Read kinyarwanda 1 KAWRINTHUX 1 Bible Online

1 KAWRINTHUX 1 - kinyarwanda bible

1 KAWRINTHUX 1

¹Pawlux pa hoik kok ti kieh mawh kawncau pa ting Yesux Khrit kheu alo Siyiex mai puxaik ex Sotsen,

²tawx ka ceucao Siyiex pa koe ka daux veng Kawrinthux, pa mawh kix pa hoik singax ka daux Yesux Khrit, pa hoik kok ti kieh mawh pui singax, tau mai can kix pa kok ka ceu kaux Simiang ex Yesux Khrit kudah kudee, pa mawh Simiang kix mai Simiang ex heue.

³Kieh pex koe bwanson mai pa nhim pa kaoh khaing Keeing ex Siyiex mai Yesux Khrit liak.

⁴Aux yaog yaw bwanson Siyiex aux ku jheung ka grawh grawng pex, mawh kheu bwanson Siyiex pa hoik tawx ka pex ka daux Yesux Khrit.

⁵Mawh kheu hoik koe pex ka kuceu ka daux Nawh Cao, ka daux pa chix sikah kuceu khawmuik mai krax tawng yung khawmuik heue.

⁶Awm pa khaw mai mhai rug grawh grawng Cao Khrit pa hoik kaux cong ka daux pex.

⁷Mawh kheu nan pex tom ang lai da khaix ka daux totaix bwanson tix ceu kawx, yam ca krox jun pex son bawg yam sang deeh lih bleeh Simiang ex Yesux Khrit.

⁸Kaw pa tak sang kieh pex kaux cong tom sidah, sonsang mawh pex pa ang koe dee deuh phimap, ka daux singaix Simiang ex Yesux Khrit heue.

⁹Siyiex pa hoik kok pex ti neuex ka daux pa yuh paox pie tau mai Kawn Nawh Simiang ex Yesux Khrit mawh pa kaux sijax heue.

¹⁰Puxaik khankix eue, aux khyox khaw ka pex ka daux ceu kaux Simiang ex Yesux Khrit, sonsang sikah pex khawmuik ka lox tix ceu khaing mai son ang sang koe krax tang gwieh paox tix ka daux pex, sonsang rom pex ti grum mhawm tau, ka daux rhawm tix mu mai krax keud tix blawng khaing heue.

¹¹Grawh grawng nawh, puxaik aux khankix eue, kix pa mawh pui geh nyiex Khlawe hoik krai lao ka aux grawng pex, grawng pa koe krax simah pa ang khaw paox tix ka daux pex heue.

¹²Pa sang ah aux mawh nin, pex kaux pui mawx kaux pui an lai nieb tang ah nin, “Aux mawh pa dex mai Pawlux,” mai “Aux mawh pa dex mai Apawlux,” mai “Aux mawh pa dex mai Kephax,” mai “Aux mawh pa dex mai Cao Khrit” heue.

¹³Khex mawh Cao Khrit pa hoik tang gwieh kah lie? Hoik teei Pawlux yum ka piang khaox lhak ka son pex lie? Phan ang mawh nan hoik cubcom pex rawm ka daux ceu kaux Pawlux lie?

¹⁴Aux yaog yaw bwanson Siyiex, kheu ang aux cubcom pex ka rawm tix kaux kawx, lheu khaing Karipux mai Kayux heue.

¹⁵Ha pui tix kaux kaux kox sang ah, pex hoik cubcom ka daux ceu kaux aux heue.

¹⁶Viang ka geh nyiex Sathephanax kawx, aux hoik cubcom kah, phan mawh pa lheu khaing an, ka pui tang kaux, cubcom aux nieh, aux ang cubcom nieh, ang lai tawng heue.

¹⁷Grawh grawng nawh Cao Khrit ploi aux son sang tawx krax cubcom ang mawh, viang mawh nan ploi aux son sang sidiex gau lox bwan gaux rhawm, ang mawh ka daux pingnya pa chix lox sikah, phan ang mawh nan, ha sang kieh khaox lhak Cao Khrit kox mawh pa giex going heue.

¹⁸Grawh grang nawh gumlox pa dex mai khaox lhak mawh pa daox aw ka kix pa hoek krax laux leeing, viang mawh nan ka ex pa hoek krax taoh mawh lox sibrawm Siyiex heue.

¹⁹Grawh grawng nawh hoik tiiem ti deuh ah nin, “Ka pa koe pingnya Aux tak yuh pingnya kix laux mai krax pa chix tawng kix, Aux tak sang kieh lih mawh pa ang koe cue heue.”

²⁰Kaw pa koe pingnya koe dee mawx? Pui pa tiiem lai koe dee mawx? Cao pa thiang daux ju in koe dee mawx? Siyiex hoik kieh pingnya haktiex in lih mawh pa daox aw ang mawh lie?

²¹Grawh grawng nawh, mawh kheu hoik yaox grawng ka daux pa khaw mai pingnya Siyiex, haktiex in ang lai tawng ka Siyiex kheu pingnya tix tiru, hoik caw ka rhawm Siyiex ti sang kieh kix pa yum rhawm hoek ka krax taoh, kheu ceu pa daox aw pa sidiex gau heue.

²²Mawh kheu hoik yaox grawng rawg pui Yudax khankix son mhai pa daox am mai grawng sawg pui Helasax khankix ka pingnya,

²³viang mawh nan ex sidiex grawng Cao Khrit pa hoik teei yum piang khaox lhak, pa hoik mawh dee sideeing ka pui Yudax khankix mai ceu pa daox aw ka pui tang ceu khankix heue.

²⁴Viang mawh nan, ka kix pa hoik kok ti teei khankix, ka pui Yudax mai ka khawm pui Helasax, Cao Khrit mawh sibrawm Siyiex mai pingnya Siyiex heue.

²⁵Grawh grawng nawh ceu pa daox aw Siyiex mawh pa nie lheu ting pingnya khaing kawn pui mai ceu pa iak riang rao Siyiex mawh pa nie lheu ting riang rao khaing kawn pui heue.

²⁶Puxaik khankix eue, keud ka grawng pa hoik kok ti teei ka pex, ang koe pui pa koe pingnya awm pa khaw mai nex nham tom nie, ang koe pui pa ting ao min tom nie mai ang koe doeh ru simiang tom nie heue.

²⁷Siyiex hoik laug ti teei ceu pa daox aw pa dex mai haktiex in, sonsang kieh Nawh kix pa koe pingnya kaig tua kah heue. Siyiex hoik laug ceu pa iak riang rao pa dex mai haktiex in, sonsang kieh Nawh ceu pa ting riang rao kaig tua kah heue.

²⁸Sonsang kieh Nawh pui pa koe ceu kaig twa, Nawh hoik laug ti teei pa ang koe bwanson pa dex mai haktiex in mai ceu pa deuh ti ang koe ceu khankix lih ti mawh pa koe ceu heue.

²⁹Son ang pui tix kaux kawx sang yaw tix, sivoe Siyiex heue.

³⁰Hoik mawh kheu Nawh Cao, pa ot pex daux Yesux Khrit, pa hoik kieh mawh pingnya pa rahsee, pa singax mai pa taoh, pa kaoh khaing Siyiex ka son ex,

³¹Sonsang khaw mai lox pa hoik tiiem ti deuh ah nin, “Kieh kaw pa yaw, yaw rangdi tix ka daux Simiang heue.”