhong? Viang mawh pex kawx simie ti yuh kawncau Nawh lie?”

²⁸Yam an kix blin lox ka nawh ah nin, “Maix mawh kawncau Nawh, yix mawh kawncau Mose.

²⁹Yix tawng hoik sikah Siyiex mai Mose, viang mawh nan Pui in kaoh khaing dee mawx yix ang tawng”

³⁰Kaw an baox pawk lox ah nin ka kix, “Pex ang tawng Nawh kaoh khaing dee mawx, viang mawh nan Nawh hoik cox ngai aux blah, kheu nan koe dee daox deng kah,

³¹Yix tawng grawng ang Siyiex nghiet lox pui phimap khankix, viang mawh nan phan pui krub ka Siyiex mai hawt yuh alo Nawh, Nawh nghiet lox kaw an heue.

³²Tom yam jah ti kaw haktiex dix, ang sax mhong tix bawg kawx, grawng pa chix cox ka pui pa hoik dug ngai tom yam keh tix kieh ngai nawh blah tix kaux kawx heue.

³³Phan Pui in ang mawh pa hoek khaing Siyiex, Nawh ang tau ti chix yuh tix ceu kawx”

³⁴Kix baox pawk lox mai ah nin ka nawh, “Maix mawh pa keh ka daux phimap maix gau ka yix lie?” Kix grheu ti tik nawh khaing nyiex sidiex heue.

³⁵Yesux mhong grawng grheu kix ti tik nawh mai Nawh Cao yaox nawh mai chawk nawh ah nin, “Yum rhawm maix ka Kawn Siyiex lie?”

³⁶Nawh baox pawk lox mai chawk ah nin, “Simiang eue, sonsang yum rhawm aux ka Nawh, Nawh mawh mawx?”

³⁷Yesux deeh ah nin ka nawh, “Maix hoik yaox Nawh Kaw pa sikah mai maix yam in mawh Nawh heue.”

³⁸Nawh deeh ah nin, “Simiang eue, aux yum rhawm heue.” nawh krub ka Nawh Cao heue.

³⁹Yesux baox ah nin, “Aux hoek piang haktiex in sonsang prawng heue, yuh ka mawx ngai kix pa ang chix yaox khankix tak sang chix yaox, mai kix pa chix yaox khankix, tak sang dug kah heue.

⁴⁰Pharishie pa ot mai Nawh khankix tix blah mhong lox in chawk ah nin, “Viang yix kawx hoik dug ngai lie?”

⁴¹Yesux baox pawk lox ah nin ka kix, “Phan ngai pex dug tete, pex ang koe phimap, viang mawh nan yam in pex ah, Ex chix yaox tix, kheu nan pex ca kawn koe phimap heue.”