Read kinyarwanda 1 KAWRINTHUX 11 Bible Online

1 KAWRINTHUX 11 - kinyarwanda bible

1 KAWRINTHUX 11

¹Mawh kheu nan kieh pex mawh pa hawt jawh ti yuh khaix aux, awm tokaux aux kawx, mawh pa hawt jawh ti yuh ka Cao Khrit heue.

²Aux yaog yaw ka pex, mawh kheu doh keud pex ka aux ka daux ku ceu khawmuik mai kheu giex tom cong ka lox been pa hoik tawx aux ka pex khankix heue.

³Aux simie ti kieh pex tawng, grawng kaing simex ku kaux mawh Cao Khrit mai kaing bun mawh simex mai kaing Cao Khrit mawh Siyiex heue.

⁴Simex kaux pui mawx ang ah, yam rawg bwan, phan ang mawh nan yam ah lox jhai, phan tawb kaing tix, mawh pa yuh pa ang yung yi ka kaing tix heue.

⁵Bun kaux pui mawx ang ah, yam rawg bwan, yam ah lox jhai, phan ang tawb kaing tix ka man tawb, mawh pa yuh pa ang yung yi ka kaing tix. Grawh grawng nawh, awm mawh tix ceu khaing mai ang lai siyox khaing hoik khlao nawh kaing tix heue.

⁶Grawh grawng nawh phan bun ang tawb kaing tix ka man tawb, kieh nawh rhip ti tik ka khawm hauk kaing nawh, phan pa hoik rhip hauk kaing, phan ang mawh nan pa hoik khlao kaing mawh pa kaig tua ka son bun, kieh nawh tawb kaing tix ka man tawb heue.

⁷Grawh grawng nawh, simex tom ang khaw ti tawb kaing tix ka man tawb, kheu mawh nawh riang pakpeung mai min pakngai Siyiex, bun mawh min pakngai simex heue.

⁸Grawh grawng nawh simex ang lai lih mawh khaing bun, bun hoik lih mawh khaing simex heue.

⁹Viang mawh pa phan pa yuh ka simex kawx, ang lai mawh son bun, hoik phan hoik yuh bun, ka son simex heue.

¹⁰Mawh kheu jao in bun khaw ti koe mhai ka piang kaing nawh, grawng ot nawh greem sibrawm mex tix, kheu kawncau Siyiex khankix heue.

¹¹Ka daux Simiang bun mawh pa tang tiah khaing simex ang mawh, viang simex kawx ang mawh pa tang tiah khaing bun heue.

¹²Grawh grawng nawh awm bun hoik lih mawh khaing simex, viang simex kawx lih mawh kheu bun. Viang mawh nan ku ceu khawmuik mawh, pa mawh khaing Siyiex heue.

¹³Tokaux pex prawng ca ti yaox, phan bun pa ang tawb kaing tix ka man tawb mai rawg bwan ka Siyiex khaw lie?

¹⁴Viang been pa lak tawng pui kawx gau ka pex, grawng phan simex koe hauk kaing pa lang mawh pa yuh min pakngai nawh laux ang mawh lie?

¹⁵Phan bun koe hauk kaing pa lang, mawh min pakngai ka nawh, mawh kheu hoik tawx hauk kaing ka nawh, tang man tawb heue.

¹⁶Phan pui tix kaux kaux koe rhawm ti sang thiang ka grawng been in, viang ex mai khawm ceucao Siyiex khankix kawx ang lai koe been pa yuh nan heue.

¹⁷Pa tawx aux lox tawm in, ang mawh sonsang yaogyaw ka pex. Mawh kheu pa khrawm pex paox tix ang mawh sonsang nie lheu mhawm, mawh sonsang nie lheu caox heue.

¹⁸Grawng phao ka yam khrawm pex daux ceu cao, aux mhong grawng lih koe krax tang gwieh pex paox tix mai aux kub yum rhawm ka ceeix heue.

¹⁹Grawh grawng nawh tak lai koe cub pa tang keud ka daux pex, sonsang sidawng kix pa mawh pa mhawm ka daux pex heue.

²⁰Mawh kheu nan viang pex krawk khrawm paox tix ka daux tix dah khaing kawx, ang lai mawh son sang ih Priex bo Simiang.

²¹Grawh grawng nawh kaux pui mawx kaux pui an tang grux ih priex bo tokaux tix, tix kaux kaux cai rhawm mai tang kaux yoek kah heue.

²²Kheu hah, ang pex koe nyiex son dee sang ih, sang nyaux lie? Phan ang mawh nan pex nieb yuh ti ang nab yam ka ceu cao Siyiex mai yuh ti kieh kix pa ang koe tidtix kaig tua kah lie? Aux tak sang ah ka mawx ka pex grawng in? Aux tak sang yaog yaw pex kah lie? Aux ang lai yaog yaw pex kah heue.

²³Grawh grawng nawh, ceu pa hoik tawx hoik pong aux ka pex, mawh pa hoik pon aux khaing Simiang. Pa mawh grawng pa teei Simiang Yesux blah tix lon, ka daux sawm pa tik pa tawx ka Nawh,

²⁴khaix hoik yaog yaw Nawh bwanson, Nawh sivit blah an ah nin, “Teei, ih, in mawh tokaux Aux, pa hoik sivit son pex, yuh ceu in son sang doh keud ka Aux heue.”

²⁵Awm an Nawh Cao teei ka khawm kawk, khaix priex bo ah nin, “Kawk in mawh sijax mukheu pa khraox ka daux nham Aux, yuh yuh nin awx, pex nyaux miex bawg ang ah, son sang doh keud ka Aux heue.”

²⁶Grawh grawng nawh pex ih ka blah in mai nyaux ka kawk in miex bawg ang ah, pex jhi grawng pa yum Simiang, tom sang hoek Nawh Cao heue.

²⁷Mawh kheu nan kaux pui mawx ang ah, pa ih ka blah mai nyaux ka kawk Simiang, ka daux krax pa ang keung, tak sang mawh pa phit ka tokaux mai nham Simiang heue.

²⁸Kieh pui chawk ka tokaux tix ka ha, khaix hoik yuh nan kieh nawh ih ka blah mai nyaux ka kawk heue.

²⁹Grawh grawng nawh kaw pa ih mai pa nyaux, ih mai nyaux krax prawng ciyang ka piang tokaux tix tiru, phan nawh ang tawng ang yaox ka Tokaux An heue.

³⁰Mawh kheu jao in pui tom nie, tom koe krax iak riang mai krax saux nyia, mai yum kah heue.

³¹Viang mawh nan phan ex chawk cheng ka tokaux tix rahsee, ex tak ang yaox krax pa prawng ca heue.

³²Viang mawh nan, yam yaox ex pa prawng ca khaing Simiang Siyiex, mawh Simiang pa sivied ti gau ka ex, son ang ex hoek krax pa prawng ciyang phimap tau mai pui haktiex khankix heue.

³³Mawh kheu nan, puxaik aux khankix eue, yam krawk khrawm pex paox tix ti sang ih, tix kaux lai tix kaux krox ka paox tix awx.

³⁴Phan pui tix kaux kaux cai rhawm, kieh nawh sawm ka nyiex tix ha, yuh ka mawx son pa khrawm pex paox tix, tak ang mawh pa kieh pex pon krax prawng ciyang heue. Can pa deuk khankix, aux hoek lai mawx ang ah, aux tak koi cox yam an heue.